Mateo 21

Pamahadjede si Isahin papīne si Awrusalamin

(Markus 11:1-11; Lukas 19:28-40; Yahiya 12:12-19)

1Pagtapit ne disi Isa si Awrusalam, duk takitede ne kalumaꞌan Betpagehin laꞌi si kūd Jaitun, dinaꞌak padehellu weꞌ si Isa duwangan tindegnen. 2Paꞌinne si siye, “Pī kaꞌam si kalumaꞌan si dehelluhanbi miyaꞌan. Pagtekkabi laꞌi, magtawus kaꞌam iyan ngite dambuwaꞌ asnu duk anakne dinagtel laꞌi. Lekkahun bi duk boꞌohun bi pitu si aku. 3Bang niyaꞌ nilew kaꞌam bang weꞌey eddoꞌbi, paꞌinun bi, ‘Niyaꞌ kagunahan Panuhutanin si iye,’ duk daꞌakne du iyan binoꞌo magtawus.” (Asnuhin kuweꞌ bantuk kuraꞌ.) 4Pinalabey inin duk tuman binissā nabi dem kitabin, paꞌinne,

5“Akahanun bi meꞌ aꞌa Awrusalamin, ‘Payamanun bi, tekka du sultanbin, diyawaꞌ ateynen duk pasakey iye diyataꞌ anak asnu.’ ”

6Manjari hap pī ne meꞌ tindegnen duk hininang weꞌ de sa pangandaꞌakan si Isa siyehin. 7Binoꞌo ne weꞌ de asnuhin duk anaknen duk ilampiruhan weꞌ de duk meꞌ semmekde, ubus bu pasakey ne si Isa. 8Ekka isab meꞌ aꞌa laꞌi. Binellat weꞌ de meꞌ semmekden si lān palabeyannen. Sinduwehin notoꞌ meꞌ pange dawenan duk kinanat weꞌ de si lān pamahadjede si Isa. 9Magellang-ellang meꞌ aꞌa si dehelluhan si Isahin duk meꞌ si dambulihannen. Ngalingan siye, paꞌinde, “Pudjite bi tubuꞌ Sultan Daꞌudin. Pudjite bi pinapitu weꞌ Tuhanin. Pudjite bi teꞌed Tuhanin.”

10Manjari pagtekka si Isa si Awrusalam, bengngangan aꞌahin kēmon duk paꞌinde, “Sine aꞌa inin?” 11Paꞌin meꞌ aꞌa mabanesin, “Inin si Isa, nabi amban Nasaret si lahat Jalil.”

Pī si Isa dem langgal hadjehin

(Markus 11:15-19; Lukas 19:45-48; Yahiya 2:13-22)

12Manjari padiyalem si Isa dem langgal hadjehin duk binudjew weꞌ ne kēmon meꞌ aꞌa magdagang duk meꞌ magbelli diyalem lumaꞌ Tuhanin. Ilintuwadan weꞌ ne meꞌ lamisahan meꞌ aꞌa magsambiꞌ-sambiꞌ sīnin. Ilintuwadan isab weꞌ ne meꞌ paningkoloꞌan meꞌ aꞌa magdagang assang pagkulubanin. 13Paꞌinne si siye, “Tasulat dem kitab, paꞌin Tuhanin, ‘Lumaꞌkun inēnan du lumaꞌ pangampunan.’ Saguwaꞌ kaꞌam,” paꞌin si Isa, “hininang weꞌ bi lumaꞌ Tuhanin kuweꞌ lumaꞌ patapukan meꞌ aꞌa panangkew.”

14Meꞌ aꞌa mapessekin duk meꞌ makukuꞌin pī si iye dem langgal hadjehin duk pinakoleꞌ siye weꞌ ne. 15Saguwaꞌ astel teꞌed meꞌ nakuraꞌ imamin duk meꞌ guru si saraꞌ āgamahin pu si Isa pagkitede meꞌ hinanganne makaꞌulaliꞌin, duk pagkalede meꞌ mākanakin ngalingan laꞌi dem langgal magpaꞌin, “Pudjite bi tubuꞌ Sultan Daꞌudin.” 16Paꞌinde pu si Isa, “Takalenu ke bissā meꞌ mākanak miyaꞌan?” “Aweꞌ,” paꞌin si Isa, “takaleku. Gaꞌ ke bakas tabatsabi tasulat dem kitabin, pinaꞌin, ‘Bisan meꞌ mākanak dikiꞌin tinoloꞌan du mudji Tuhanin.’ ” 17Ubus inambanan siye weꞌ si Isa duk hap pī iye si kalumaꞌan Betani. Patennaꞌ iye laꞌi.

