2 Corintios 13
13
Pablo nchexraxinkaon sin kixin tsjiji chꞌan ínaá
1 #
Dt. 17:6; 19:15. *Tíhi ti níxin vez tsjasántsjahára. La kaín ti nkehe tso̱yóxin la tsicháxi̱n tsꞌejó yaá o̱ iyꞌá sin éxi ichro ti xroon itén Díos kixin tsochronka sin nkehe nduáhya siín kixin tso̱yóxin. 2Nixja̱ha̱ ti sin tsíkjasin ijie̱ ósé, la ko nixjahára kaínra, kjónté ikjín itjén la ínaá nixjahára éxi níxja ti yaáxin vez kjuasántsjahára, kixin ti ó tsjasán la í tsi̱konòahña ti nkexro kjuasin ijie̱ ínaá. 3Xi̱kaha níxja kixin jahara tjinkáonra tsinhínra á chaxín níxja̱xia̱n kjuachaxin kuènté Cristo. La jehya kixin chrókjuachahya Cristo tsja̱ko̱xi̱n ti kjuachaxin kuènté chꞌan ti tjejora. Náhí. Chaxín tja̱ko̱xi̱n Cristo ti kjuachaxin chónta ti tjejora. 4Chaxín ti ikꞌuén Cristo kjuákꞌenkáni ti ntacruz la éxi chóntahya kjuachaxin, kjánchó ijie la Cristo tjechónxin ti kjuachaxin kuènté Díos. La xi̱kaha kja̱xini éxi kꞌuéchóntahyani kjuachaxin, landá ijie ti ó tinkáchónkini Cristo la tjejóchónxini ti kjuachaxin kuènté chꞌan kixin jína tsjinki̱tsani ti jahara kja̱xin.
5Jahara chrókjuénka̱yáxinra á ncho̱xon tjejora, á kaín a̱sánra tinkachónkira Ìnchéni. ¿Á noahñara kixin tjejokoara Jesucristo ní? A̱ndá ti xi̱kaha la jahara tso̱nohara á chaxín tinkachónkira chꞌan o̱ náhí. 6Méxra̱ tjínka̱oan chrókónohara kixin jeheni la chojni chaxín tinkáchónki Ìnchéni. 7La ko nixje̱he̱ni Díos kixin ninkehó nkehe nduáhya chrókjui̱chꞌera. Jehya kixin chrókjua̱ko̱xi̱ni kixin jína ti nkehe ndáchroni. Náhí. Tjinkaoni kixin jahara chrókjui̱chꞌera ti nkehe jína, kjónté tsondáchro sin kixin nduáhya ti nkehe tjakoni. 8La ninkehó nkehe xrokjuahya sichꞌeni kixin tsꞌitjáñaxín ti nkehe chaxín. Náhí. Kaín nkehe ichꞌeni la tjikosayéxini ti nkehe chaxín. 9Méxra̱ chéhe̱ni, kjónté kanhñó fuerteni, ti chaxín jína tjejora, la na̱xa̱ tsonixje̱he̱ni Díos kixin a̱ntsí ndoá tsꞌejora. 10Mé xi̱kaha senó ikjian tíhi, ti na̱xa̱ tjasántsjahyara, kixin ti ó tsjasán la í tsicháxi̱nhña na̱xa̱ si̱ntakoninkáonra, kixin tsonixja̱xia̱n ti kjuachaxin kjuajon Ìnchéni la jehya kixin chrókjui̱ntakꞌitjáñara. Náhí. Kjuajon chꞌan tíha kixin jahara a̱ntsí chrókuitekáonra ti jehe chꞌan.
Kjuixixín nixja Pablo
11Kíchóni, chrókócháhara, la chrókjuéyára kixin jína chrókꞌuejora. Nkoko̱a chrókjuénka̱yáxinra la ko kjuaxróxin chrókꞌuejora kixin Díos la imá tjua̱hára la ko tjáhara chꞌan kjuaxróxin mé xi̱kaha tjejoko̱ara chꞌan. 12Nkojína nixjehéra kichuara la ko nchónhña kjuasàya tse̱héra itja kichuara. 13Kaín ti sin tinkáchónki Ìnchéni tjejó ntihi la xráxinkaon sin ti jahara.
14Ìnchéni Jesucristo mé sintañaora, kixin tjua̱hára Díos la ko tjejokoara ti Ncha̱kuén chꞌan. Ótjen.
Iliyochaguliwa sasa
2 Corintios 13: poeNTplus
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.