Hechos 26
26
Pablo chenka ti rey Agripa nke ijie̱ tꞌeka sin
1Ndá ti Rey Agripa ndáche ti chꞌin Pablo:
―Ó ncho̱xon tso̱chro̱nka nkehe ti ijie̱ tíká.
Ndá chꞌin Pablo kjua̱ya̱ itja ndá kjuankíxin nixja, ndáchro:
2―Imá chàna tsoníxja ti itjen jaha rey Agripa, tso̱xrja̱nka kaín ti ijie̱ tꞌekana ti sin judío. 3Ó nona kixin jaha la ó noha jína kuènté ti ley la ko ti nkehe tinkáchónki ti sin judío, la ko noha nkehe ti ikjo kícho sin. Méxra̱ xrja̱noáha, tjakꞌe tihín.
Pablo chrónka nkexrín kjuákꞌe chꞌan ti ósé
4’Kaín ti sin judío la nohe nkexrín kjuakꞌé ti chjasená la ko Jerusalén ti na̱xa̱ kꞌuéchájan. 5#Hch. 23:6; Fil. 3:5.*Kja̱xin nohe sin jína, la ko jína tsochronka sin, kixin ndesi ntasoá la kꞌóna fariseo. Ti sin a la a̱ntsí nchexiteyá ti ley tinkáchónkini. 6Ndá ijie si̱nchekito̱exínra jie̱na kixin tjécho̱ha̱n kixin Díos sinchexechón ti chojni tsíkꞌen, éxi tsíchenka Díos ósé ti sin tsíkꞌaxrjeníxini. 7Ti teyó tribu kuènté Israel mé tjejóchóhen sin kixin tsoxiteyá ti nkehe tsíchronka Díos. Méxra̱ tjikosáyehe sin Díos ncha̱kotjin la ko tie. Méxra̱ tihín, jaha rey Agripa, kixin xi̱kaha tinkachónkia janhan, la xi̱kaha nínkakona ti sin judío ijie. 8¿Nkekuènté titekákonhñara kixin Díos sinchexechón ti chojni tsíkꞌen?
Pablo kꞌuénínkakohen ti sin tinkáchónki Ìnchéni
9 #
Hch. 8:3; 22:4, 5. *’Janhan kꞌuékjenka̱yáxian kixin ncho̱xon ti kꞌuéninka̱koha̱n ti sin tinkáchónki Jesús, tsíkji̱xi̱n Nazaret. 10Mé xi̱kaha kꞌuéninka̱koha̱n ti sin chjasin Jerusalén. Ti sin ncha̱tꞌá tꞌe̱to̱an mé kjuajon kjuachaxin ndá janhan chrꞌaxaha̱n ndo̱echjiso itsjé ti sin tinkáchónki Ìnchéni. Ndá ti ó tꞌóñá sin ti sin tjejóchjina, la janhan ndáxrja̱n kixin ncho̱xon tíha. 11Itsjé vece kjui̱ntakjasóte ti sin a, kixin chrókuíto̱he sin ti nkehe tinkáchónki sin. La xi̱kaha kꞌuékji̱tꞌa kaín ni̱nko kixin imá kꞌuéninka̱koha̱n sin, la xi̱kaha kꞌuájichráha̱ sin kjónté ókjé chjasin sátsíkji sin.
Pablo chrónka nkexrín kuinkáchónki Ìnchéni
(Hch. 9:1-19; 22:6-16)
12’Méxra̱ ti ixra̱ í, sákjui̱xi̱a̱n Damasco, kixin ti sin ncha̱tꞌá tꞌe̱to̱an mé kjuajon sin kjuachaxin kixin jína xi̱kaha si̱tꞌa. 13A̱ndá tihín jaha rey, kixin ti ó nko̱siñe nti̱a éxi chonkíxin la kꞌuíkua̱n ijnko xrohi tꞌinkaséña kui̱xi̱n nkaya nka̱jní, a̱ntsí tjáki̱ni ke ti xrohi kuènté ña̱o, la kua̱ntátjen ti janhan la ko ti sin sákjuiki̱a̱n. 14Ndá kaíni kꞌuitsínkani nonte, ndá kui̱ha̱n itén ijnko nkexro nixja̱xi̱n ngiva hebreo, Ndáchro: “Saulo, Saulo, ¿nkekuènté nínkaoan, xrítjéyá ti janhan? Jahuá ncheníhi a̱sán kixin tjinkaoan tsjajo̱nko̱a ti janhan. Éxi ijnko koxinta kónínkaon va ti chrꞌáte sin ti chika iyo, mé xi̱kaha ti jaha.” 15Ndá janhan kjuánchánkíha̱ ti nkexro: “¿Xá nkexro ti jaha?” Ndá ti nkexro la ndáchro: “Janhan mé Jesús, ti nkexro chréhé la ko ninkákohén. 16A̱ndá ijie tꞌínkatjen, tjakꞌexián to̱tá, kixin janhan kjuánjua kjuachaxin kꞌuikuan ti janhan kixin si̱chꞌe ti ixra̱ kuénta̱na. La tsochenka chojni kixin kꞌuikuan ti janhan la ko tso̱chro̱nka ti nkehe tsjákohá chrꞌéxi̱n. 17Janhan tsꞌayakohan kixin kohya nkehe sitꞌaha ti sin judío la ko ti sin jehya judío, kixin ijie tsétua̱nha̱n sátsjia ti tjejó sin. 18Tétua̱han sátsjia ti tjejó ti sin titekaonhña kixin tsakítje̱nkia ti ikon sin kixin í tsꞌajihya sin ti nti̱a sítie. Náhí, tsꞌaji sin ti nti̱a tꞌinkaséña la í tsochóntahya kjuachaxin ti jínahña tsꞌe̱tue̱hen ti jehe sin kixin tsinkáchónki sin ti janhan. Ndá janhan tsakjían ti iji̱é sin la ko tsꞌáyéhe̱ sin ti nkehe jína, tsꞌáyéhe̱ kaín ti sin tsíkjinchetjóá Díos”, ichro Ìnchéni.