Ngalanes kayuhin

(Markus 11:12-14, 20-24)

18Pagsalung ne sasang pī iye balik si Awrusalam, inusan iye. 19Niyaꞌ kitene poꞌon kayu ēnande igira si bihing lān. Hap pī iye, saguwaꞌ gaꞌ niyaꞌ takitene buwaꞌne luwal hadja dawen. Paꞌin si Isa, “Tinagnaꞌan maꞌin gaꞌi ne buwaꞌ balik kayu inin.” Magtawus ngalanes kayuhin. 20Pagkite meꞌ tindegnen miyaꞌan, ulaliꞌ siye, paꞌinde, “Weꞌey enteꞌ magtawus lanes kayu iyan?” 21Paꞌin si Isa si siye, “Sabennal akahante kaꞌam, bang kaꞌam sandel duk gaꞌi teꞌed duwe-duwehan, makajari hinangbi kuweꞌ bakas hininangku si kayu iyan. Duk dumaꞌin hadja iyan tahinangbin. Bang paꞌinbi si punu inin, ‘O punu, tahalaꞌ kew duk pateppad kew pī dem tahik,’ tuhutne du bissābin. 22Bang kaꞌam sandel, tasangkabi du ine-ine pākubi amban Tuhan.”

Tinilew weꞌ de si Isa bang amban kapatutnen

(Markus 11:27-33; Lukas 20:1-8)

23Manjari hap pī si Isa balik si langgal hadjehin duk magtoloꞌ iye si meꞌ aꞌahin. Sasangne magtoloꞌin, pī meꞌ nakuraꞌ imamin duk meꞌ kabahiꞌanin si iye duk paꞌinde, “Ine kapatutnu ngahinang meꞌ hininangnu ellew miyaꞌan? Duk sine mangurungan kaꞌu kapatutin?” 24Sambungan si Isa siye, paꞌinne, “Niyaꞌ isab tilewku si kaꞌam. Bang ku sambunganbi, akahante kaꞌam isab bang ine kapatutku maghinang meꞌ hininangku miyaꞌan. 25Pamandi Yahiya meꞌ aꞌahin, amban kapatutnen? Amban Tuhan ke atawa amban manusiyaꞌ hadja?” Magisun-isun siye, paꞌinde, “Bang saꞌupama paꞌinte bi weꞌ kapatut Yahiya pamandine meꞌ aꞌahin amban Tuhan, paꞌinne iyan, ‘Na, weꞌey Yahiya gaꞌ kahagadbi?’ 26Saguwaꞌ bang paꞌinte bi, ‘Amban manusiyaꞌ,’ na tinalew kite bi si meꞌ aꞌahin, peggeꞌ kēmon aꞌahin kahagad weꞌ Yahiya nabi Tuhanin.” 27Hangkan nambung siye, paꞌinde, “Inday, gaꞌi kataꞌuhan kami bang amban kapatut Yahiyahin.” Manjari paꞌin si Isa si siye, “Na, gaꞌi isab kaꞌam akahanku bang amban kapatutku maghinang meꞌ hinangku miyaꞌan.”

Dalilan sabab aꞌa duk anakne duwehin

28Magdalilan si Isa, paꞌinne, “Ine paꞌinbi sabab inin? Niyaꞌ dambuwaꞌ aꞌa duwe anaknen. Paꞌinne si sakahin, ‘Totoꞌ, pī kew ellew inin maghinang si bulakte bi.’ 29Paꞌin sakahin, ‘Gaꞌi ku.’ Saguwaꞌ ubus miyaꞌan, pinda du pikilannen duk harap pī ne iye si bulakde. 30Manjari hap pī isab aꞌahin si anakne salihin duk daꞌakne isab kuweꞌ pangandaꞌakanne sakahin. Nambung salihin, paꞌinne, ‘Aweꞌ, Ammaꞌ, pī saꞌ ku.’ Saguwaꞌ gaꞌ iye hap pī.” 31Ubus paꞌin si Isa, “Sine siye manuhut kabayaꞌan samanen?” Paꞌinde, “Sakahin.” Manjari paꞌin si Isa si siye, “Sabennal akahante kaꞌam, meꞌ aꞌa madusehanin kuweꞌ meꞌ aꞌa magpāku-pāku sukeyin duk meꞌ dende madupangin, tayimaꞌ Tuhanin pe siye dehellu amban kaꞌam. 32Peggeꞌ pitu si kaꞌam Yahiya magpandi-pandi aꞌahin duk toloꞌanne kaꞌam lān mabentelin bu gaꞌi kahagadbi. Saguwaꞌ meꞌ aꞌa magpāku-pāku sukeyin duk meꞌ dende madupangin kinahagad iye weꞌ de. Duk bisan inin takitebi, gaꞌ du pindahanbi pikilanbin bu kahagad si iye.”

