Mateo 22

Dalilan sabab pagjamu-jamuhan si pagkawinanin

(Lukas 14:15-24)

1Manjari magdalilan ne isab si Isa si siye, paꞌinne, 2“Pagbayaꞌ Tuhanin kuweꞌ inin. Niyaꞌ dambuwaꞌ sultan magpanyap pagjamu-jamuhan hadje peggeꞌ kinawin anakne lellahin. 3Pagtekka ellew pagjamu-jamuhin, dinaꞌak weꞌ ne meꞌ daraꞌakannen pī ngeddoꞌ meꞌ aꞌa bakas tabatikin. Saguwaꞌ gaꞌi siye mabayaꞌ pī si pagkawinan. 4Ubus ngandaꞌak ne isab iye meꞌ daraꞌakanne seddili hap pī, paꞌinne, ‘Akahanun bi meꞌ aꞌa bakas tabatikin weꞌ tahak ne kinakanin, ubus ne sinumbaliꞌ meꞌ sapiꞌ lellahin duk meꞌ anak sapiꞌ malemmekin duk panyap ne kēmon. Hangkan subey ne siye pitu si pagjamuhan.’ 5Saguwaꞌ gaꞌ ngasip meꞌ aꞌa tabatikin. Tahalaꞌ siye, dambuwaꞌin hap pī si tanaꞌne, dambuwaꞌin si tindane, 6duk sinduwehin siniggew weꞌ de meꞌ daraꞌakan sultanin bu pinogpog duk pinapatey weꞌ de. 7Manjari astel teꞌed sultanin. Dinaꞌak weꞌ ne meꞌ sundalunen pī monoꞌ meꞌ aꞌa mapatey meꞌ daraꞌakannen. Daꞌakne isab ineggas puwebloden. 8Ubus miyaꞌan paꞌin sultanin si meꞌ daraꞌakannen, ‘Memes ne kinakanin saguwaꞌ meꞌ bakas tabatikin gaꞌi ne pataꞌ pitu. 9Na, kuweꞌitu pī kaꞌam si meꞌ kalān-lānan duk boꞌohun bi kēmon aꞌa takasuwaꞌbin pitu si pagjamuhan.’ 10Manjari pī ne meꞌ daraꞌakannen si meꞌ kalān-lānan duk binoꞌo weꞌ de kēmon aꞌa takasuwaꞌden, dupang duk petten, gaꞌ biddaꞌ. Hangkan pennoꞌ weꞌ aꞌa lumaꞌ pagkawinanin.

11“Pagdiyalem sultanin mayaman meꞌ aꞌa malaꞌihin, niyaꞌ takitene laꞌi lella semmeknen gaꞌi talep para si pagkawinan. 12Paꞌin sultanin si lella miyaꞌan, ‘Bagay, saꞌingge kaꞌumaseknu mapituhin, bu gaꞌ kew magbadjuꞌ para si pagkawinan?’ Gaꞌ nambung aꞌahin. 13Manjari paꞌin sultanin si meꞌ daraꞌakannen, ‘Ingketanun bi tangan aꞌa iyan duk bettisnen duk pabukutun bi pinadem lindem. Magmatey meꞌ aꞌahin laꞌi duk magtageꞌot meꞌ impenden hawal pagsusunden.’ ”

14Manjari paꞌin si Isa, “Ekka aꞌa ilinganan weꞌ Tuhanin dinaꞌak patuhut si iye, saguwaꞌ kulang du tapeneꞌin.”

Bang maghayed sukey ke si Sultan Nakuraꞌin atawa gaꞌi

(Markus 12:13-17; Lukas 20:20-26)

15Manjari tahalaꞌ meꞌ Pariseohin duk magisun-isun siye bang saꞌingge panguhi-nguhide si Isahin si meꞌ bissānen. 16Ubus dinaꞌak weꞌ de meꞌ tindegden duk meꞌ tindeg Sultan Herodin pī pu si Isa. Pagtekkade laꞌi paꞌinde pu si Isa, “Tuwan, kataꞌuhan kami weꞌ bennal hadja meꞌ bissānun duk bennal meꞌ panoloꞌnu sabab meꞌ kabayaꞌan Tuhan hininang manusiyaꞌin. Gaꞌi kew suse bisan ine tapikil aꞌa si kaꞌuhin, bisan pe siye meꞌ aꞌa taga kapatut. 17Hangkan akahanun kami bang ine paꞌinnu. Patuhut ke si saraꞌte bi magbayed sukey si Sultan Nakuraꞌ bangsa Romahin atawa gaꞌi?” 18Saguwaꞌ kataꞌuhan si Isa pangakkalden. Paꞌinne si siye, “Kaꞌam iyan magmā-mā hadja. Bayaꞌ ku kuhi-kuhibi. 19Pakitehanun bi ku sīn pagbayed sukeyin.” Ubus binoꞌohan iye weꞌ de sīn tuwas. 20Paꞌin si Isa si siye, “Pattaꞌ sine teꞌ duk sulat sine si sīn inin?” 21Paꞌinde, “Pattaꞌ Sultan Nakuraꞌin duk sulatnen.” Manjari paꞌin si Isa si siye, “Hangkan pangurungun bi si Sultan Nakuraꞌin sukuꞌ si iyehin, duk pangurungun bi si Tuhan sukuꞌ si Tuhanin.” (Hātinen, magbayed kaꞌam sukey duk pangurungun bi dibin dambūs-būs si Tuhan.) 22Pagkalede inin, ulaliꞌ siye manamal duk tahalaꞌ ne siye.

