Kañaam 62
62
Phaţ ţi Naşibaţi
1Kayeeh ki pñaamarën Naşibaţi ki kapënna ţi ulibra wi najukan iyeeh. Kawo ki Yeduŧun. Kayeeh ki Dayiţ.
2Du kañog Naşibaţi ţañ di di uhaaş wi naan ujaaŋ ujoobëţ ;
mbuur mi naan manwoona du a.
3Ul aloolan awooŋ pnkuŋ pi naan pi nji ntëŋnuŋ ;
awooŋ mbuur mi naan.
Ul awooŋ katoh ki ŋniw ŋankëmuŋ ki naan ki nji mmeniiŋ ;
mënkşinţar nin.
4Te lum di di nakdëpiiŋ an bŧi ţi ñaaŋ kala pwata kafiŋ
jibi ñaaŋ ajaaŋ awat uniw unţeehiiŋ këme unkintaar unkjotuŋ ?
5Mndëm mi nul mankaaŋ kë bakdo na pwata ;
baŋal ŋţilan maakan.
Baji babeeb na mntum mi baka kaşë kakar du ŋhaaş ŋi baka meeţ.
Pnaţ ntiinku
6Aa, iwi uhaaş wi naan, ţoon ijoobëţ du kañog Naşibaţi ţañ ;
mnhaţ mi naan manwoona du a.
7Ul aloolan awooŋ pnkuŋ pi naan pi nji ntëŋnuŋ ;
awooŋ mbuur mi naan.
Ul awooŋ katoh ki ŋniw ŋankëmuŋ ki naan ki nji mmeniiŋ ;
mënkşinţar nin.
8Mndëm na mbuur mi naan manwoona du Naşibaţi ;
dmennaana du a,
ul awooŋ pnkuŋ panjaaŋ pabeelën.
9An bañaaŋ, nahaţan ţi a wal undoli ;
naţupan ţi kadunul uko unwooŋ ţi uhaaş wi nan.
Naşibaţi awo dko dmennaani di nja.
Pnaţ ntiinku
10Bañaaŋ bajën bawo ji udu ;
bañaaŋ bammeeţaniiŋ bawo baţilan.
Woli bapeeşaar baka lah,
bawiiş bukal bŧi kapel udu
11Nawutan kahaţ ţi kmëni
kanooran uleef ţi pŧeh bañaaŋ iko.
Woli pyok paŧumi,
nawutan kaţu uhaaş ţi pa.
12Naşibaţi aţiini uyaaş uloolan ;
aţiini ŋyaaş ŋtëb, kë nŧiink uko wi :
mnhina manwo mi nji Naşibaţi.
13Iwi Ajugun uŋal uwo wi nu.
Iwi ijaaŋ kluk ñaaŋ andoli kaliŋan na ulemp wi adoluŋ.
Iliyochaguliwa sasa
Kañaam 62: knf
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2014, Wycliffe Bible Translators, Inc. in cooperation with Le Groupe CIM-TBM, Senegal