Dalilan sabab likus ubasin duk meꞌ tatungguꞌnen

(Markus 12:1-12; Lukas 20:9-19)

33“Pakale kaꞌam, niyaꞌ pe isab dalilan seddili,” paꞌin si Isa. “Niyaꞌ aꞌa magtanem bāhan ubas pinaluha duk binirang weꞌ ne. Ilowangan weꞌ ne diyawaꞌ pagpeggaꞌan ubasin panawutan boheꞌ ubasin. Ngahinang isab iye payad langkew pamantew-mantewan likusin. Manjari pinatungguꞌan weꞌ ne likusnen si meꞌ aꞌa, pagbahagiꞌan uli tinanemnen. Ubus bu tahalaꞌ iye pī si lahat tala. 34Pagtaꞌabut pagbuwaꞌ ubasin, dinaꞌak weꞌ dapuꞌ likusin meꞌ daraꞌakannen pī si meꞌ aꞌa tatungguꞌnen māku bahagiꞌne si meꞌ buwaꞌ ubasin. 35Pagtekka meꞌ daraꞌakannen laꞌi, siniggew siye weꞌ meꞌ tatungguꞌin. Dambuwaꞌin pinapeddiꞌan weꞌ de, dambuwaꞌin pinapatey duk dambuwaꞌin pinagtibagan weꞌ de. 36Ubus ngandaꞌak ne isab dapuꞌ likusin meꞌ daraꞌakanne seddili hap pī si siye. Ekka siye amban meꞌ dehelluhin. Hininang weꞌ meꞌ aꞌa tatungguꞌnen si siye kuweꞌ hininangde si meꞌ daraꞌakan dehelluhin. 37Ujudnen daꞌakne hap pī anaknen. Paꞌinne dem ateyne, ‘Bugtuꞌ pagaddatande anakkun.’ 38Saguwaꞌ pagkite meꞌ tatungguꞌ likusin anakne miyaꞌan, magisun siye, paꞌinde, ‘Iye hep inin pinusakaꞌanin. Dayiꞌ kaꞌam papateyte bi duk taꞌeddoꞌte bi likusin.’ 39Manjari siniggew iye weꞌ de duk sinōgadan pī si bukut birang likusin duk pinapatey weꞌ de. 40Manjari,” paꞌin si Isa, “bang tekka dapuꞌ likus miyaꞌan, ine enteꞌ hinangne si meꞌ tatungguꞌnen?” 41Nambung siye, paꞌinde, “Bugtuꞌ papateyne meꞌ aꞌa malaꞌat miyaꞌan, duk patungguꞌne likusnen si meꞌ aꞌa seddili, meꞌ mangurungan iye bahagiꞌnen pagtaꞌabut pagbuwaꞌ ubasin.” 42Paꞌin si Isa si siye, “Gaꞌ ke bakas tabatsabi dem kitab, pinaꞌin,

‘Batu tinayikutan weꞌ meꞌ pandey maghinang lumaꞌ batuhin, peggeꞌ kannalde gaꞌi taguna, kuweꞌitu iye ne miyaꞌan batu tamanan maniyaꞌ kagunahannen. Hinangan Tuhanin inin duk landuꞌ teꞌed hāp.’

43Hangkan akahante kaꞌam,” paꞌin si Isa, “tagnaꞌ kaꞌam tapeneꞌ Tuhanin, saguwaꞌ pinagantiꞌ du iyan si kaꞌam meꞌ bangsa seddilihin duk tuhutde du iyan pangandaꞌakan Tuhanin.” (44Paꞌin si Isa pe, “Kēmon malaboꞌ diyataꞌ batu inin posak-posak barannen. Duk sasuku kalaboꞌan batu inin, pipis iye.”)

45Pagkale meꞌ nakuraꞌ imamin duk meꞌ Pariseohin meꞌ dalilan miyaꞌan, tahātide weꞌ siye inandigan si Isahin. 46Batang si Isa siggewde, saguwaꞌ tinalew siye si meꞌ aꞌa mabanesin, peggeꞌ kahagad meꞌ aꞌahin weꞌ nabi si Isa.

Iliyochaguliwa sasa

Mateo 21: yakV

Kuonyesha

Shirikisha

Nakili