1 Corintios 15
15
Ti xechón Cristo
1A̱ndá ijie kíchóni, tjínka̱oan kixin chróxraxinkáonra ti itan ni̱xin kjuákohára la kuitekáonra, la xi̱kahó tjejora titekáonra. 2Ti nkehe kjuákohára mé tsaáxinra, ti tsi̱to̱éhyara; a̱ndá ti náhí la ó chónkó kuitekáonra ti nkehe kjuàkua.
3 #
Is. 53:5-12. *Mé xi̱kaha ti nkehe sa̱oxín kjuákohára la mé ti nkehe kꞌuayáha̱, kixin Cristo kꞌuenyákohe̱n ti iji̱éni, éxi ndáchro ti xroon itén Díos; 4#Sal. 16:8-10; Mt. 12:40; Hch. 2:24-32.*xravá chꞌan la níxin ña̱o xechón chꞌan éxi ndáchro ti xroon itén Díos. 5#Lc. 24:34; Mt. 28:16, 17; Mr. 16:14; Lc. 24:36; Jn. 20:19.*La sa̱o Pedro xéta Ìnchéni ti ó xechón, ndá chrꞌéxi̱n la ti teyó sin kuékꞌajiko chꞌan. 6A̱ndá chrꞌéxi̱n la kꞌuáxitehí quinientos ti sin kíchóni kꞌuíkon sin Ìnchéni. A̱ndá ijie iso sin la na̱xa̱ tjejó sin, la nkojín sin la ó ikꞌuén sin. 7Ndá chrꞌéxi̱n xéta chꞌan chꞌin Jacobo, ndá chrꞌéxi̱n kaín ti íso sin apóstol.
8 #
Hch. 9:3-6. *A̱ndá kjuixixín la janhan kꞌuíkua̱n Ìnchéni, méxra̱ janhan la éxi ijnko ixjan na̱xa̱ xitjahya ña̱o la ó tsíkokjíhi xi̱kaha. 9#Hch. 8:3.*Méxra̱ janhan la kanhñó tjetoan éxi ti íso sin chꞌehe ixra̱ Ìnchéni kixin kꞌuéninka̱koha̱n ti sin ni̱nkué Díos. 10La kjónté xi̱kaha kjui̱tꞌa, la kui̱konoéhe̱ Díos ti janhan la ti kjuachaxin kuènté chꞌan mé kjuitóxi̱n ti janhan, la jehya ó chónkó tíha, kixin a̱ntsí kjui̱tꞌa ixra̱ kuènté chꞌan ke ti íso sin. Kjánchó jehya janhan kjui̱tꞌa ti ixra̱. Náhí, Díos kjuínki̱tsa kjui̱tꞌa tíha. 11A̱ndá ndáxrja̱nhña tíhi kixin janhan o̱ jehe sin imá tjetoan. Náhí, ti nkehe tjetoan la ti kuihínra kjuakoni, ndá kuitekáonra.
Ti tsoxechón ti sin tsíkꞌen
12A̱ndá ti tjakoni kixin Cristo la xechón, ¿ndá nkekuènté kixin nkojinra la ndáchrora kixin tsoxechónhña ti sin tsíkꞌen? 13Ti chaxínhña tsoxechón ti sin tsíkꞌen, la kja̱xin Cristo xechónhña ti xi̱kaha. 14A̱ndá ti chaxínhña xechón Cristo, la ó chónkó ti nkehe tjakoni la ko ti nkehe kuitekáonra la ninkehó sínkíhya. 15A̱ndá ti chaxínhña tsoxechón ti sin tsíkꞌen, la jehó kjuachꞌia chrónkani kuènté Díos, kixin jeheni la ó chrónkani kixin Díos kjuínchexechón Cristo. A̱ndá ti chaxínhña tsoxechón ti sin tsíkꞌen la kja̱xin chaxínhña xechón Cristo. 16A̱ndá ti chaxínhña tsoxechón ti sin tsíkꞌen, la kja̱xin Cristo xechónhña. 17A̱ndá ti chaxínhña xechón Cristo la ó chónkó kuitekáonra ti jehe chꞌan la na̱xa̱ tjìinhña ti ijie̱ chontara. 18A̱ndá ti xi̱kaha, la ti sin kuinkáchónki Cristo ndá ó ikꞌuén sin la ó chónkó kuitekaon sin kixin ó kꞌuitjáña sin ti xi̱kaha. 19A̱ndá ti tjejóchóheni kixin Cristo tsjinki̱tsa ti jeheni ti na̱xa̱ tjejóchóni, la ijnko kjuatosuéhe̱ kixin chóntahyani nkexro tsaáxini.
