1 Kirinti 16
16
Asu Magu Yerusalem Matko Gemami, Eŋane Wesi Ma Wakonikei Wane Edangoi
1Iwa yemo, wesi natne ma qeturage more, Kaisale wane doku tau tau magu eŋane Yuda kepeo motpi ariyakane done. Ŋine Yerusalem matkoŋine doku tau tau magu eŋane wesi mosikei wane rau paki, yemo Galatiya kepeo ŋine doku tau tau edane mauluk okangole, Ŋine yalewaka okanikei. 2Ŋine soda baŋem koropŋo wesi soda mane kotino maratkaikei, kop bonep bonep natne mapokeu, paki mat ŋino more ware gekei. Eso na ŋado sari lotkewe, ŋine wesi mosikei wane urataine mi maikei. 3Ŋado na sari lotkewe, yemo ŋidom ŋei natne ma wakononbi, na kibi qe ebonbe paki, taleonbe eŋe kibi warop ŋinane wesi, wet pesek wane bakom ma Yerusalem arikei. 4Eso na arikalane naniyakeo, yemo maine baŋ narop weneŋ arikene.
Pauloŋo Eŋano Ariyakane Naso More Ebonge
5Na Makedoniya kepeoka ari nitoki, ŋado ŋinano baŋ ukale. Na Makedoniya kepeo mikepka ari more yaup yuwane ukale. 6Na ŋinano umore naso nigatne ŋinerop gekale, ge wawe koya naso qoeyake mane. Pakimo baŋ mat maneo arikalane okanbe, ŋido maine qesiŋnanbi numa arikale. 7Na yaup numaka sari ŋune more ikop mi yuwanŋune arikale, Waomŋo det naniyakeo, yemo na naso natne ŋinerop gekalane wetkemaile.
8Ŋo iwamo Epeso matko gewe Asu ketkane peyada bomileyake. 9Onoka wane, naŋane kisi maep qelit qewe wele doku tau tau magu maine loutne wakonikei wane, madet suwaine mo Waomŋo makoke ninmaike. So mane yemo kisi maep wane ŋabaine loutneŋo ŋene ŋabaŋone gemami.
10Ŋo Timoti ŋinano uyakeo, ŋine kima okankau, ŋinane keu ŋino kaet sola misuk geyake. So ŋine weneŋ desikei, eŋe Waom wane urataka na mamaile, yale eŋe mamaike. 11Eya wane eŋane detpi ketkele okangi, mi ŋadekkaikei, ŋine wet pesek okanka more qesiŋkau, numaine maineka takotke ariyake, paki koso zinge naŋano sariyake, na so doku tau tau natne ŋene eŋane tomaka gemaine.
12Eso kimaze Apolos wane don yemo iwa yale, na atakine atakine ŋinano doku tau tau natne eŋerop ŋuniyakane qebinka okanmaile, ŋo eŋe mi ewekmaike, eŋe iwaoka mida, naso maneo detki kopkeki, ŋinano baŋ uyake.
13Ŋine diyam ŋine maikei, pakiso mali malipko gesoke togole okorakei, so sorin borin okane togolekei. 14Yeye kine kine korop yewa wet maepko okanikei.
15Kimakopne, ŋine iwa Stepanas so magukoune eŋane mo det okanmami, eŋe Akaiya ŋine, edo lewine alakane wetene mainge kisi maep dere more, doku tau tau magu okangoi. Pakimo, enŋene simile enane Kaisale wane ŋei ŋerep magu eŋano urata suwaine ma okanmami. 16Na qebin-ŋunmaile yemo ŋine ŋei yaline eŋane bane-eno gekei paki, eŋe so ŋei natne kisi maep urata ma more wikile det okanmami, eŋe onbi ŋetne kop ŋine okangei.
17Stepanas, Potunatos, so Akaikos, eŋe naŋano sariu, na wet pesek okanmaile, onoka wane, eŋe ŋido mi sariu, edo ŋinane tungo sari don kisi okannanimi. 18Paki ŋine wet pesek okan ŋunmami, yaleka na wet pesek okannanimi. Ŋine ŋei yewa eŋane detpi menageyake.
Wet Pesek Don Qoiqoine
19Doku tau tau magu Asiya kepe sotno gemami, eŋe ŋinane kaiwe maine ra more don motpi sarimaike, Akwila so Prisila so doku tau tau magu weneŋ, erane matko lewaŋ okanmami, magu koropŋo kaiwe maine ra more don motpi sarimaike. 20Kimakopze iwa korop eŋe kaiwe maine ŋinano motpi umaike.
Ŋine ŋidom yale waka kimao kaiwe maine ra more lulu zam zam koboine okannagu gekei.
21Nae meteneŋo kibi iwa, qem mawa okanŋune more kaiwe maine ra qemaile, na Paulo.
22Mane eŋe Waom wane mi siminkaki, Waom wane sowa eŋano payake, eŋe sora gerepko kesiyake!
Grik don ra okanmami, “Maranata!” Kine iwa yale, “Waomze sarinom!”
23Waom Yesu wane wet menaŋŋo ŋinano pawareyake.
24Naŋane wet maepneŋo Yesu Kristo wane ra more, ŋinano korop pawaremaike.
Iliyochaguliwa sasa
1 Kirinti 16: onsNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2012, Wycliffe Bible Translators, Inc. All rights reserved.