Tilewde si Isa sabab kaꞌellum balik meꞌ pateyin

(Markus 12:18-27; Lukas 20:27-40)

23Ellew miyaꞌan niyaꞌ pī pu si Isa meꞌ Sadduseo, meꞌ Yahudi gaꞌi kahagad weꞌ ellum balik meꞌ pateyin si ellew dambuli. 24Tilewde iye, paꞌinde, “Tuwan, bakas sinulat weꞌ si Musa, paꞌinne, ‘Bang niyaꞌ lella, bu matey iye gaꞌ niyaꞌ anakne, subey ne maganda salinen si balu miyaꞌan duk niyaꞌ tubuꞌ sakanen.’ 25Manjari niyaꞌ miyaꞌan pituꞌ lella magpungtinaꞌi bakas patennaꞌ tuꞌu si kami. Maganda sakahin saguwaꞌ matey iye gaꞌ niyaꞌ anakde. Ubus salinen maganda si baluhin. 26Matey iye gaꞌ du isab niyaꞌ anakde. Damikkiyan du isab mapasunuꞌ si iyehin. Kapituꞌ magpungtinaꞌihin maggantiꞌ nganda baluhin duk matey siye gaꞌ niyaꞌ anakde. 27Ujudnen matey isab dendehin. 28Na, Tuwan,” paꞌinde, “si ellew pagellum balik meꞌ pateyin, anda sine iye, bu pituꞌ magpungtinaꞌihin makaꞌanda iye?”

29Nambung si Isa, paꞌinne, “Salaꞌ kaꞌam. Hangkan kaꞌam salaꞌ peggeꞌ gaꞌi tasabutbi tasulat dem kitabin duk gaꞌi isab kataꞌuhanbi balakat Tuhanin. 30Peggeꞌ bang ellum ne balk meꞌ pateyin,” paꞌin si Isa, “kuweꞌ ne siye meꞌ malaꞌikat si surgaꞌin. Gaꞌi ne siye maganda atawa magella. 31Na, pasal meꞌ aꞌa matey weꞌ pinakellum balk, gaꞌ ke bakas tabatsabi bang ine pinaꞌin Tuhan si kaꞌamin? 32Paꞌin Tuhanin, ‘Aku Tuhan pagtuhanan disi Ibrahim duk Isahak duk si Yakub.’ Tuhanin Tuhan meꞌ maꞌellumin, dumaꞌin Tuhan meꞌ pateyin.” (Hātinen weꞌ bisan disi Ibrahim duk Isahak duk si Yakub tiggel ne matey, ellum siye si surgaꞌ peggeꞌ inisbat pe weꞌ de Tuhanin.) 33Pagkale inin weꞌ meꞌ aꞌa mabanesin, ulaliꞌ teꞌed siye sabab panoloꞌnen.

Daꞌakan malangkewin

(Markus 12:28-34; Lukas 10:25-28)

34Pagkale meꞌ Pariseohin weꞌ gaꞌ taꞌu meꞌ Sadduseohin nambungan si Isa, magtipun siye duk pī siye pu si Isa. 35Dangan siye guru pandey si saraꞌ āgama. Niyaꞌ tilewne panuleyanne si Isa. 36“Tuwan,” paꞌinne, “dem saraꞌ, inggehin daꞌakan malangkew amban kēmonin?” 37Nambung si Isa, paꞌinne, “Inin, ‘Subey kalasahannu Tuhanin, Panuhutannun dambūs-būs ateynun duk pikilannun duk basagnun.’ 38Iye inin,” paꞌin si Isa, “daꞌakan malangkew amban kēmonin. 39Duk pangandaꞌakan mapasunuꞌin saliꞌ du isab langkewnen, ‘Subey kalasahannu saweꞌnun kuweꞌ pangalasanu dinun.’ 40Kēmon meꞌ daꞌakan dem saraꞌ pangurung Tuhan si Musahin duk kēmon panoloꞌ kanabihanin sakup dem duwe daꞌakan inin.”

Panilew sabab Almasihin

(Markus 12:35-37; Lukas 20:41-44)

41Manjari paꞌin si Isa si meꞌ Pariseo bakas magtipunin, 42“Ine paꞌinbi sabab Almasihin, tubuꞌ sine iye?” Paꞌinde, “Tubuꞌ Sultan Daꞌud.” 43“Bang bennal iyan,” paꞌinne, “weꞌey paꞌin si Daꞌud sābu pagbayaꞌan iye weꞌ Niyawa Sutsihin weꞌ Almasihin Panuhutannen? 44Paꞌinne dem kitab,

‘Missā Tuhanin si Panuhutankun.

Paꞌin Tuhanin, dayiꞌ kew, ningkoloꞌ kew tuꞌu si kanawananku, tuꞌu si paningkoloꞌan mabangsahanin.

Bettadku du meꞌ bantanun diyawaꞌ pat bettisnu.’ ”

45Paꞌin si Isa, “Bang Almasihin inēnan Panuhutan weꞌ si Daꞌud, saꞌingge kajarinen weꞌ tubuꞌ Sultan Daꞌud iye?” 46Ubus gaꞌi ne siye taꞌu nambungan iye duk kemuwe ellew miyaꞌan gaꞌ ne niyaꞌ aꞌa makatawakkal nilew iye ine-ine.

Iliyochaguliwa sasa

Mateo 22: yakV

Kuonyesha

Shirikisha

Nakili