2 KORINTHIAMI 5
5
1Kughengu ninguno ithi akeuno ayeghilo nino achekeu niphimpi hipau aphiki toi shipusave aye, ningu pelo alhokupuju ngo kepu ghenguno Alhou ampino kungughalo auno shimokeu ki lakhi kutope puani. 2Eno kungughalo nikungoki akeulo avenishi kelauno itehi ninguye amlo ghuju ghugha shi acheni; 3kughengu ninguno tipau pepuluve aye aphi kumsa akeu ithulupemo nani. 4Ningu phimpi phikilo ake thaqhu loye kutakihi kelauno amlo ghuju shi acheni. Ike ninguye ayeghilo phimpi pheve nishike ghenguno kumoe ikemu ninguye kungughalo phimpi pepunishiye ke, tishianguno thiveni kuau huye akuxupuno munove peniye ke. 5Hipau thime ghenguno Alhou no ningu pesu kutokupuyipe ani, eno pano ningu ghenguno puakeu Ghungu kihikuthado ghenguno tsuvae.
6Tishikehu ninguye pulhapuju amlo kuloghino chhitoi acheni. Ninguno ithi akeuno ni phimpi hipau ake tiviloye Ampeu ki launo putosu ani, 7kughengu ninguye agi zulo aghikeu kumono akupulu lono checheni. 8Ninguye amlo kuloghi shi ani, kughengu aphimpi qhiveno Ampeu kilo acheuve nikeu pavike. 9Ike thwokha kumtsu nguno alauno,khile khilepimu pa pulou shitsu anikeu eno pa gholo anikeuno ni kimijike. 10Kughengu ningu kumtsu athono Khristo kughakutha zulo puthugho masa nani eno pututano kiu mla puani keno kivi kusa kiqi lono ithulupe nani. #Rom 14.10
Khristo lono Kuposhukulu
11Ampeu sukumsaye kiu keno ninguno ithi ani kehu nino timiqo hakite acheni. Ninguye kiutoi kemi keno Alhou no ithi ani, ino laju akeuno nongu ghi ni ithi aghi nanike. 12Ninguye nilikhi ni sheqhe anike kumoe ikemu nongu pelo ni ghenguno akijivilo kepu akiqi kivi nongu tsu anike, tishianguno nongu pelo khunoqono timi ghushoghili jumo puzu aju-akoghe jupesu aqhekuza shi cheni keno tipaqo khochilelu peniyeke. 13Ninguno kughuzumi ghola shive aghiaye tiye Alhou ghenguno ke ikemu ningu kukumsu achipilo aghi aye, tiye nongu ghenguno ke. 14Kughengu Khristo kikimiyeno ningu bothape ani kehu ninguno ithitoi akeuno milakhino kumtsu ghenguno thive ike tipau kiqiye timi kumtsu pa gholono thikuqhavae. 15Pano timi kumtsu ghenguno thive kehu khunoqomi xulu keno tipaqoye pututa kuxu xupemoniyeke, ikemu panongu ghenguno thiveno xuputhuvekeu timi lakhi ghenguno xupeniyeke.
16Tighenguno ninguye timi kuxu ghola qhemi pesu khuu shou mu xatha chemoe. Ghuthu lakhiye ninguno timi kuxu ghola qhemi pesu Khristo shou xathaju che kemu itehiye khilemu tishimovae. 17Tighenguno timi khuu khumu Khristo gholo xukimeluve aye paye lhoxu kithe lakhi shivae, aqau woveno akitheu ighivae. 18Hipaqo kumtsu Alhou launo ke, pano alashilupeke eno kutami pelo pa sasu alashilu penikeu kumlapu saje ningu tsuke. 19Ike tiye, Alhou no Khristo gholono ayeghilomi sasu kulashilu ake; Alhou ye timi xine kichekumqo pe panongu shou qhitsumo puzu kulashilu keu tsape pesu ningu pichebetsuke. 20Ikehu ninguye Khristo ghenguno lashikami ke, Alhou no ningu vechewo pa ampino nongu piputo akeu kumlhoke. Khristo she amuzu shighi ninguno nongu qhuiniju anike, Alhou lau alashiluvelo! 21Khristo ye axine kuhae, ikemu Alhou no pa pesu axine kughulhovetsu, tishianguno pa gholo kuqhape akeu lono ninguye Alhou mikucho kusajelupeniye ke.
Iliyochaguliwa sasa
2 KORINTHIAMI 5: SUMIBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.