Colosenses 1
1
Pablo nixje̱he̱ ti sin ni̱nko Colosas
1Janhan, Pablo, tsíkjéyána Jesucristo tꞌa̱ha̱ chꞌan ixra̱ kixin xi̱kaha tjinkaon Díos, la ko kíchóni, Timoteo 2mé ikjian ti xroon i kixin chrókꞌuayéhéra jahara kíchóni tinkáchónki Cristo, tjejora chjasin Colosas, tsíkꞌónara chojni titekáonra Díos. Itꞌéni Díos la ko Ìnchéni Jesucristo sintañaora la ko tso̱tjáhara kjuaxróxin.
Pablo nixje̱he̱ Díos kixin kaín ti sin tinkáchónki Ìnchéni
3Nkochríxín nixje̱he̱ni Díos, Itꞌé Ìnchéni Jesucristo, kixin ti jahara, la ko chjéheni Díos kjuasàya 4kixin ó kuíhini kixin jína tinkachónkira Ìnchéni Jesucristo la ko tjue̱héra kaín ti sin tinkáchónki Díos. 5Mé xi̱kaha tjejocho̱hénra kixin tsꞌayéhéra ti nkehe chóntehe Díos itjen nkaya nka̱jní. Jahara la xi̱kaha tjejocho̱hénra kixin kuihínra ti itan chaxín kuènté Díos tsaáxini. 6Ti itan kuihínra la mé tjejótihin chojni kuenté chjasintajni la ó tinkákꞌánkí ti itan la tꞌikonra ti kjuachaxin tjajon Díos. Mé xi̱kaha kóhen ti ó kuihínra la ko kuitekáonra kixin chaxín tjua̱hára Díos. 7#Col. 4:12; Flm. 1:23.*Tíhi mé kjua̱ko̱hara kíchóni Epafras. Jehe chꞌan la nkoko̱a kjuíchꞌekoni ixra̱, ndá ijie tjetjinki̱tsa chꞌan ti jahara la jína ichꞌe chꞌan ti ixra̱ kuènté Cristo. 8Jehe chꞌan mé ikui chꞌan ntihi la chrónka chꞌan kixin nkexrín tjue̱héra kichuara kixin Ncha̱kuén Díos tjetjinki̱tsa ti jahara.
9Méxra̱ ndesi ti ña̱o kuíhini nkexrín tjejora, la títo̱ehyani tjancheheni Díos kixin tsjinki̱tsa ti jahara kixin tso̱nohara jína nkexrín tóxríhi̱n chꞌan la ko tsiénxinra kaín kjuaxrexinkaon jína kuènté Ncha̱kuén Díos. 10Ndá xi̱kaha jína chrókjuáko̱xinra la chrókꞌuejora éxi tóxríhi̱n Ìnchéni la chrókjui̱chꞌera ixra̱ jína kuènté chꞌan la ko a̱ntsí chrókónohara nkexrín itjen Díos. 11Tjanchiani kixin Díos chrókjuinki̱tsa ti jahara kixin ti kjuachaxin ijié kuènté chꞌan kixin chrókjuachara jína chrókꞌuejora la ko chrókócháhara kjónté chrókui ichrén kjuaxróxinhña. 12Méxra̱ chrókócháhara la chróchje̱héra kjuasáya Itꞌéni Díos kixin kjuajon chꞌan kjuachaxin kixin tsꞌáyéhe̱ni ti nkehe náxrjón itjen ti tꞌe̱to̱an chꞌan ti tꞌinkaséña, ti nkehe tsꞌáyéhe̱ kaín ti sin tinkáchónki Díos. 13Díos mé kuakitsjekjanxíni ti sítie la kjuajon chꞌan kjuachaxin tsꞌejóni ti tꞌe̱to̱an ti Xje̱en chꞌan, imá tjue̱he chꞌan. 14#Ef. 1:7.*Ti Xje̱en chꞌan mé kꞌuenyákohe̱n ti jeheni la kjuínchekaá ti jeheni, ti ijni̱é chꞌan mé kótjuáxin ti iji̱éni.
Cristo kꞌuenyákohe̱n ti jeheni
15Cristo, ti Xje̱en Díos mé kjua̱ko̱xi̱n nkexrín itjen ti Itꞌé chꞌan, ti nkexro xitjahya tꞌikoni, la ko Cristo mé ó xráxín itjen chꞌan ti na̱xa̱ kꞌónahña chjasintajni.
