2 Korinti 1
1
Pauloŋo Ekap Etke Iwa Qe More Korinti Doku Tau Tau Magu Ebonge
1Kaisale eŋine wetinane Paulo na Yesu Kristo wane aposolo okane more urata mamaile, iwa makalane neu biranange, so kimaze Timoti mali malipze weku.
Na kibi iwa Kaisale wane doku tau tau magu Korinti matko gemami, so Kaisale wane ŋei ŋerep korop Akaiya kepeo ge arimami, ŋinane qemaile. 2Kaisale Magaze so Waomze Yesu Kristoŋo riwe moriyan so wet pesek maine ŋiboniyake.
Pauloŋo Kaisale Bakomine Kitoke
3Ŋene Kaisale bakomine kitoŋem, eŋe Waomze Yesu Kristo wane Magaine, wet maep Magak eŋe Kaisale, eŋano ŋine qesi qesiŋ korop ŋenano sari okanmaike! 4Eŋe umat kine kineze wakonŋon-okanmaike, yewao ŋene korop qesiŋ-ŋon okanmaike. Eso eya wane ŋene eweke more ŋei natne eŋe umatkine kine maratkau, ŋene qesiŋ-onikenane zonomba weku, ŋene ŋedom Kaisale wano ŋine makone, yewaŋoka qesiŋ-onikene. 5Eya yemo, Kristoŋo ŋenane ra more, wikile zok suwaine manerop dere more seukki, eŋane wikile yewaŋo ŋenane gege mageze motki rokop-ŋonge, wikile eya wane yale waka eŋerop wikile weneŋ detmaine, so Kristorop gemaine, eya wane Kaisale wane zonom kakapa manerop qesiŋ-ŋongi, ŋene yaleka wetze peseyake. 6Ŋene wikile desikeneo, yemo ŋine qesiŋ-ŋuniyake, so gege ŋine wakoniyake, ŋene wikile kutzo waki qesiŋ-ŋoniyakeo, yemo ŋine yaleka wikile kutŋino waki qesiŋ ŋuniyake, so zonom ŋibongi sorin gekei, so togogole mage, ŋene wikile detmaine, ŋine yewaka desikei. 7Eso ŋene wetzeŋo ŋine togogole okorakei wane detmaine, eya mi pelekeyake. Ŋene detmaine, yemo ŋene wikile detmaine, ŋine wikile weku yewaka detmami, so ŋene zonom ŋebongi mamaine, ŋine zonom yewa ka mamami.
8Kimakopze, ŋene Asiya kepeo umat wakon-ŋonge, eya wane wet ŋine qe lotkekenane okanmaine. Umat kutzo motkoi, eyamo zok kakapa so umatne teine, eya wane ŋene wetze korop qorodoge ketki rakone, ŋene mo seukkene, ŋo wisika gekene, eyamo mi detkone. 9Ŋene seukkenane rakoke kutzo motkoi, yale wetkekone. Tanik eya wakongi, ŋene welekatne zonomze mida leleke. Ŋo siluŋ masi eyaŋo wakone more ŋebuki, ŋenze zonomgo kito gekenane mida. Ŋene Kaisale weku detlukka more eŋano kito togole gekenane, Asuŋo ŋei seuseune ebuki wisikae wiye okanmami. 10Kaisale eŋe wikile kakapa seuseuinerop eya wane meto ŋine makok-ŋonge, so baŋ makok-ŋoniyake. So ŋene wetze eŋano more detluk-kamaine, yemo eŋe baŋ koso manerop makok ŋoniyake. 11Ŋine meŋe meŋen-ŋineŋo ŋene qesiŋ-ŋonikei, ŋine yale okangei, yemo ŋenane ra more meŋen-kaikei, meŋe meŋen eya wane turuŋine Kaisaleŋo mosop-ŋoniyake, yemo riwe moriyan, pakimo ŋei loutne eŋe baŋ aŋage more ŋenane Kaisale oi bakom okankaikei.
Pauloŋo Korinti Ariyakane Wetkeke Naso Eya Qeki Kereke
12Ŋene batneka okanmaine, yemo wet dereretzeŋo iwa yale detmaine, ŋene kepe iwa wane kotino gege mageze mo maineka pamaike, so tako rakotze ŋinanoken siluŋ koso manerop koboboine, so mayakakatne pamaike. Eya mo kepe sola wane dereretko ŋine Midakaka! Eya yemo Kaisale wet maep Asu wano ŋine. 13Ŋene kibi iwa ŋine yaup mi qe ŋibonmaine, ŋine eya maine dapore more kine detlukkei wane. Na detmaile, ŋine baŋ korop detluk warekei. 14Iwa yemo ŋine sisineka detmami, eya wane ŋine ŋenane batze maine okanikei, ŋo baŋ Waom Yesu sariyake, naso yewao ŋene yale waka ŋinane bat ŋine baŋ okanikene.
15Na eya wane korop mo detwarekole, onoka wane, na mikepka sari ŋine ŋunikalane mo wetkekole, eya yemo ŋine riwe moriyan atak etke maine maratkau paki wet pesek desikei wane. 16Na sari ŋunbe paki Makedoniya arikalane, so koso Makedoniya ŋine zinge sari ŋunbe, ŋido zonom qesiŋ nanbi paki, koso birananbi Yuda kepeo arikalane nange. 17Na dere qekakole me, naso urata iwa makalane nange yewao? Na nae wet dereretno ŋine kepe ŋei maneŋo okanmaike yale, naso motpe paki, naso weku yewaoka eweke ikop, “O maine!”, me “Mida,” rakale me? 18Welekatne Kaisale eŋe eŋine don me dereret eya korop modat waremaike, eya wane na yale waka welekatne ŋidanbe, na don me dereret yaleka ramaile, eya mo wet etke, “O, maine,” me “mida,” na yale mi raikale. 19Yesu Kristo, Kaisale wane Gipole eŋane Don ŋene ŋinane keu ŋino ŋidangone, Silwanus, Timoti so na, eyamo “O maine,” me “Mida” eya Midakaka, yemo Eŋino weku eya mo naso baŋem “O maine,” pa arimaike. 20Mokaka qei kino Kaisaleŋo Kristo eŋe ma sariki paki, urata daleo mayake, eya wane done zok loutne edane sake, don eya wane weleine Yesu Kristo wano marat kamaine yemo “O maine.” Eya wane ŋene eŋane ra more “Welekatne” ramaine, qeli ewe zonom yemo Kaisale wane. 21Iwa yemo Kaisale eŋe oŋom ŋene Kristo wano ŋinerop weneŋ ma togole biraŋongi gegeze pamaike, eya detmaine, eya yemo Kaisale oŋom ŋene mapoke bira ŋonmaike. 22Paki, eŋe eŋine biŋek okanikenane, eŋine kibiine ŋenane kutzo motke, so eŋine Asuine ŋenane kotozo more ŋebonge, eya yemo ŋado wele sariyake, eya wane.
23Ŋo na siluŋ koso Kaisale oramaile, naŋane kotonane kine detki paki, turu ŋine niniyakane. Eya yemo ŋine sese ŋunikalane rawe paki, ŋinano Korinti mi sari more yeine metkole. 24Ŋedo ŋine ŋei waom okanŋune more raŋem, ŋine detluk-kaikei wane mida. Onoka wane ŋine mali malipko gesoke togole okoramami, eya wane ŋene urata ŋinerop mamaine, ŋine wet pesek desikei wane.
Iliyochaguliwa sasa
2 Korinti 1: onsNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2012, Wycliffe Bible Translators, Inc. All rights reserved.