20Kjánchó ti nkehe chaxín la kixin Cristo la xechón. Jehe chꞌan la éxi ti toxé sa̱oxín tsíkꞌóna kixin sa̱o chꞌan xechón chꞌan, la kaín ti sin tsíkꞌen la tsoxechón sin. 21Kixin ijnko chojnindoa xránkíxixín ti ijie̱, a̱ndá xi̱kaha kjuankíxin ikꞌuén chojni, la ko kja̱xin ijnko chojnindoa xechón, ndá xi̱kaha tsoxechón kaín ti chojni tsíkꞌen. 22Mé xi̱kaha Adán la kjuasin ijie ndá kaín chojni tinkákꞌen. La xi̱kaha kaín ti chojni tinkáchónki Cristo la tsoxechón, la tsochónta kjuachón nkochríxín. 23Kixin nkojnko sin tsoxechón sin éxi tjenixín xroon la Cristo sa̱o xechón, a̱ndá ti ó tsokjan chꞌan ndá tsoxechón kaín ti nkexro kuitekaon ti jehe chꞌan. 24A̱ndá itsi ti ña̱o tsjixixín ti ó sinchekꞌitjáña Cristo kaín ti kjuachaxin kuènté ti jínahña tꞌe̱to̱an la ko kaín ti nkexro chónta kjuachaxin jehya kuenté Díos, ndá tsjajon chꞌan ti kjuachaxin tsꞌáyéhe̱ Itꞌé chꞌan, Díos. 25#Sal. 110:1.*Méxra̱ ticháxi̱n tsꞌe̱to̱an Cristo hasta tsjixrakájña ti ña̱o tsꞌe̱tue̱hen chꞌan kaín ti nkexro kꞌuénínkakohen ti jehe chꞌan. 26A̱ndá ti nkehe tsjixixín sinchekꞌitjáña chꞌan mé ti kjuachꞌén. 27#Sal. 8:6.*Kixin Díos mé chjéhe kaín kjuachaxin Cristo kixin tsꞌe̱tue̱hen chꞌan kaín ti nkehe siín. Kjánchó ti ó ndáchro kaín, la ó noheni kixin kja̱xinhña Díos tsꞌítuehen. Kixin Díos chjéhe kjuachaxin ti Xje̱en kixin tsꞌe̱tue̱hen kaín nkehe. 28A̱ndá ti ó tsjixin tsꞌe̱tue̱hen Cristo kaín nkehe, ndá jehe chꞌan, ti Xje̱en Díos, la kja̱xin chꞌan sinchexiteyéhe chꞌan ti Itꞌé chꞌan Díos, ti nkexro kjuajon ti kjuachaxin kꞌuáyéhe̱ chꞌan, ndá Díos mé tsꞌe̱tue̱hen kaín ti nkehe siín.
29A̱ndá ti chaxínhña tsoxechón ti sin tsíkꞌen, ¿la nkekuènté kixin iso sin la tikiteyákonhe̱n sin ti sin tsíkꞌen? Nkekuènté xi̱kaha ichꞌe sin ti titekakonhña sin kixin tsoxechón chojni.