16Kjuachaxíen Díos la kjuíchꞌénaxín chꞌan kaín ti nkehe siín nka̱jní la ko chjasintajni, la ko kaín ti nkehe na̱xa̱ tꞌikonhñani la ko ti nkehe ó tꞌikoni. Kja̱xin kaín ti nkexro tꞌe̱to̱an la kaín nkehe chónta kjuachaxin la ko kaín kjuachaxin siín nkaya nka̱jní mé kaín tíha kjuíchꞌéna Cristo la kaín tíha kuènté chꞌan. 17Cristo la ó xráxín itjen, kjónté na̱xa̱ kohya ninkehó, la jehe chꞌan tꞌayakohen chꞌan kaín ti nkehe siín kixin chónta chꞌan kaín kjuachaxin. 18#Ef. 1:22, 23.*Cristo mé ti ikja ti cuerpo, mé tíha la ti ni̱nko. Jehe chꞌan mé sa̱oxín xechón chꞌan kixin a̱ntsí tsochónta chꞌan kjuachaxin tsꞌe̱tue̱hen chꞌan kaín nkehe. 19Mé xi̱kaha Díos la kóxríhi̱n kixin ti Xje̱en chꞌan tsochónta kaín kjuachaxin. 20#Ef. 2:16.*Kja̱xin tjinkaon Díos kixin kjuachaxíen Cristo chrókꞌuixin kjuaxróxin nkuíxín, nkaya nka̱jní la ko chjasintajni. Mé kjuasin Cristo kjuaxróxin kixin kjuákꞌenkáni chꞌan ntacruz, ikꞌuén chꞌan.
21Jahara la ti ósé kꞌuéchonhñara Díos, la kꞌuéninkákohénra chꞌan kixin ti nkehe jínahña kꞌuékjenka̱yáxin a̱sánra. A̱ndá ijie la, kjuasáye Díos, kjuajon kjuachaxin kixin kjuaxróxin tjejokoara chꞌan kixin tinkachónkira chꞌan. 22Kixin Cristo mé kꞌuényáka̱hanra, kjuasóte ti cuerpoé chꞌan. Mé xi̱kaha kóhen kixin Cristo tsjajon ti jahara tsꞌáyéhe̱ Díos kixin tsíkjinchetjóá chꞌan ti jahara la í chróchontahyara ninkehó ijie̱. 23Mé xi̱kaha chrókui̱to̱éhyara chrókuinkachónkira Ìnchéni. Chrokꞌuejora éxi ijnko inta ni̱nka tsíkji nuèé, la ko chrókui̱to̱éhyara ti nkehe jína tꞌejocho̱hénra. Tíhi mé chronka ti itan tsaáxin kuihínra, la ko ti itan i mé chrókuihin kaín chojni kuenté chjasintajni, la janhan Pablo kja̱xin xrja̱nkaxián ti itan i.
Pablo ichꞌe ixra̱ kuènté ni̱nko
24A̱ndá ijie, kjónté tjasótexíni kixin ti jahara, la chéhe̱ni kixin xi̱kaha tsjintaxín tjasótia janhan kixin na̱xa̱ tꞌitjáña chrókjuasóte Cristo, mé kjuasóteyákohe̱n ti ni̱nko mé ti cuerpoé chꞌan. 25Mé xi̱kaha Díos kjueyána kixin si̱tꞌa ixra̱ kuènté ni̱nko, kixin jína chrókꞌuejora kixin xrja̱nkaxián ti itan jína kuènté Díos. 26Ti itan i la ósé ninkexró kꞌuénoehña, a̱ndá ijie kjuínchenohe Díos kaín ti sin tinkáchónki ti jehe chꞌan. 27Díos mé tjinkaon sinchenohe kaín chojni ti nkehe tjete kꞌuénoehña sin senó, kixin Cristo mé tjejokoara la tjajon chꞌan kjuachaxin tsꞌejocho̱nhénra tsꞌayéhéra ti kjuachaxin ijié kuènté chꞌan.
28Jeheni mé chrónkaxíni nkehe kuènté Cristo, la nchexraxinkaoni kaín chojni la ko tja̱ko̱xi̱ni kaín kjuaxrexinkaon kixin chrókienxín sin jína. Ndá xi̱kaha nkojnko chojni chrókꞌuánkí ti kjuaxrexinkaon kuènté sin kixin ndoá chrókꞌuejó sin kixin tsꞌejóko sin Cristo. 29Mé xi̱kaha janhan itꞌa̱ ti ixra̱ kixin kaín ti kjuachaxin kjuajon Cristo.
Iliyochaguliwa sasa
Colosenses 1: poeNTplus
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.