Romanos 16
16
Pablo nixje̱he̱ ti sin chóxin
1Tétua̱hanra tsjínki̱tsara ti tjan kíchóni Febe ichꞌe tjan ixra̱ ni̱nko chjasin Cencrea. 2Nkojína nixjehéra tjan kjuachaxíen ihni̱é Ìnchéni éxi jína nixjehéra íso ti sin kíchóni tinkáchónki Ìnchéni. Tsjínki̱tsara tjan ti ichrén nkehe tichánxi̱hin tjan kixin jehe tjan kja̱xin kjuínki̱tsa tjan itsjé chojni la kja̱xin kjuínki̱tsa tjan ti janhan.
3 #
Hch. 18:2. *Nixjehéra tjan Priscila la ko chꞌin Aquila. Jehe sin nkoko̱a kjuíchꞌekoni sin ixra̱ kixin kja̱xin sin chꞌehe sin ixra̱ Cristo. 4Jehe sin la kjónté chrókꞌuen sin la kjuínki̱tsa sin ti janhan, mé xi̱kaha tja̱ha sin kjuasáya la jehya janhuán, kja̱xin kaín ti sin kíchóni jehya judío tjejó ti ni̱nko. 5Kja̱xin nixjehéra kaín ti sin kíchóni tóchjina ndo̱e tjan Priscila la ko chꞌin Aquila. Nixjehéra ti chꞌin chóxini, Epeneto, jehe chꞌan la sa̱o chꞌan kuitekaon chꞌan Cristo ti chjasin Acaya. 6Nixjehéra tjan María kixin kja̱xin tjan kjuíchꞌe tjan ixra̱ ti tjejora. 7Kja̱xin nixjehéra ti sin tsíkji̱xi̱n chjaséni, ti chꞌin Andrónico la ko chꞌin Junias, kixin ti kjuakéchji̱na ndo̱echjiso la kja̱xin sin kꞌuejóchjina sin. Kja̱xin kaín ti íso sin apóstol la tjikosáyehe sin ti sin a kixin jehe sin la sa̱o sin kuitekaon sin Cristo, a̱ndá chrꞌéxi̱n janhan.
8Nixjehéra chꞌin Amplias kixin jehe chꞌan mé ijnko nkexro choxián la ko tjua̱ha̱ kixin tinkáchónki chꞌan Ìnchéni. 9Nixjehéra chꞌin Urbano kixin nkoko̱a kjui̱tꞌakian chꞌan ixra̱ kuènté Jesucristo la ko nixjehéra ti chꞌin choxián, Estaquis. 10Nixjehéra chꞌin Apeles. Jehe chꞌan la nchónhña nkehe kóhen kjuasóte chꞌan kixin titekaon chꞌan Cristo. Kja̱xin nixjehéra ti sin ndo̱e chꞌin Aristóbulo. 11Kja̱xin nixjehéra ti chꞌin Herodión kui̱xi̱n chjaséni la ko kja̱xin nixjehéra kaín ti sin ndo̱e chꞌin Narciso kixin kja̱xin sin tinkáchónki sin Ìnchéni. 12Nixjehéra tjan Trifena la ko tjan Trifosa. Kja̱xin jehe sin kjuíchꞌe sin ixra̱ kuènté Ìnchéni la ko nixjehéra kja̱xin ti tjan kíchóni Pérsida. Kja̱xin tjan imá kjuíchꞌe tjan ixra̱ kuènté Ìnchéni. 13#Mr. 15:21.*Kja̱xin nixjehéra chꞌin Rufo, ijnko chojni tsíkjeyá Ìnchéni, la ko nixjehéra ti ìñé chꞌan kixin kja̱xin tjan kjuínki̱tsa tjan ti janhan éxi na̱ná tꞌíkua̱n ti jehe tjan. 14Kja̱xin nixjehéra chꞌin Asincrito, chꞌin Flegonte, chꞌin Hermas, chꞌin Patrobas la chꞌin Hermes la ko ti íso sin kíchóni tjejó ntiha. 15Nixjehéra kja̱xin chꞌin Filólogo, tjan Julia, chꞌin Nereo la ko ti tjan kícho chꞌan, la ko chꞌin Olimpas la ko kaín ti sin kíchóni tinkáchónki Ìnchéni tjejó sin ntiha.
