Colosenses 2
2
1Tjínka̱oan chrókónohara kixin nchónhña ixra̱ kjui̱tꞌa kixin chrókjuinki̱tsa ti jahara la ko kja̱xin ti sin tjejó chjasin Laodicea la ko kaín ti íso sin na̱xa̱ tꞌikonhña ti janhan. 2Tjínka̱oan kixin jehe sin chrókóchéhe̱ a̱sén sin la ko nkoko̱a chrókjuénka̱yáxin sin, chrótjue̱hé sin kícho sin. Mé xi̱kaha chrókꞌuánkí ti kjuaxrexinkaon kuènté sin la ko chrókienxín sin jína kixin chrókónohe sin ti nkehe ninkexró kꞌuénoehña kuènté Itꞌéni Díos, mé Cristo tíha. 3Cristo mé tja̱ko̱xi̱n kaín ti nkehe tjete símá, tíha mé kaín ti kjuaxrexinkaon jína la ko kaín nkehe nohe Díos. 4Kaín tíha xrja̱nkaxián kixin ninkexró chrókjuitꞌayahyara kixin ti náxrjón nixja sin ó. 5Kjónté tjénhña ti tjejora, la ti ncha̱kuená la itjen ntiha kixin xráxinka̱oan ti jahara, la chéhe̱ a̱sená kixin jína tjejora, na̱xa̱ tinkachónkira Cristo.
6Mé xi̱kaha éxi kuitekáonra Ìnchéni Jesucristo, la xi̱kaha chrókꞌuejoko̱ara chꞌan. 7Éxi ijnko inta ni̱nka tsíkji nuèé xi̱kaha chrókꞌuejora, chrókjuinkíhyara ti nkehe kuihínra, mé xi̱kaha chrókuinkachónkira Jesucristo éxi xráko̱hara, la ko chróchje̱héra Díos kjuasáya nkochríxín.
Cristo mé ti nti̱a ni̱xin
8Méxra̱ chrókui̱to̱éhyara kixin ninkexró chrókjuitꞌayahara kixin ti nkehe nduáhya chrókjuako sin. Náhí. Ti sin a la tjako ti nkehe tjenka̱yáxin chojni chjasintajni ó, a̱ndá tjakohya sin ti nkehe tjinkaon Cristo.
9Kaín kjuachaxin chónta Díos mé chónta Cristo; 10jehe chꞌan tꞌe̱tue̱hen chꞌan kaín kjuachaxin siín nkaya nka̱jní la ko chjasintajni. Méxra̱ jahara mé chontara kaín kjuachaxin kuènté Díos kixin ó tinkachónkira Cristo. 11Kja̱xin ti ó kjuankíxinra tinkachónkira Cristo, la jehe chꞌan kjuíntakára chꞌan ijnko xro̱ye, kjánchó ti xro̱ye la jehya itja chojni kuénxín tíha. Náhí. Kjuakjìin chꞌan ti ijie̱ kꞌuékóxríhanra, mé tíha mé ti xro̱ye tjáhara chꞌan. 12#Ro. 6:4.*Jahara ti ó kuíki̱tera la éxi xravákoara Cristo. Ndá kja̱xin xechónkoara chꞌan kixin kuitekáonra ti kjuachaxin kuènté ti Díos kjuínchexechón Cristo. 13#Ef. 2:1-5.*Jahara ósé la éxi tsíkꞌenra xi̱kaha kuékꞌejora, kixin ti ijie̱ kꞌuéchontara la ko ti chontahyara xro̱ye kuènté ti sin judío. A̱ndá ijie la ó xechónkoara Cristo kixin kjuìin ti ijie̱ kꞌuéchontara. 14#Ef. 2:15.*Méxra̱ Díos la kꞌóxika kaín ti nkehe tsíkꞌitoan ósé kjuachahya chojni kjuínchenchexiteyá, la ko kjua̱tse̱n chꞌan kaín ti ijie̱ kꞌuéchóntani kixin Cristo kjuákꞌenkáni ti ntacruz. 15Mé Cristo kꞌuénxin ti ntacruz ndá xi̱kaha kuakitsjehe chꞌan ti Jínahña kaín ti kjuachaxin kꞌuéchónta, la kjuínchekósuéhe̱ chꞌan ti Jínahña kꞌuíkon kaín chojni, la xi̱kaha kjua̱ko̱xi̱n chꞌan kixin jehe chꞌan chónta chꞌan ti kjuachaxin ti kjuákꞌenkáni chꞌan ti ntacruz.
Tjéyára ti nkehe siín nkaya nka̱jní
16 #
Ro. 14:1-6. *Méxra̱ ninkexró chrókꞌuántaxiánhñara kixin ti nkehe chrókjontera o̱ ti nkehe chrókꞌuira o̱ ti chrókjuíkosáyehéra ti ña̱o kia o̱ ti nitjó ni̱xin o̱ ti ña̱o to̱kꞌéhe chojni. 17Kaín ti nkehe a la éxi ijnko itsꞌuan tóyóhó ti nkehe itsi. A̱ndá ti nkehe chaxín la Cristo tíha. 18Méxra̱ chrókui̱to̱éhyara chrókjuitꞌayahara ti sin ndáchro kixin imá jína sin la ko tjikosáyehe sin ti sin ángel. Ti sin a mé chrónkaxín sin nkehe noehña sin, la nchenkexín sin ti nkehe tjenka̱yáxin sin kuènté chjasintajni ó. 19#Ef. 4:16.*A̱ndá jehe sin la chaxínhña tinkáchónki sin Cristo, ti ikja ti ni̱nko. Cristo mé tꞌayakohen ti ni̱nko la ko nchekꞌánkí ti kjuaxrexinkaon kuènté ti chojni tinkáchónki ti jehe chꞌan éxi tjinkaon Díos xi̱kaha.
20A̱ndá jahara la ó kꞌuénkoara Cristo la ó kui̱to̱héra ti nkehe tjenka̱yáxin chojni ó. ¿A̱ndá nkekuènté na̱xa̱ tjejora éxi ti chojni siín chjasintajni, chrókjui̱nchexiteyára ti nkehe tꞌe̱to̱an sin? 21Tꞌe̱to̱an sin kixin jahara chrókuákóxi̱nhñara tíha, la chrókjontehyara nkojín nkehe la ko chrótséxinhñara nkehe. 22Kaín ti nkehe tꞌe̱to̱an sin mé nixja kuènté ti nkehe tsjeje̱, la tíha mé ijnko nkehe tjenka̱yáxin chojni ó. 23Ti nkehe tinkáchónki ti sin a la tꞌikon chojni éxi ijnko nkehe chaxín kixin nchenkehya sin la ko nchekjasóte sin cuerpo kuènté sin, kjánchó chónkó tinkáchónki sin xi̱kaha, kixin tíha chóntahya kjuachaxin tsjinki̱tsa tsíto̱he sin ti nkehe jínahña tjenka̱yáxin sin.
Iliyochaguliwa sasa
Colosenses 2: poeNTplus
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.