2 Corintios 10
10
Ti kjuachaxin chónta Pablo kixin kꞌóna apóstol
1Janhan, Pablo, xrja̱noáhára la ko nkojína nixjahára la tjínka̱oan tsjáko̱xian kixin tjua̱hára éxi tjua̱hára Cristo. Iso chojni ndáchro sin kixin ti ó itjén ti tjejora la chràkuan, a̱ndá ti ikjín itjén la imá jia̱na, ichro sin. 2Méxra̱ xrja̱noáhára kixin ti ó tsjasántsjahára la jína chrókꞌuejora kixin ndá ticháxi̱nhña tso̱jia̱na. Isora tékarani ijie̱ la ndáchrora kixin tjáko̱xia̱n éxi chojni chjasintajni ó. A̱ndá ti xi̱kaha ichrora la ti ó tsjasán janhan ticháxi̱n tso̱jia̱na kixin tsjénduáhara. 3Chaxín jeheni la chojni chjasintajni ntihó, kjánchó ti ó tjajo̱nkoni ti Jínahña la tjajo̱nhñani éxi tjajo̱n chojni chjasintajni tinkáchónkihya Díos. 4Kixin ti chika tjajo̱nkoxini la jehya éxi ti chika tjajo̱nxi̱n chojni ntihi chjasintajni. La náhí. Kjuachaxin kuènté Díos tjajo̱nxini la tíha tsjacha sinchekꞌitjáña kaín kjuachaxin kuènté ti Jínahña. 5La tsjachani sinchekꞌitjáña ti nkehe nduáhya tjenka̱yáxin chojni la ko kaín nkehe nchenkexín sin kixin tíhi mé tꞌinkákonhe̱n kixin chrókuinkáchónki sin Díos. A̱ndá kjuachaxin kuènté Cristo la kaín nkehe nduáhya tjenka̱yáxin chojni chjasintajni tsíto̱eheni Cristo kixin jehe chꞌan sinchekꞌitjáña chꞌan tíha kixin jína chrókuitekaon chojni ti jehe chꞌan. 6La ko tjejóchóheni sinchekjasóteni kaín ti sin na̱xa̱ tjinkakonhña chrókjuinchexiteyá, ti ó tsjáko̱xinra jahara kixin chaxín nchexiteyára jína.
7A̱ndá jahara la titekáonra ti nkehe tꞌikonra ó. A̱ndá ti nkexro tjenka̱yáxin kixin chaxín chꞌehe Cristo ixra̱ la kja̱xin chrókjuatso̱an kixin kja̱xini chꞌeheni Cristo ixra̱. 8Méxra̱ ti chrókjui̱ntahnke kixin ti kjuachaxin chonta janhan ndá chrókósuànahña kixin Ìnchéni kjuajon ti kjuachaxin kixin chrókjuinki̱tsa ti jahara kixin a̱ntsí chrókꞌuitjára kuènté Díos, la tíha la jehya kixin chrókꞌuitjáñaxinra. 9Tjínka̱konhña chrókjui̱ntachrakonxinra kixin ti xroon chrꞌahánra. 10Kixin ndáchro sin kixin jie̱he ti nkehe ikjian, a̱ndá ti chrókjuakꞌé ntiha la jia̱hya janhan la ko kanhñó chónta kjuachaxin ti níxja. 11Kjánchó ti sin xi̱kaha ndáchro la chrókónohe sin kixin nkokón níxja janhan éxi nixja ti xroon tsíkjian ti ikjín itjén, la xi̱kaha chrónixja ti ó tsjakꞌé ntiha.
12Tjinkakonhñani chrókjuénka̱yáxini kixin chrókóyóhe̱ni ti íso sin nixja sin kixin jína sin. Jehe sin mé lo̱nti̱ sin kixin ncheyóe̱xin a̱sén sin éxi íso chojni. 13A̱ndá jeheni la chrókjuinchenkexínhñani ijnko ixra̱ jehya kuènténi. Díos mé kjuako nketí sichꞌeni ixra̱ la kja̱xin kjuajon chꞌan kjuachaxin kixin kjuíjini kjuíchꞌeni ixra̱ ti tjejora chjasin Corinto. 14Jehya kixin chróchóntahyani kjuachaxin chrókꞌue̱to̱ani. Ti chaxín jehya jeheni sa̱oni kjuíjini ti tjejora, ndá xi̱kaha chróchóntahyani kjuachaxin chrónixjahára, kjánchó jeheni sa̱oni kjuíjini ntiha kjuákohára ti itan kuènté Cristo. 15La chrókjuinchenkexínhñani ijnko ixra̱ kjuíchꞌe ókjé chojni éxi ixra̱ chrókjuíchꞌeni jeheni. Náhí. Tjinkaoni kixin a̱ntsí chrókꞌuitjára tsinkachónkira Ìnchéni, ndá xi̱kaha a̱ntsí chrókjuinki̱tsani ti jahara, kjánchó tjinkaoni jehó ti ixra̱ kꞌuáyéhe̱ni sichꞌeni. 16Kja̱xin tjinkaoni chrókjuakoni ti itén Ìnchéni chrókuaáxin chojni íso chjasin ikjín, kjánchó chrókjuinchenkexínhñani ti ixra̱ kjuíchꞌe ókjé chojni.
17 #
Jer. 9:24. *Ti nkojín nkexro tjinkaon chrókjuinchenke la jehó chrókjuinchenke kixin tinkáchónki Ìnchéni. 18Kixin tóxrìe̱nhña Díos ijnko nkexro jehó chróndáchro kixin jína. Náhí. Ìnchéni mé tsondáchro nkexro ti chaxín jína.
Iliyochaguliwa sasa
2 Corintios 10: poeNTplus
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.