30¿La nkekuènté kaín ña̱o kjuaxróxinhña tjejóni kixin siín chojni nínkakohen ti jeheni? 31Méxra̱ kíchóni, kaín ña̱o chonta kjuaxikaon kixin chrókꞌuen, kjánchó chàna kixin kja̱xinra tinkachónkira Ìnchéni Jesucristo. 32#Is. 22:13.*Kjónté imá nínkakona ti chojni tjejó Éfeso éxi ijnko koxra̱ jie̱he, la kjónté kjuakꞌé ntiha, ¿ndá nkehe chrókjuacha janhan ti chaxínhña tsoxechón ti sin tsíkꞌen? Ti xi̱kaha la kjá ncho̱xon ti nkehe ndáchro ti sin titekakonhña Díos: “Sinieni la ko itsꞌini kixin ndóye tsꞌeni.”
33Ti̱toéhyara chrókjuitꞌayahara chojni. Éxi ti nkehe ndáchro sin: “Ti tsꞌitoni ti chojni nduáhya tjenka̱yáxin la chrókꞌuitjáñeheni kaín ti nkehe jína noheni.” 34Chrokjanra ti nti̱a jína la chrókjuásinhñara ijie̱. Kixin isora chaxínhña tinkachónkira Díos. Ndáxrja̱n tíhi kixin chrókósuàhara.
Nkexrín tsoxechón ti sin tsíkꞌen
35Kjá nkojinra tsondáchrora: “¿Nkexrín tsoxechón ti sin tsíkꞌen la ko nke cuerpo tsochónta sin?” 36Kjá lo̱nti̱ra ti xi̱kaha tjanchankíra. Ti itje tꞌinka nonte la ticháxi̱n itsꞌen ndá ntiha tsꞌañaxin ijnko nkehe tjechón. 37Ti nkehe tꞌe̱nka̱ni la jehya ti kayoa. Náhí. Ti nkehe tꞌe̱nka̱ni la ti itje trigo o̱ íjnko itje. 38Ndá Díos mé tjajon kjuachaxin kixin tsꞌóna nkojnko inta éxi tjinkaon chꞌan, la ko nkojnko inta tsochónta itje kuènté. 39Jehya kaín cuerpo nkokón tsjehe. Náhí. Ijnko la cuerpo kuènté chojni, íjnko la kuènté iko, íjnko la kuènté koxroxe, la ko íjnko la kuènté koche. 40Mé xi̱kaha siín cuerpo kuènté ti sin tjejó nkaya nka̱jní la ko siín ti cuerpo kuènté chojni chjasintajni. Ti cuerpo siín nkaya nka̱jní la náxrjón tsjehe la kja̱xin ti siín chjasintajni, kjánchó nkokónhña. 41Ókjé nkexrín tꞌinkaséñaxín ti ña̱o, la ókjé nkexrín tꞌinkaséñaxín ti nitjó, la kja̱xin ti konotsé la ókjé nkexrín, la kjónté itsjé konotsé siín la nkokónhña tsjehe ti xrohi. 42Mé xi̱kaha kja̱xin ti chojni tsíkꞌen, ti ó tsoxechón. Ti cuerpo xravá la tso̱tje la ko tsꞌitjáña, a̱ndá ti cuerpo tsoxechón mé í tsꞌitjáñahña la ko tsjeje̱hya. 43Méxra̱ ti nkojín nkexro itꞌen, la xravá ti cuerpo kuènté, a̱ndá ti cuerpo la náxrjónhña tsjehe la ko tjeje̱, a̱ndá ti ó tsoxechón ti nkexro a, la náxrjón tsotsjehe la tsochónta kjuachaxin, la í tsjeje̱hya ti cuerpo. 44Ti nkehe tsoxravá la mé ti cuerpo chóntani ntihi chjasintajni. A̱ndá ti nkehe tsoxechón la mé ti cuerpo tsjajon Ncha̱kuén Díos tsochóntani nkaya nka̱jní. Mé xi̱kaha siín cuerpo chjasintajni la ko siín cuerpo tsjajon Ncha̱kuén Díos.
