Colosenses 4
4
1 #
Ef. 6:9. *Jahara lamo, chrókójínara la ko nkojína chrókuétue̱hénra ti sin tꞌahara ixra̱. Chroxraxinkáonra kixin kja̱xinra chontara ijnko lamo mé Ìnchéni itjen nkaya nka̱jní.
2Chrokui̱to̱éhyara nixjehéra Díos la ko nkochríxín chróchje̱héra chꞌan kjuasáya. 3Kja̱xin tjanchehéra Díos tsjinki̱tsa ti jeheni kixin tsjajon Ìnchéni kjuachaxin tsochronkaxíni ti nkehe kuènté Cristo kꞌuénoehña chojni. Ti ixra̱ i mé tjéchji̱naxián. 4Tsjanchehéra Díos kixin tsjajon chꞌan kjuachaxin kixin jína chrókjuàkua éxi tóxríhi̱n Ìnchéni.
5 #
Ef. 5:16. *A̱ndá jahara la jína chrókjuáko̱xinra ti tjejó ti sin na̱xa̱ tinkáchónkihya Ìnchéni, la chrókjui̱nchekꞌitjáñahñara ti tiempo, kixin kja̱xin jehe sin chrókuihin sin ti itan jína. 6Nkochríxín chróchontara kjuasàya ti ó nixjehéra sin kixin chrókóxríhi̱n sin tsihin sin, la chrókónohara jína nkexrín chrókjuáte̱héra ti nkehe tjanchankí nkojnko chojni.
Kjuixin nixja Pablo
7 #
Hch. 20:4; 2Ti. 4:12. #
Ef. 6:21, 22. *Kíchóni Tíquico, mé ijnko nkexro jína choxián la tjinki̱tsa ti janhan la ko chꞌehe Ìnchéni ixra̱, mé tsjiji tsochronka nkexrín itjén janhan. 8Méxra̱ kuétua̱ha̱n chꞌan tsjiji chꞌan ti tjejora kixin tso̱nohara kixin nkexrín tjejóni kixin xi̱kaha sinchechéhe̱ chꞌan ti jahara. 9#Flm. 1:10-12.*Kja̱xin tsochrꞌan chꞌin Onésimo, ijnko kíchóni tjue̱heni, la jína chꞌehe chꞌan ixra̱ Ìnchéni, la kja̱xin chꞌan ijnko ti sin chjasánra. Jehe sin tsjijitsjehe sin ti jahara la ko tsochronka sin kaín ti nkehe sítóhen ti tjejóni ntihi.
10 #
Hch. 19:29; 27:2; Flm. 1:24;
Hch. 12:12, 25; 13:13; 15:37-39. *Chꞌin Aristarco, mé nkoko̱a kꞌuejóchjinakian ndo̱echjiso, mé nixjahára chꞌan, la ko kja̱xin chꞌin Marcos, ti nkexro na̱xa̱ kjéhya chꞌin Bernabé. Ó kjoni senó kixin ti chrókjuíjitsjehe ti chꞌin Marcos ti jahara la chrókjuájonra kjuachaxin jína tsjakꞌe chꞌan ntiha. 11Kja̱xin nixjahára chꞌin Jesús, kja̱xin itꞌin Justo. A̱ndá jehó ti sin a, mé sin judío tinkáchónki Ìnchéni tjinki̱tsa ti ixra̱ tjétꞌa̱, la chrónkaxín sin kuènté ti kjuachaxin kuènté Díos. La ti sin a mé imá kjuínchechàna sin. 12#Col. 1:7; Flm. 1:23.*Chꞌin Epafras nixjahára; jehe chꞌan chꞌehe chꞌan ixra̱ Cristo la jehe chꞌan mé ijnko chojni chjasánra. Nkochríxín chrónoéhe̱ chꞌan Díos kixin tjinkaon chꞌan kixin ndoá chrókꞌuejora, chrókjui̱nchexiteyára éxi tjinkaon Díos. 13Janhan mé kꞌuíko̱nxin ikua̱n kixin chꞌin Epafras la imá tóxakohen chꞌan kixin ti jahara la ko ti sin tjejó ti chjasin Laodicea la ko Hierápolis. 14#2Ti. 4:11; Flm. 1:24; 2Ti. 4:10; Flm. 1:24.*Chꞌin Lucas, ti nkexro chꞌéna xro̱a̱n, tjua̱ha̱, la kja̱xin nixjahára chꞌan la ko kja̱xin chꞌin Demas.
15Nixjehéra ti sin kíchóni tjejó chjasin Laodicea, la kja̱xin nixjehéra tjan Ninfas la ko ti sin tónkotsé ndo̱e tjan. 16Ti ó tsjixin si̱nchekuáxinra ti xroon i la ichrꞌanra sátsji sinchekuáxin ti sin tjejó ni̱nko itjen Laodicea, la ko kja̱xin jína si̱nchekuáxinra ti xroon chrꞌa̱ha̱n sin ti ó tsjiji ti tjejora. 17#Flm. 1:2.*Kja̱xin tétue̱hénra chꞌin Arquipo kixin jína chrókjuinchexiteyá chꞌan ti ixra̱ tsíkjajon Ìnchéni sichꞌe chꞌan.
18Janhan Pablo tjaná kji̱nxian tíhi la nixjahára. Chroxraxinkáonra kixin janhan la tjéchji̱na. Díos sintañaora kaínra. Ótjen.
Iliyochaguliwa sasa
Colosenses 4: poeNTplus
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.