Tomong Betom Yɛsu 21
21
Bulus a kyè vɔk e Yɛrusalɛm
1Jeng de wot a de tɔk gas ot na bemât Ɛfɛsus, wot a yel e dwa-nshi, ko wot a kyè cik vɔk e kerezîk Kos. Tuk het, wot a wɔ̀ wul rezîk Rɔdɔs; ko yi e hwomo, wot a kyè vɔk e repomô Patara. 2E Patara mo, wot a sɛ̀ dwa-nshi de wa sé kyè wɔ e sevwêl Finikya. Wot a yel e ji mo, ko wot a hàla repomo mo. 3E ji kwɛngɛl mot, wot a di rezîk Kipirus, ko wot a hàla rɛ e vwɔ mwɛlɛng mot, wot a kyè vɔk e sevwêl Sirya. Jeng de wot a wul repomô Tur, wot a gyirik, yaga a sé e dem a hane de ba paa ɛ̀ pyɛ́ de ya sé e dwa-nshi mo. 4E repomo mo, wot a sɛ̀ bemat-raa behak, ko wot a sangal na yɛn sati gwining. Bemat o ba yâng Bulus yi na retô Gabik Jɛrɛ wɔgɔ, yɛ a wɔ́ e Yɛrusalɛm wɛt. 5Ko sede jeng sogo mot ya vey, wot a hàla kwɔn o. Mwa bemat o, tanga beha mɛn na nèy mɛn, yɛn a raa hot wɔ e bamâ repomo mo. E rekwogôm gworep, wot a ye guduruk, ko wot a ra won. 6Bama de wot a yang ɛn kala, wot a yel e dwa-nshi, ko yɛn a to ɛn wɔ e lɔ.
7Wot a re nuyel na kwɛngɛl mot yi e Tur, ko wot a kyè vɔk e repomô Tɔlɛmais. E hwomo, wot a wɔ̀ yâng bemat-raa show, ko wot a sangal na yɛn pɔlɔ hining. 8Tuk het, wot a sogo, ko wot a kyè vɔk e repomô Kaisariya. Kwɔn a hane de Filip, mwât sharâ Yɛgɛt Yat a sé ɛ̀, ko wot a sangal e lɔ mɛ mo. Yɛ Filip o a sé gwining e ji bemât sɛlɛ betaama de bá kana kasa hɛn e Yɛrusalɛm. 9Yɛ mo a vɔk behwóng mɛ benaas de ba rɔngɔl nà ra weneng, vemo de ba sé bezarap Dagwi. 10E bamâ nepɔlɔ tyɔng, zarap Dagwi hwak a vey yi e sevwêl Yudiya, reza mɛ, à Agabus. 11Jeng de a wul na wot, a jut gyindi de Bulus a rɔgɔs e rawit mɛ. A rɔgɔs mɛ̀ vɔ tanga bol mɛ pyɛ mɛ, ko a ye, “Pyɛ ma yemo de Gabik Dagwi ha ha wɔgɔ: ‘BeYuda de ba sé e Yɛrusalɛm bê jut dâ gyindi womo, na be rɔgɔs hɛ e gwong gwomo de yin a di ma ra. Yɛn ê to nára hɛ e vɔ bemât yére dyuk.’ ”
12Jeng de wot a wok ano, wot na bemat de ba sé e hwomo wot a ra won na Bulus, a wɔ́ e Yɛrusalɛm wɛt. 13Ko Bulus a kyɛ́ ɛ, a ye, “Yaga sɛ́ de yin a sé tosho, na yin a lashe a me yey ano arɛt? Me ma ga yóng me, na be rɔgɔs me e Yɛrusalɛm zɔng wɛt, ko na be mɔrɔ me arɔng yaga rezâ Darwey Yɛsu.”
14Jeng de wot a di, wot a tɔk hwɔtɔ nehywɛ mɛ wɛt, wot a tik ɛ, ko wot a ye, “Tik na pyɛ̂ mwa ye té tyɛng sede remo de Darwey Yɛsu e simo.”