45 #
Gn. 2:7. *Mé xi̱kaha ndáchro ti xroon itén Díos: “Adán mé ti chojnindoa sa̱o kjuákꞌechón”, a̱ndá ti ó ikui Cristo, mé éxi ti yaáxin Adán, la ti ncha̱kuén chꞌan mé tsjajon kjuachón. 46Méxra̱ sa̱o kꞌóna ti cuerpo chóntani chjasintajni, a̱ndá chrꞌéxi̱n ti cuerpo kuènté nkaya nka̱jní. 47Ti chojni sa̱oxín kꞌóna mé inche ó kꞌónaxín, la kjuákꞌe chjasintajni. A̱ndá ti yaáxin nkexro mé nka̱jní kui̱xi̱n. 48Kaín ti chojni siín chjasintajni la chónta ijnko cuerpo éxi ti cuerpo kuenté ti nkexro tsíkꞌónaxín inche sa̱oxín. A̱ndá ti cuerpo siín nkaya nka̱jní mé yóhe̱ ti cuerpo chónta ti nkexro kui̱xi̱n nka̱jní. 49Mé xi̱kaha tóyóhe̱ni ti nkexro kꞌónaxín inche, la ko kja̱xin chrꞌéxi̱n tso̱yóhe̱ni ti nkexro kui̱xi̱n nkaya nka̱jní.
50Méxra̱ kíchóni, tso̱tjo̱nkara ijnko nkehe. Ti cuerpo kꞌóna into la ko hueso chóntani ijie la xitjahya sátsji̱koni ti itjen Díos tꞌe̱to̱an, kixin ti nkehe tjeje̱ la xitjahya tsꞌáyéhe̱ ti nkehe tsjeje̱hya. 51#1Ts. 4:15-17.*A̱ndá ijie tso̱tjo̱nkara ijnko nkehe ninkexró noehña: Kaínhñani itsꞌeni, kjánchó kaíni tsꞌixitoxi̱n ti cuerpo chóntani, 52kixin éxi ti chrꞌátoni ikoni la ko takitje̱nki̱ni, mé xi̱kaha tso̱hen ti ó tsokjan Cristo. Ti ó tsihini tsondáchro ti trompeta, ndá ti sin tsíkꞌen la tsoxechón sin, la í tsꞌenhña sin; a̱ndá jeheni na̱xa̱ tjejóchóni la tsꞌixitoxi̱n ti cuerpo chóntani. 53Kixin Díos tsjinkí ti cuerpo itꞌen la ko tjeje̱ chóntani ntihi la tsjajon chꞌan íjnko cuerpo tsjakꞌechón nkochríxín la ko tsjeje̱hya. 54#Is. 25:8.*A̱ndá ti ó tsꞌáyéhe̱ni ti cuerpo tsjeje̱hya ndá tsoxiteyá ti nkehe ndáchro xroon itén Díos tsíkjin sin ósé: “Ti kjuachꞌén#15:54 kjuachꞌén muerte la kꞌuitjáña, a̱ndá kjuacha ti kjuachón. 55#Os. 13:14.*Jaha kjuachꞌén, ¿ikjá ti kjuachaxin kuèntá kixin chrókjuácha? ¿Ikjá ti kjuachaxin kuèntá si̱ncheníexián ti jeheni?” 56Kixin ti ijie̱ mé kjui̱xi̱n ti kjuachꞌén. La ti kjuachaxin chónta ti ijie̱ mé ti ley. 57A̱ndá kjuasáye Díos la jína tsaáni kixin Ìnchéni Jesucristo kjuenka̱yákohe̱n ti iji̱éni.
58Méxra̱ kíchóni, imá tjua̱hára. Chrokui̱to̱éhyara chrókuinkachónkira Díos. Nkochríxín chrókócháhara chrókjui̱chꞌehéra chꞌan ixra̱, kixin ó nohara kixin tíha la jehya chónkó.
Iliyochaguliwa sasa
1 Corintios 15: poeNTplus
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.