Hechos 25
25
Pablo kjuákꞌe nkayakon ti gobernador Festo
1Ndá Festo kjuíji kixin tsꞌáyéhe̱ ti ixra̱ gobernador. Ndá iní ña̱o chrꞌéxi̱n ndá sákjuixin chꞌan chjasin Cesarea la kjuíji chꞌan Jerusalén. 2Ndá ntiha ti sin ncha̱tꞌá tꞌe̱to̱an la ko ti sin judío imá tjetoan mé kjuanchia sin ijie̱ kixin tsjasóte Pablo, 3la kja̱xin kjuanchia sin kixin tsꞌe̱to̱an Festo kixin chrókja̱nka̱o sin chꞌin Pablo Jerusalén, kixin tsíkjenka̱yáxin sin tsochrꞌán sin iso chojni tsochóhen nti̱a la tsꞌóñá sin chꞌan. 4Kjánchó ti gobernador Festo la ndáchro kixin Cesarea ó tjechjina chꞌin Pablo, la ó jehe chꞌan itsji chꞌan ntiha, ichro chꞌan. 5La ndáchro chꞌan:
―Ti nkexro tjetoan kuèntára chrókjuiki̱an sin ti chjasin Cesarea. A̱ndá ti chaxín tsíkjasin chꞌin Pablo nkojín ijie̱, la ntiha tsjanchia sin ijie̱.
6Chꞌin Festo la kjuákꞌe Jerusalén ijní o̱ ite ña̱o ó ndá ikjan chꞌan chjasin Cesarea. Ndá ti ña̱o chrꞌéxi̱n, la kjuákꞌetja̱xi̱n chꞌan ti tꞌe̱to̱axín chꞌan, ndá kꞌue̱to̱an chꞌan tsíkákjín sin Pablo. 7Ndá ti ó kꞌuíxehen Pablo ntiha, ndá ti sin judío tsíki̱xi̱n Jerusalén kóchjina sin la kjuanchia sin ijie̱, kjánchó kjuachahya sin kjua̱ko̱xi̱n sin ti ijie̱ kjuanchia sin, kixin chaxínhña ti nkehe ndáchro sin. 8A̱ndá Pablo nixja, ndáchro:
―Ninkehó ijie̱ kjuásinhña, ninkexró kjuájo̱nki̱a̱nhña la ko jehya kuitekakua̱nhña ti ley o̱ ti ni̱nko o̱ ti gobernador romano.
9Kjánchó Festo tjinkaon kixin tso̱nínkakonhña ti sin judío, la kjuanchankíhi chꞌan ti chꞌin Pablo:
―¿Á tjinkaoan sátsjia Jerusalén kixin ntiha si̱ntaki̱to̱axian janhan ti ijie̱ chonta ní?
10Ndá Pablo ndáchro:
―Náhí, janhan la ó itjén ti tꞌe̱to̱axín ti gobierno romano, la ntihi chrókjui̱ncheki̱to̱exian ti ijie̱ kuénta̱na kixin ó noha kixin ninkehó ijie̱ kjui̱tꞌahya ti sin judío. 11Ti chaxín kjuásian nkojín ijie̱ kixin chrókꞌuenxian, la chrakonhña itsꞌén. A̱ndá ti chaxínhña ti ijie̱ tꞌekana sin, la ninkexró chóntahya kjuachaxin tsjanchia tíha. Méxra̱ janhan tjánchíá kixin ti emperador, ti nkexro imá tꞌe̱to̱an, mé sinchekito̱exín ti ijie̱ chonta ―ichro Pablo.
12Ndá Festo nixje̱he̱ iso ti sin tjinki̱tsa, ndá ndáche chꞌin Pablo:
―Jaha tjanchia kixin ti emperador, ti nkexro imá tꞌe̱to̱an, sinchekito̱exín ti iji̱á. Méxra̱ ti itjen ti nkexro a sátsjia ―ichro chꞌin Festo.