16Kja̱xin nixje̱hé kichuara nkojína kjuachaxin ihni̱é Ìnchéni. Kaín ti sin ni̱nko kuènté Cristo ntihi xráxinkaon sin ti jahara.
17Kíchóni, xrja̱noáhára kixin chrókóxakohanra kixin ti sin tjixronkáxin chrókꞌóxika ti sin nkoko̱a tinkáchónki Ìnchéni. Jehe sin la titekakonhña sin ti itén Díos kꞌuitjára. Méxra̱ ti̱to̱héra ti sin a. 18Ti nkexro xi̱kaha nduáhya ichꞌe la jehya Ìnchéni Jesucristo chꞌehe sin ixra̱. Náhí. Jehí tjinkaon sin tjixronkáxin sin la nixja sin ti nkehe náxrjón nchechèxín chojni la xi̱kaha chꞌiyehe sin ti chojni na̱xa̱ noehña. 19Kaín chojni ó nohe kixin jahara la ó kuitekáonra Ìnchéni. Mé xi̱kaha chàna la tjínka̱oan kixin chrókóxakohanra chrókjui̱chꞌera ti ixra̱ jína. Jehya kixin chrókjui̱chꞌera ijnko nkehe nduáhya. 20Ti Díos tjajon kjuaxróxin mé tjoka tsinkátja ti Jínahña, la ndá ti Jínahña í tsjachahya tsꞌe̱tue̱hen ti jahara. Méxra̱ Ìnchéni Jesucristo mé sintañaora chꞌan.
21 #
Hch. 16:1. *Chꞌin Timoteo nixjahára chꞌan. Jehe chꞌan nkokón chꞌekoni chꞌan ixra̱. La kja̱xin chꞌin Lucio, chꞌin Jasón la ko chꞌin Sosípater, ti sin chjaséni, mé nixjahára sin.
22Janhan Tercio tjékjian ti xroon i la kja̱xin nixjahára kjuachaxin kuènté Ìnchéni.
23 #
Hch. 19:29; 1Co. 1:14;
2Ti. 4:20. *Chꞌin Gayo nixjahára chꞌan. Jehe chꞌan kjuajon chꞌan kjuachaxin kjua̱kꞌé ndo̱e chꞌan ti tónkotsé ti sin kuènté ni̱nko. La ko nixjahára chꞌin Erasto. Jehe chꞌan mé tesorero kuènté chjasin la ko ti chꞌin kíchóni Cuarto, kja̱xin nixjahára chꞌan.
24Kjuachaxíen ihni̱é Ìnchéni Jesucristo mé sintañaora chꞌan kaínra. Mé xi̱kaha tso̱hen.
25Ndá ijie tsochjéheni kjuasáya Díos kixin jehe chꞌan tjinki̱tsa chꞌan kixin jína chrókꞌuejora éxi chrónka ti itan jína tsaáxini la ko ti itan kuènté Jesucristo. Tíha mé chaxín chrónka éxi Díos kjuínchenohe ti janhan ti nkehe ninkexró kꞌuénoehña ndesi ti kꞌóna chjasintajni. 26A̱ndá ijie kaíni noheni nkexrín nixja ti xroon tsíkjin ti sin profeta kixin nkexrín kꞌue̱to̱an Díos itjen nkochríxín. Ndá kaín nkehe kꞌuénoehña ninkexró, a̱ndá ijie tsochóxin kuenté chjasintajni kixin chrókuinkáchónki sin la ko chrókuitekaon sin Díos.
27Itjen nkoko̱a Díos la jehó chꞌan mé imá nohe chꞌan la jehó chꞌan mé tjanchatóxixíni kjuasáya kixin Ìnchéni Jesucristo mé itjen nkochríxín. Mé xi̱kaha tso̱hen. Ó tjen.
Iliyochaguliwa sasa
Romanos 16: poeNTplus
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.
