Roma 9
9
Kaisaleŋo Yuda Ŋei Ŋerep Magukoune Mawesakonge Eŋane Pauloŋo Qom Wikin Detke
1Na Kristo wane ŋei, so na isi mi ramaile, na don iwa ramaile, yemo welekatne. Naŋane wetne Asu Koboboineŋo warekaki paki, yaleka ma qelaŋane nolatmaikane, na isi mi ŋidanmaile, don welekatne eya iwa yale, 2na qom borik detmaile, yemo zok kakapa, Yuda ŋei ŋerep magukopne eŋane qomne wikin nanmaike, tako rakot nae sola bikumne so weŋem sotakne! 3Eŋane rawe paki, na maine Kaisale wane sowa bano waketpe paki, Kristo qeliŋkakalane ewekewe rap. 4Eŋe Kaisaleŋo Yuda ŋei ŋerep ma wesake bira onge, eŋane ŋei ŋerep magu. Eŋe eŋine dokoine ebuke, so eŋine qeli ewe zonomine eŋe weneŋ ebonge, eŋe eŋerop tako rakot okangoi, paki ra rokop don ebonge, eŋe bakom mawa mawa wele makoi, eŋe Kaisale wane kisi maep don eya mawarekoi. 5Eŋe Yuda ŋosa wili wilikopene ŋetne eŋano ŋine wakongoi, eso eŋane tego eya ŋine Kristo eŋe mo ŋei kepe sola ma more kepo wakonge, eŋe mo tingo ra edan okange eŋe mane mi motkeke. Oŋo yeye kine kine korop qeli so kepe pamaike, eŋe eya wane ma wakon ma wakon so Waom okane ware-ŋonmaike, eya wane ŋene Kaisale maine bakomine kitokene, yemo naso baŋem naso baŋem! Weleka.
Mali Malip Korop Eŋe Kaisale Wane Magu
6Na Kaisale wane kisi maep don yewa wele mi wakonge, yale mi ramaile, onoka wane Israel magu eŋe koropka Kaisale wane maguka mi ma wesakonge. 7Me Abraham wane ŋosa wili wilikoune eŋe koropka Kaisale wane dokoine mi okangoi. Kaisaleŋo Abraham alakan don iwa yale olatke, “Isak wane doko ŋosakoune edoka, baŋ wakon onbe, geŋane biŋek okanikei.” 8Don eya wane kine yemo iwa yale, ŋerep medep solaŋoka Abraham wano wakongoi, eŋe Kaisale wane ŋerep medep mi okangei, eya wane turuŋine yemo, Kaisale wane don ra togoleke, eya wane weleine ŋerep medep wakongoi, eya edoka Abraham wane ŋosa wili wilikoune wele okangoi. 9Kaisale donine iwa yale ra motki pake, “Naso motmaile, yewa bomileki, na baŋ koso zinge sariwe, Sara eŋe medep mane baŋ mayake.”
10So weku iwaka mida, Rebeka wane gipoletkine ere magaetne wekuka, ŋenane qerakze Isak. 11Ere nagaetne kotino ŋine wakone, kine kine maine me qotkoine mane mi okanbik paki, nagaetne kotinoka metpik, Kaisaleŋo Rebeka olale rake, 12“Medep suwaine oŋo ŋole nigatne eŋane qelit qeyake.” Kaisale eŋe don yale raki, ere baŋ ŋado atiksipo wakongoik, eya wane Kaisale wane don wele okaniyakane okange. 13Eya wane Kaisale wane ekapko iwa yale ramaike, “Na Yakop wane similenange, ŋo Esau wane baune wake.”
14Eya wane ŋene daleo raikene? Kaisale eŋe masi maine mi okanmaike me? Yale Midakaka. 15Eŋe Mose olale rake, “Na ŋei mane loloŋkawe ra, baŋ loloŋ kakale, so ŋei mane wet pesek okan kawe ra, na baŋ wet pesek okan kakale.” 16Eya yemo ŋei wane similane, me urata mamainane mida, yemo Kaisale wane wet pesek, eya wane. 17Eya wane Kaisale wane ekapŋo Parao iwa yale olatmaike, “Na kine iwa yale wane ge ŋei waom bira gangole, na geŋano zonomne ma qelaŋanbe, ge naŋane zonom yewa sikan onikene, paki eŋet biŋekne ranom suwa ariki kepe baŋem ŋei korop eŋe desikei.” 18Eso eya wane Kaisale eŋe ŋei mane loloŋkawe ra, loloŋkayake, paki ŋei mane wetne ma siukewe ra, ma siukeyake.
