2 Corintios 11
11
Pablo la ko ti sin chaxínhña apóstol
1Tjínka̱oan kixin chrókjuachara chrókuihínra kjónté ti ó chrónixja jnko nkehe éxi lo̱nti̱. 2Janhan tjínka̱konhña kixin íjnko nkexro chrókuinkachónkira; jehó Cristo. Kja̱xin xi̱kaha tjinkakonhña Díos. Xrja̱noáha̱ Cristo kixin chrókꞌuáyéhe̱ ti jahara kixin tjínka̱oan chrókjuánjua ti jahara éxi ijnko tjarisoá tso̱te̱he nkoko̱a xìi xi̱kaha. 3#Gn. 3:1-5, 13.*Kjánchó tóxakona kixin tso̱hanra éxi tjan Eva kixin ti konche kjuíchꞌiyehe ti jehe tjan. La xi̱kaha kja̱xin chrókui̱to̱éhyara sitꞌayahara ókjé chojni kixin chrókui̱to̱héra Cristo. 4Mé xi̱kaha jahara xra̱hya tjájonra kjuachaxin tjiji ókjé chojni ntiha chrónkaxín sin ijnko Jesús ókjé, jehya éxi ti chrónkaxíni la ko kja̱xin xra̱hya titekáonra ókjé ncha̱kuén nkexro, jehya ti Ncha̱kuén Díos kꞌuayéhéra sa̱oxín, la ko xra̱hya chrókuitekáonra ijnko itan ókjé chrókuaáxinra, jehya éxi ti itan chaxín kuitekáonra senó. 5Ti sin chréhéra la ndáchro sin kixin imá tjetoan sin, a̱ndá janhan la kanhñó tjetoan, ichro sin, kjánchó janhan la ó nona kixin chaxínhña tíha. 6Kjónté kanhñó náxrjón níxja janhan la jehya kixin kanhñó chrókónona chrókjuàkua ti itan chaxín. Mé xi̱kaha tjáko̱xián itsjé kixin tsꞌikonra la tso̱nohara jína.
7¿Á nduáhya kjui̱tꞌa ti ó xrja̱nkaxián ti itan tsaáxini ní?, kixin ninkehó kjuanchahyara chrókjuácha, la ko éxi ijnko chojni nóa kjuakꞌé kixin tjínka̱oan chrókjuinki̱tsa ti jahara kixin jína chrókꞌuitjára. 8Ti sin íso ni̱nko kjuínki̱tsa sin ti janhan, kjuajon sin chichaon kꞌuayáha̱ kixin tsjakꞌé tsjákohára. 9#Fil. 4:15-18.*Ti kjuakꞌé ti tjejora, la kjónté tꞌitjáña nkehe, la ninkexró kjuanchàhya nkehe. Ti sin kíchóni kjui̱xi̱n Macedonia mé kjui̱ka̱o sin ti nkehe ticháxi̱na. Méxra̱ tjínka̱konhña kixin chrótja̱hára ixra̱ la ko xi̱kaha tjétꞌa̱ ijie. 10Chaxín choxián ti itan chaxín ndoá kuènté Cristo, ndá kohya ninkexró nkuíxín Acaya tsjacha tsakítsjéna ti kjuachéhe̱ chonta. 11¿Nkekuènté xi̱kaha ndáxrja̱n? ¿Á xi̱kaha ndáxrja̱n kixin chaxínhña tjua̱hára ní? Náhí. Díos la ó nohe kixin imá tjua̱hára.
12Méxra̱ tsjintaxín xi̱kaha si̱tꞌa kixin tjínka̱konhña tsjánjua kjuachaxin kixin nchenkexín ti sin ixri ndáchro kixin nkokón kjuachaxin chónta sin éxi chonta janhan. 13Jehe sin mé ijnko apóstol chaxínhña, chꞌia sin, ncheyóe̱xin a̱sén sin éxi chojni kjueyá Cristo. 14Tíhi la jehya ijnko kjuaxikaon kixin ti Jínahña la tjinkaon sincheyóhe̱ tsꞌóna éxi ijnko ángel kuènté tꞌinkaséña. 15La xi̱kaha kja̱xin ti sin chꞌehe ixra̱ ti Jínahña mé xi̱kaha ichꞌe éxi jnko nkexro jína. Kjánchó ti ó tsjixixín la tsjasóte sin kixin ti ixra̱ jínahña kjuíchꞌe sin.
