LEVIYEN 3
3
Kecca ghena Kekinyi
1Anyi kesüle kesü lela ma mesüsi pi kecca ghena kekinyi sa lethu tsüna amesü ghala nyelela asüpon nyu ghojünkeya mangla nkemi saben. 2Anyi tsüwa na ma kwen chang pi asahang miwi chi nu tsüpi Apvüwa ketenpen Nithsüjjen kedulen wi pathi ben. Aaron nyi keqhaikedithu na ajjü tsüpi kekinyipen ccügwen mejü wi keghü chi, 3nu asahang sa hathu pila atsse pi Apvüwa kekinyi sala khuchi: ma pvüsheng kethu tsüdi, 4ma megen ma miwi kethu kebenthu, nu ma mechen kemehai ntsa. 5Keqhaikedithu na ha tsüdi pi mecang pi kekinyi gweghe kekinyipen miwi mecang ben. Apvüwa na atsse pi kekinyi hawa han nenden.
6Keujüla khaghaneni nyelela aneni pi kecca ghena kekinyi sa lethu asüpon nyelela aghala lela saya mehai, isala nyu ghojünkeya mangla nkemi nsathu yishü. 7Keujüla anyi kesü khaghaneni khuchithu, 8ma kwen chang pi asahang li miwi chi nu Nithsüjjen tuwi na tsü pathi ben. Keqhaikedithu na ma jjü tsüpi kekinyipen ccügwen mejü tsüdi wi keghü chiben, 9nu asahang sa hathu pila atsse pi Apvüwa kekinyi sala khuchi: ma kethu, ma ghanu-kisü, ma kanku ghatsan kethu tsüdi, ma pvüsheng wi kethu tsüdi, 10ma megen nu ma miwi kethu kebenthu, nu ma mechen kemehai ntsa. 11Keqhaikedi kekuli sa kebenwa na ha tsüdi pila atsse pi Apvüwa kekinyi sala pi kekinyipen miwi mecang ben.
12Keujüla anyi kesü aneni khuchithu, 13ma kwen chang pi asahang li miwi chi nu Nithsüjjen tuwi na tsü pathi ben. Keqhaikedithu na ma jjü pi kekinyipen ccügwen mejü tsüdi wi keghü chiben, 14nu ma sa hathu pila atsse pi kekinyi sala pi Apvüwa cüben; ma pvüsheng wi ma kethu tsüdi, 15ma megen nu ma miwi kethu kebenthu, nu ma mechen kemehai ntsa. 16Keqhaikediwa na ha maben pi kekinyipen miwi mecang nu atsse pi kekinyi sala Apvüwa kenen saben. Ma pvüsheng kethu tsüdila Apvüwa ji. 17Israel nyithu na ma pvüsheng kethu nyelela ajjü dsakeya nmi; hawa ha ayen, Israel nyithu tsüdi kahe wi hang lela anuphanla ha nieben.
Iliyochaguliwa sasa
LEVIYEN 3: RENGNBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.