Kaisale Wane Sot Osi Osi So Wet Pesek
19Ŋinano ŋine maneŋo baŋ iwa yale nolale rayake, “Kine yale pamaikeo, yemo Kaisale eŋe onoka wane ŋei wane sot eya wane detki bori okanmaike? Ŋei maŋo Kaisale wane simile eya qe esopkayake?” 20Kimane, ge maŋo siluŋ Kaisale don maine mainge olasikene? Gola qakatakŋo mamaine, eyaŋo ŋei gola make, eya mi olale rayake, “Ge onoka wane na iwa yaline neukone?” 21Paki eŋe qakatakŋo kap me gola etke mo mamaine mat koto metmaike. Mane eya mo eŋe pelekine so kotine ŋara mi nenine, baŋ Kaisaleŋo rasipoke yeine birayake, ŋo mane eya mo eŋe kap me gola maine eya mo ŋara weleŋo kotino metmaike, eya mo mat koto metki, Waomŋo baŋ sese-kayake.
22Kop weku eyaka welekatne Kaisale eŋe okange. Eŋe eŋine sot osi osiine eya wane kine sikan ongi paki, zonominane kine didiwo maki wakongi, detkaikei wane. Eya wane eŋe siluŋ ŋeiwa sot osi osi okankakoi, eŋe mo mataliongi midakei wano ŋine, ebu seseonge. 23So eŋe qeli ewe zonomine maune papaine, eya yaleka ma wakone ŋenano qakki wake, ŋene wet pesek kapkoune, ŋenano ŋine natne eŋe eŋane qeli ewe zonomine maikei wane mo ewekkoi. 24Eŋe ŋene ŋedane newanŋon okanmaike, Yuda ŋei eŋane keuwo ŋineka mida, qelaŋ, Yuda ŋadino gemami, eŋane keuweno ŋine weneŋ edora newan-ŋonge. 25Eya wane Hoseyaŋo ekapko iwa yale qeke,
“Ŋei ŋerep naŋane biŋek mi gemami, na baŋ edora rakale, ‘Naŋane ŋei ŋerep.’ Ŋei ŋereppa na eŋane mi simin nange, na baŋ edora rakale, ‘Naŋane wasekopne.’ 26So matpa diyawao edane rakole, ‘Ŋine naŋane ŋei ŋerep magu midaka,’ yewa eŋe baŋ mat yewaoka edora rakale, ‘Ŋine Kaisale gegeinerop eŋane gipon boraso koune.’ ”
27So Isaiyaŋo Israel eŋane don iwa yale rake, “Israel ŋei ŋerep eŋe suwa leuleu paki kiwet mezeno qalak pamaike, yale okangei, ŋo siluŋ etkemdeŋoka baŋ menaŋgei. 28Waom eŋe baŋ don raki qoeki ikopka kepe baŋem ŋei turuŋine ebon wareyake.” 29Eya yemo Isaiyaŋo don mane mikepka iwa yale rake, eya wane kop, “Kaisale Togole welaine oŋo doko ŋosa natne qeliŋŋonge ra, yemo ŋene Sodom welainane, qelaŋ ŋei borikine eŋane sot wane kop marat kaŋem rap, so ŋene Gomora welaine, qelaŋ ŋei borikine eŋane sot wane kop okanŋem rap, yemo ŋene korop siukŋem rap.”
Israel Eŋe Mali Malip Koboinerop Gege Wane Mi Koboekoi
30Eya wane ŋene daleo raikene? Iwa yale, qelaŋ ŋei eŋe menage koboe okangei wane mi soringekoi, ŋo mali malipenane ra more, Kaisale wano menage koboe okangoi. 31Pakiso Israel ŋei Kaisaleŋo ma wesake biraonge, eŋe ra rokop don teweke more, menage koboe Kaisale wano okangei wane soringekoi, eŋe eya mi marat kakoi. 32Eyamo onoka wane? Iwa yale wane, eŋe mali malipenane rau paki, eya mi okangoi. Eŋe yaup urata mamaenane ra more okangoi, pakiso eŋe numao wesi pake, yewao kiyeene quŋ qe ket enguke so lagulok nagu-warekoi. 33Eya wane Isaiyaŋo Kristo wane ra more don saeŋine Kaisale wane ekapko iwa yale ramaike,
“Kau, Na Zion kepe yewao wesi mane motmaile, yewao ŋei ŋerep kiyeene baŋ lagulok nagu-warekei, ŋo ŋei mane eŋe detluk kayake, eŋe mi gamu kayake.”
Iliyochaguliwa sasa
Roma 9: onsNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2012, Wycliffe Bible Translators, Inc. All rights reserved.