Kjuasóte Pablo kixin ti ixra̱ kjuíchꞌe chꞌan
16Ndáxrja̱n ínaá kixin nijnkora chrókjuénka̱yáxinra kixin locua janhan. Kjánchó ti xi̱kaha tjénka̱yáxinra la ti̱to̱héra tsonixja éxi ijnko chojni loco kixin kja̱xin janhan jína chrókjui̱ntahnke intsí. 17Ti xi̱kaha nta̱nkexián la jehya kjuachaxin kuènté Ìnchéni ndáxrja̱nxia̱n tíha. Náhí. Éxi ijnko chojni loco níxja janhan. 18Méxra̱ ti nchónhña chojni siín nchenkexín sin ti nkehe nohe sin, a̱ndá ijie la kja̱xin janhan si̱ntahnke 19kixin jahara ndáchrora kixin imá nohara ndá cháhara tjejó ti sin loco 20la tjájonra kjuachaxin tꞌe̱tuahanra sin la ko takítsjahara sin ti nkehe chontara la ko chꞌéna a̱sén sin éxi Ìnché sin ti jahara, a̱ndá tjikosayéhya sin ti jahara la ko chjéhe sin nkaya konra. 21Kjónté chrókósuàna tsondáxrja̱n kixin janhan la kanhñó kuéto̱an.
Kjánchó ti nkehe nchenkexín sin la janhan jína nta̱nkexián kja̱xin, kjónté ndáxrja̱n tíhi éxi ijnko chojni loco. 22¿Á chojni hebreo ti jehe sin ní? Janhan kja̱xin. ¿Á chojni israelita sin ní? Kja̱xin janhan. ¿Á kꞌuaxrjeníxin sin Abraham ní? Kja̱xin janhan kꞌuaxrjeníxian Abraham. 23#Hch. 16:23.*¿Á chꞌehe sin ixra̱ Cristo ní? Janhan la a̱ntsí tꞌa̱ha̱ chꞌan ixra̱ ke jehe sin. Kjónté ndáxrja̱n tíhi éxi ijnko chojni loco. Janhan la a̱ntsí kjui̱tꞌaha̱ ixra̱ Cristo, a̱ntsí itsjé kjuakꞌéchji̱na, itsjé kjuínchekjasóte chojni ti janhan, la ko itsjé sin tjinkaon chrókꞌóñá ti janhan. 24#Dt. 25:3.*Ti sin judío inꞌó vece kꞌóka sin treinta y nueve látigo. 25#Hch. 16:22; Hch. 14:19.*Iní vece kjuatexína sin ti janhan inta vara la ijnko ña̱o kjuakꞌe sin ixro̱. Iní vece kꞌuaniánkíki̱a̱n ntabarco ìnta̱, la ijnko ña̱o la ko ijnko tie tjénka̱taoán ìnta̱. 26#Hch. 9:23; Hch. 14:5.*Kꞌuájia ikjín, itsjé kjuaxikaon kixin chrókꞌuenxian nda̱río, la chrókꞌóñána xíche̱e, chrókꞌóñána ti sin chjasená la ko ti sin tsíkji̱xi̱n ókjé. Kꞌuíkua̱n kjuaxikaon ti chjasin ijié la ko ti nte̱je̱, ti nda̱ñao, la ko ti sin chaxínhña tinkáchónki Ìnchéni chrókꞌóñá sin ti janhan. 27Kꞌóxrjéna kixin ti ixra̱ la ko itsjé nkehe náxrjónhña kóna. Itsjé tie kjuakꞌéchrinhña, itsjé ña̱o kjuakꞌéxian kjinta la ko ìnta̱ la ko itsjé ña̱o kjonie̱hña ninkehó, imá kꞌuatsínka ikin kixin chontahya ika tsꞌitsa̱.
28Mé xi̱kaha kaín tíha kóhen la ko íso nkehe kóna la ko kja̱xin nkojnko ña̱o tóxakona kixin kaín ti sin tjejó kaín ti ni̱nko. 29Ti nkojinra níhara la kja̱xin janhan nína. A̱ndá ti nkojín nkexro tjachróe kícho tjasin ijie̱ la janhan la tónínka̱oan kixin tjinka̱konhña tíha. 30Ti ticháxi̱n chrókjui̱ntankexián nkehe la ndáxrja̱n kaín ti kjuaxikaon kꞌuátsínkaxián, kixin tíha mé tja̱ko̱xi̱n kixin kanhñó chonta fuerza. 31Díos, Itꞌé Ìnchéni Jesucristo, mé ti nkexro chróxraxinkaoni nkochríxín, nohe chꞌan kixin kaín ti nkehe ndáxrja̱n la chaxín. 32#Hch. 9:23-25.*Ti kjuakꞌé Damasco, la ti gobernador kjuíchꞌehe ixra̱ ti rey Aretas, mé kꞌue̱tue̱hen ti soldado kixin tsochóhen sin ndója ti chjasin kixin tsotséna sin kixin tsjakꞌéchji̱na, 33kjánchó siín nkexro kjuinkaji̱nxi̱na ti tja̱tꞌo̱ tsíka̱ntatjen ti chjasin, kjua̱kꞌe̱nka̱ya ijnko ntaxra, ndá kuakitsjexína sin ijnko ventana ndá xi̱kaha kjuínchekaá sin ti janhan.
Iliyochaguliwa sasa
2 Corintios 11: poeNTplus
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.