Pablo kuitekaon ti nkehe kꞌuíkon
19’Rey Agripa, méxra̱ janhan kjui̱ntaxiteyáha̱ ti nkehe kꞌuíkua̱n kui̱xi̱n nkaya nka̱jní. 20#Hch. 9:20, 28, 29.*La kjuáko̱ha̱ sa̱o ti sin chjasin Damasco, la chrꞌéxi̱n ti sin Jerusalén, la ko kuenté Judea, la ko kja̱xin ti sin jehya judío. Kjuáko̱ha̱ sin kixin chrókuíto̱he sin ti iji̱é sin, la chrókjan sin chrókuinkáchónki sin Díos, la ko chrókjua̱ko̱xi̱n sin kixin chaxín ó kjuitóxi̱n sin ti nkehe tinkáchónki sin. 21Mé tíha ti tséxina ti sin judío nkaxehen ni̱nko, la tjinkaon sin chrókꞌóñá sin ti janhan. 22Ndá xi̱kaha kjuasáye Díos tjinki̱tsa ti janhan la ndoá itjén, la tjáko̱ha̱ kaín chojni, chájan la ko chojni nte̱to, la nixjahya nkehe ókjé, jehó nixja ti nkehe chrónka ti sin tsíchronka itén Díos la ko ti nkehe tsíchronka Moisés, 23#1Co. 15:20; Is. 42:6; 49:6.*kixin ticháxi̱n itsꞌen ti Cristo la ko tsoxechón ínaá. Cristo mé ti xrohi tsꞌinkaséñexín ti sin siín ntihi la ko ti sin siín íso nación kixin tsaá sin.
Pablo nixje̱he̱ ti rey Agripa
24Mé xi̱kaha chrónka chꞌin Pablo, ndá chꞌin Festo itsen kꞌóyako ndáchro chꞌan:
―Pablo, kjá locua. Tsíkólókoxián ti imá nchekuáxian.
25Kjánchó Pablo ndáchro:
―Náhí, jehya locona. Jaha Festo, imá tjikosáyahá. Ti nkehe ndáxrja̱n la ijnko nkehe jína la ko chaxín. 26Ntihi itjen ti rey Agripa. Jehe chꞌan la jína nohe chꞌan kaín tíhi. Ndá xi̱kaha tjénixja̱ha̱ chꞌan nkojína kixin nona kixin jehe chꞌan la ó nohe chꞌan kaín ti nkehe kóhen kixin jehya imó kóhen kaín tíha. 27Jaha, rey Agripa, ¿á titekaoan ti nkehe tsíkjako ti sin tsíchronka itén Díos ósé ní? Janhan la nona kixin titekaoan.
28Ndá ti rey Agripa ndáchro chꞌan:
―Ó a̱ntsíkoá ndá chrókjuacha chrókjui̱chꞌéna cristiano ti janhan.
29Ndá chꞌin Pablo ndáchro:
―Isé tso̱xrja̱nká o̱ séhya la Díos tjinkaon kixin jehya jahuá chrókuinkachónkia chꞌan. Náhí. Tjinkaon chꞌan kixin kaín ti nkexro tjejótihin chrókꞌóna sin éxi janhan, kjánchó jehya chróchónta sin ti cadena chonta.
30Ndá ti ó kjuixin nixja Pablo, la kꞌuínkatjen ti rey, la kja̱xin ti gobernador la ko ti tjan Berenice, la ko kaín ti chojni tjejótja̱xi̱n ntiha. 31Ndá kaín sin kꞌuaxrjenta sin la ikjo kícho sin. Ndáchro sin:
―Kohya ijie̱ tsíkjasin ti nkexro i, kixin chrókꞌuenxín chꞌan la o̱ chrókjuakꞌechjina chꞌan.
32Ndá ti rey Agripa ndáche ti gobernador Festo:
―Jína chrókjuánjua kjuachaxin sáchrokjui chꞌan ti chrókjuanchahya chꞌan kixin ti emperador, ti nkexro imá tꞌe̱to̱an, sinchekito̱exín ti iji̱é chꞌan ―ichro ti rey Agripa.
Iliyochaguliwa sasa
Hechos 26: poeNTplus
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.
