Ngeera 17
17
1Kudya ki̱dooli̱ okabba na b̯u̱si̱nge,
kikukira nnyu̱mba gilimwo kwegonza neizongobo.
2Mwiru mwekambi̱, alema mwana mugwagwa,
kandi agweterwa bintu nkomwei̱ hali baana ba mu nnyu̱mba.
3Feeza na zaabbu bi̱pi̱mwa mworo,
bei̱tu̱ Mukama api̱ma biteekerezu bya mitima.
4Nkori̱ gya bibii gyetegeerya rugambu lwa babiibi,
mu̱gobya ahondera b̯u̱gobya.
5Adu̱u̱li̱ra munaku abba naakugaya munyakumuhanga,
anyu̱mi̱rwa b̯ujune b̯wa wondi takena kufubirwa.
6Bagu̱lu̱u̱su̱ benyumiriza mu beizukulu baab̯u
na baana nibenyumiriza mu babyeru̱ baab̯u.
7Kubaza bya magezi̱ tikigasira mudoma,
naakubaza b̯u̱gobya ti̱ki̱semereeri̱ mu̱lemi̱.
8Bantu bateekerereza mu̱kwegu̱li̱ri̱i̱rya bawona byensei̱ nibikusoboka,
bagu̱mya nti, kwegu̱li̱ri̱i̱rya kukora nka lu̱gi̱sa.
9Atoolya kunywana aganyira bamu̱sobereerye,
bei̱tu̱ eicala naabaza nsobi̱ ei̱ta mukagu.
10Mu̱gezi̱ baamulamba lu̱mwei̱ naakenga,
bei̱tu̱ mudoma naab̯ubakuuta njunju ki̱ku̱mi̱ tahab̯uka.
11Muntu mubiibi eicala natekereza b̯wemi̱ b̯usa,
akwatwa batumwa batali na mbabazi̱ nayo.
12Hakiri orombya ntali gi̱basengereeri̱ b̯wana b̯wagyo,
kukira ku̱rombya mudoma akukora byab̯udoma.
13B̯wokora kubiibi muntu akukukoora birungi,
bizib̯u tibilimalika mwamu.
14Kutara b̯ulemu kiisana kwijuura mu̱hwi̱ gwa meezi̱,
kale nu b̯wehale izongobo li̱takatandi̱ki̱ri̱.
15Kufubira atali na musangu nookaganyira mubiibi,
byensei̱ bya muziro hali Mukama.
16Sente za mudoma asasula kusoma tizili na kizimugasira,
hab̯wa b̯utetegereza b̯wamwe.
17Mukagu gubba mukagu b̯wi̱re b̯wensei̱,
kandi baluganda beelinda b̯wi̱re b̯wa b̯ujune.
18B̯udoma b̯ukutuma kusasula ibanza lya wondi,
na kuhayo b̯wema hab̯wa mu̱taahi̱.
19Akwendya b̯ubii atoolya wakuzongoba nayo,
atoolya myehembu yeeletera b̯ujune.
20Ateekereza mu kukora kubiibi tatunga mu̱gi̱sa,
kalimi kabaza b̯u̱gobya keicala mu b̯ujune.
21Mwana mudoma akwati̱sya babyeru̱ b̯ujune,
kandi tibalibba na kusemererwa kwensei̱.
22Kwicala osemereerwe guli mu̱bazi̱ gu̱ku̱honi̱a,
bei̱tu̱ kandi kuzingala kwanu̱kya wanu̱kya.
23Mu̱ramu̱ri̱ mubiibi eikiriza ngu̱zi̱ mu kyebi̱si̱i̱re,
aleke atasala musangu mu b̯winganiza.
24Mu̱gezi̱ ategeka bya magezi̱,
bei̱tu̱ mudoma akwata kiki na ki̱di̱.
25Mwana mudoma asaliiza bbaawe,
kandi ali̱rya mmaawe.
26Ti̱ki̱doori̱ ku̱li̱hi̱sya atali na musangu,
na kukuuta bakora birungi.
27Mu̱gezi̱ abaza bi̱dooli̱,
naakwetegereza akwata mpula.
28Mudoma b̯u̱yetekeera bamweta mu̱gezi̱,
b̯wabbumba mu̱nwa azooka nka ali na kwetegereza.
Iliyochaguliwa sasa
Ngeera 17: LUGUNGU
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2025, Wycliffe Bible Translators, Inc. All rights reserved.