15E bamâ nepɔlɔ tyɔng, wot a yong ot, ko wot a kyè vɔk e Yɛrusalɛm. 16Bemat-raa behak yi e Kaisariya ba raa hot, ko yɛn a wɔ̀ tik ot e lɔ mwat-raa hwak de bá kana yong ɛ̀, wot ê gyirik e lɔ mɛ. Ba tang ɛ, à Manason, ko yɛ a sé mwât Kipirus. Yɛ á kana tɛ́ ɛ mwat-raà Yɛsu yi e susu mo.
Bulus a wɔ́ na Yakɔp
17Jeng de wot a wul Yɛrusalɛm, bemat-raa ba sey ot na yey pyɛng. 18Tuk het, Bulus tanga wot, wot a wɔ́ na Yakɔp. Mwa bemakûk ekilisiya yɛn á kana tula hɛn e hwomo. 19Bulus a yang ɛn show, ko a misang a yɛn yɛɛlɛl mwa pyɛ́ de Dagwi a ga ra e ji bemât yére dyuk yi na fwom mɛ. 20Sede yɛn a wok ano, yɛn a somo Dagwi. Ko yɛn a yâng Bulus, “À gwa, hwà tɔk, BeYuda gu (1,000) pyak yɛn a ga tɛ́ ɛn bemat-raa, ko mwa hɛn yɛn a to sé gyeng Badu Mose naka. 21Bemat ba ga ha a yɛn e ra hwo wɔgɔ, hwà sé basa a mwa BeYuda de ba sé sangal e bavwêl yére dyuk pyɛ́ yemo ngan: Yɛn a tik nà gyeng Badu Mose, yɛn a tik nà kyese a nèy mɛn e cwɛl, na yɛn a tik nà raa negwɔn BeYuda mo arɔng. 22E sɛ́ de wot ê ra arɛt? Mwin, yɛn a rɔda wok, hwà ga vey wul e ngamo. 23Di, wot ê ha a hwo pyɛ de hwô ra: Bemat benaas ba sé tanga wot de ba ga jut sira e nuyêl Dagwi. 24Raa hɛn, na hwo wuna tó mo na yɛn e jeng de bê tɛ̀ ɛn jɛrɛ, na hwo tala dyâm tɛ́ ɛn jɛrɛ mo yaga yɛn. Ano kwong, yɛn ê tɔk hwon bato mɛn. Ka sede hwô ra ano, ko mwa bemat bê tɔk, hwo pyɛ mo hwà sé raa Badu Mose. Bê to tɔk, bemat vane de ba ha neha e ra hwo, neha mɛn o na sé bɔs. 25Ko e ra tɛ̂t bemât yére dyuk à, vemo de ba ga tɛ́ ɛn bemat-raa, wot a ga jɛk a yɛn bwok-rwang e ra pyɛ́ de wot a nɔng nu na be ra. Pyɛ́ ma yet ngan: Be re pyɛ de ba yɛrɛ yaga sekwit wɛt; be re nemi wɛt kɛ namâ pyɛ de ba tik nà shushu nemî yɛ; be ra nejwang arɔng wɛt.”
26Ano kwong tuk het, Bulus a jut bemat vane mo, ko yɛn a ra sede remo de Mose à kana ha a BeYuda na be ra, yaga na be tɛ̀ ɛn jɛrɛ. E bama mo, a yel e Gbɔng Duk Re Fongol, a ha a piris tuk de bemat o bê ba yɛnɛ tɛ́ ɛn jɛrɛ mo, ko bê ba yɛt nɔrɔ̂ yas vɔk na Dagwi yaga bato mɛn.