Pablo kjuákꞌe nkayakon ti rey Agripa
13Ndá iso ña̱o chrꞌéxi̱n mé ti rey Agripa la ko ti tjan Berenice mé kjuíji sin ti chjasin Cesarea kixin tsonixje̱he̱ sin Festo. 14Ndá ntiha kuíto̱he sin itsjé ña̱o, ndá Festo chénka ti rey kixin ntiha tjechjina Pablo, ndáchro chꞌan:
―Ntihi tjechjina ijnko nkexro tsíkíto̱he chꞌin Félix. 15Ti kjuakꞌé Jerusalén la ti sin ncha̱tꞌá tꞌe̱to̱an la ko ti sin tꞌe̱tue̱hen ti sin judío mé kjuíjitsjehe sin ti janhan, la kjuanchia sin ijie̱, kjuanchia sin kixin chrókꞌuen chꞌan. 16Ndá janhan kjuáta̱ha̱: “Jeheni chojni tꞌe̱to̱an kuènté Roma kuènhñani tꞌe̱to̱ani itsꞌen chojni ti na̱xa̱ tóchjinahña ti nkexro kjuasin ijie̱ kixin tsondáchro á chaxín ti ijie̱ tjanchia sin o̱ náhí.” 17Méxra̱ ti ó ikui ti sin judío ntihi, la tuénxín ti ña̱o chrꞌéxi̱n, kjuakꞌétja̱xian ti nta̱kito̱axián iji̱é chojni la kuéto̱an kixin tsíxrakoa chꞌin Pablo. 18A̱ndá ti sin kóchjina la ninkehó ijie̱ kꞌuekahya sin chꞌan éxi kjuénka̱yáxian janhan chróndáchro sin. 19Jehó nínkakuenxín sin Pablo kixin ti nkehe tinkáchónki chꞌan la ko ti ndáchro chꞌan kixin ti nkexro itꞌin Jesús mé ikꞌuén, ndá ijie tjechón ínaá. 20A̱ndá janhan la nonahña nkexrín si̱ntayóxian tíha, ndá kjuánchánkíha̱ Pablo á tjinkaon chꞌan sátsji chꞌan Jerusalén kixin ntiha tsito̱exin iji̱é chꞌan o̱ náhí. 21A̱ndá jehe chꞌan kjuanchia chꞌan kixin ti emperador romano mé sinchekito̱exín ti ijie̱ chónta chꞌan. Ndá kuéto̱an kixin na̱xa̱ ntihó tsjakꞌechjina chꞌan, tsononajña nkesá tsétua̱nha̱n sátsji chꞌan ntiha ―ichro chꞌin Festo.
22A̱ndá ti rey Agripa ndáche chꞌin Festo:
―Kja̱xin janhan tjínka̱oan tsi̱nha̱n ti nkehe tsochronka ti chꞌin Pablo.
Ndá chꞌin Festo ndáchro:
―Ndóye tsinhín ti nkehe tsochronka chꞌan.
23Ndá ti ña̱o chrꞌéxi̱n ti ó kjuíji ti rey Agripa la ko Berenice ndá kꞌuíxehen sin ti nchia la ko ti sin soldado tꞌe̱to̱an tsíkji̱ka̱o sin, la ko kꞌuixeko sin iso chojni tjetoan kuènté ti chjasin ntiha. Ndá kꞌue̱to̱an chꞌin Festo kixin tsíxrakoa chꞌin Pablo. 24Ndá ndáchro chꞌin Festo:
―Jaha rey Agripa la ko kaínra kónkotséra ntihi, tihínra. Ti nkexro itjen ntihi, la kaín ti sin judío kꞌueka sin chꞌan ijie̱ ti chjasin Jerusalén la ko kja̱xin chjasin Cesarea la tjanchia sin kixin itsꞌen chꞌan. 25A̱ndá janhan tjénka̱yáxian kixin kohya ijie̱ kjuasin chꞌan kixin chrókꞌuen chꞌan. Kjánchó jehe chꞌan kjuanchia chꞌan kixin ti emperador romano mé sinchekito̱exín ti iji̱é chꞌan. Ndá kjuénka̱yáxian kixin tséto̱an sátsji chꞌan ntiha. 26Kjánchó nonahña nkehe tsokjian tsꞌáyéhe̱ ti nkexro tꞌe̱to̱an. Ndá ijie kuéto̱an kjuikakjín sin chꞌan kixin jaha rey Agripa la ko kaínra tjejora ntihi chrókjuanchankíhíra chꞌan kixin tso̱nona nkehe tsokjihan ti emperador.
27’Kixin jehya jína tsochrꞌan ijnko nkexro tjechjina ti itjen chꞌan ti na̱xa̱ nonahña nke ijie̱ tíká chꞌan.
Iliyochaguliwa sasa
Hechos 25: poeNTplus
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.