Ba vo Bulus e Gbɔng Duk Re Fongol
27Jeng de nepɔlɔ netaama nè tɛ́ ɛn jɛrɛ mo na vey bagât yɛnɛ hɛn, BeYuda behak de ba vey yi e sevwêl Asiya ba di Bulus e Gbɔng Duk Re Fongol. Yɛn a tɔgɔs regyɛng bemât mwa, ko yɛn a vo ɛ. 28Yɛn a gbɔ, ba ye, “À begwa BeIsrayɛl, vey in, na yin a sɛlɛ hot! Mwat á womo de e kyě kyè e kahɛ kwɔn, e basa a bemât mwa, be raa negwɔn BeIsrayɛl wɛt. E to basa a yɛn, bē lashe Badu Mose, na be to nɔ̂ng Gbɔng Duk womo nerey wɛt! Ko di, a vey na bemât yére dyuk e nelalâ Gbɔng Duk womo de wa sé jɛrɛ; yi ano, a tɛ̀ kwɔn o ligis.” 29Yɛn a ha ano, yaga yɛn á kana di Bulus e ji repomo tanga Torofimus, mwât Ɛfɛsus. Yaga ano, yɛn a bare, Bulus a jut ɛ na be yel e nelalâ Gbɔng Duk o.
30Lwɛ́lɛ gwa sogo e mwa repomo mo. Bemat pyak ba yi na setele yi e bebak detidetu, ko yɛn a vo Bulus, ba hwɔlɔ hɛ, ko ba pat ɛ yi e Gbɔng Duk Re Fongol. Remo-remo, ba bang ruhûp wɛ. 31Jeng de bemat o ba sé simo be mɔrɔ hɛ, mwat hwak a wɔ̀ ha a gwɔ̀m bemât comô BeRoma wɔgɔ, nehywɛ bemât Yɛrusalɛm mwa na ga sogo. 32E ji jeng o, gwɔ̀m o a pe vɛ́ bemât como tanga bemât nuyel mɛn, ko a tele na yɛn wɔ na regyɛng bemat o. Jeng de bemat o ba di gwɔ̀m bemât como mo tanga bemat mɛ, yɛn a tik dâk Bulus o. 33Yɛ gwɔ̀m o a vey, a vo Bulus o, ko a tɛ̀, be rɔgɔs hɛ na ngyang bya. Ko a rangâl bemat, a ye, “Mwat womo a sé wà arɛt? E yɛ̌ pyɛ de a ra arɛt?” 34Yɛn a hwo gbɔ, behak be tē yet ko behak be tē yet. Ko yaga gwolwɛlɛ mo, gwɔ̀m o a tɔk wok retîn pyɛ mo wɛt. Yaga ano, a tɛ̀ bemât como mɛ be wɔ́ na Bulus e kwɔ̂n fwom mɛn. 35Ko jeng de ba wul nekwɔn turus, a sé a bemât como mo gbing-gbing na yɛn a jut ɛ e rak o, yaga regyɛng bemat o ba ra yol sede bemat lolong. 36Yɛn mwa yɛn a raa hɛn, ko ba dak sekun, ba tē, “Bē wey na yɛ!”
Bulus a ha na a dul mɛ̀ tó mɛ
37Sede bemât como mo ba vey bagat na be yel na Bulus e kwɔ̂n fwom mɛn, Bulus o a yâng gwɔ̀m mɛn, “Kɛ hwô simo na me hanat na hwo bɛ?”
Gwɔ̀m o a langat hɛ, a yang ɛ, “Hwà tɔk relêm BeGirik arɛt? 38Hwà sé WoMisra wane de e neshey de ná kwey a tɛ̀ BeYuda be sogo nehywɛ wɛt arɛt? Yɛ mo a hwɔtɔ bemat gu banaas (4,000) wɔ e hey na be ra yol na wot; ba tang ɛn, à Bemât Nebǎ.”
39Bulus a toyo a yɛ, a yang ɛ, “Me ma sé WoYuda yi e bak sevwêl Kilikya. Ma sé mwât gbɔng repomô Tarsus de ra vɔk reza rerey e jey. Kɛ hwô simo a me na me hanat na bemat vemo bɛ?”
40Gwɔ̀m bemât como mo a simo. Ano kwong, Bulus a tumal e ra nekwɔn turus o, a nára vwɔ mɛ e gwi na a ha na bemat. Jeng de yɛn a sǎ yuu, a hwo ha na yɛn na relêm BeYuda, a yang ɛn:
Iliyochaguliwa sasa
Tomong Betom Yɛsu 21: bomBI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
