'Anga'anga 8
8
1Ē kua tika i a Saula kia tāmate'ia a Setephano.
Tē tākinga kino nei a Saula i te 'ēkālēsia
I taua rā tikāi ra, kua tupu atura tēta'i tākinga kino'anga ma'ata i te 'ēkālēsia i Iērūsalēma ra. Kua pue'urikiriki kē atura te aronga 'akarongo rava rāi e pini rava akera a Iūdea ē Sāmāria ra, māri 'ua ko te au 'āpōsetolo ra. 2Nā ēta'i tangata 'ākono Atua i tanu i a Setephano ē kua 'eva'eva rātou i aia.
3 #
Anga 22.4,5; 26.9-11 Kāreka a Saula ra, kua tāmanamanatā ma'ata aia i te 'ēkālēsia. Kua tomo atu 'oki aia ki roto i tērā 'are ē i tērā 'are, e kika atura i te au tāne ma te au va'ine ki va'o e titiri atura i a rātou ki roto i te 'are 'āuri.
Te tūtū 'aere'anga'ia te 'ēvangelia i Sāmāria
4Ko taua aronga rā i pue'urikiriki kē ra, 'aere atura rātou ki tērā ngā'i ē ki tērā ngā'i ma te tūtū 'aere i te tuatua meitaki. 5Kua tae atura a Philipa ki tēta'i 'ōire o Sāmāria ē kua 'akakite atura i te Mesia ki a rātou. 6I tō rātou 'akarongo'anga i tā Philipa i tuatua ra, ē i tō rātou 'ākara'anga i te au 'akairo tāna i rave ra, kua piri tikāi te tangata 'e mānganui ki te reira tuatua ma te ngākau 'okota'i. 7'E ma'ata 'oki te au tangata 'e au vaerua vi'ivi'i tō rātou; ē kua 'aere maira taua au vaerua vi'ivi'i ra ki va'o ma te kāpikipiki ma'ata ra. Ē 'e ma'ata katoa te au tangata 'akangoru ē te au pirikoki i 'akaora'ia. 8Mareka rava akera taua 'ōire ra.
9Ko tēta'i tangata rā i no'o roa i taua 'ōire ra, ko Simona te ingoa, kua vāvāria te au tangata o Sāmāria i aia, nō te mea i purepure ana aia. Ē tē tuatua ra aia ē, 'e tangata ma'ata rava aia. 10Kua piri te tangata kātoatoa ki aia mei tei ma'ata e tae 'ua atu ki tei iti, nā kō akera, “Ko tēianei tangata ko te mana atua ia, ko tei tapa'ia ē ko Te Mana Ma'ata.” 11Kua piri atura rātou ki aia, nō te mea, kua roa akera tō rātou vāvāria'anga'ia e tāna au peu purepure. 12Kia 'irinaki rā rātou i tā Philipa tūtū 'aere'anga i te tuatua meitaki o te bāsileia o te Atua ē te ingoa o Iēsū Mesia, kua bāpetīto'ia i'ora rātou, te au tāne ma te au va'ine katoa 'oki. 13Kua 'irinaki katoa maira a Simona, ē kia oti aia i te bāpetīto'ia, kua piri vaitata aia ki a Philipa ra, ē kua vāvāria'ia aia i te kite'anga i te au 'akairo ē te au 'anga'anga mana ma'ata tei rave'ia.
14Kia 'akarongo akera te au 'āpōsetolo i Iērūsalēma ra ē, kua 'āriki tō Sāmāria i te tuatua a te Atua, kua tono atura rātou i a Pētero rāua ko Ioane ki Sāmāria ra, 15ē i tō rāua tae'anga ki reira, kua pure i'ora rāua nō rātou, kia 'ōronga'ia mai te Vaerua Tapu ki a rātou ra, 16nō te mea, kāre ake rāi aia i tō mai ake ki runga a'o i tēta'i o rātou ra; i bāpetīto 'ua'ia anake rā rātou i te ingoa o te 'Atu ra o Iēsū. 17I reira, kua tuku atura a Pētero ē Ioane i tō rāua rima ki runga a'o i a rātou, ē kua rauka i'ora i a rātou te Vaerua Tapu.
18I tō Simona kite'anga ē, kua 'ōronga'ia mai te Vaerua Tapu nā roto i tō te ngā 'āpōsetolo tuku'anga i tō rāua rima ki runga a'o i te tangata, kua tao'i maira aia i te moni ki a rāua, 19nā kō maira, “E 'ō katoa mai i tēnā na mana nōku kia rauka te Vaerua Tapu i te tangata tāku ka tuku atu i ōku rima ki runga a'o.”
20Kua pa'u atura a Pētero ki aia, “Kia riro atu tā'au moni ki te mate ē koe katoa na, ko koe i manako i te 'oko mai i te 'apinga aro'a a te Atua ki te moni! 21Kāre rava ā'au tu'anga ē te pu'apinga i roto i tēianei tuatua, nō te mea, kāre rava tō'ou ngākau i tika i mua i te aroaro o te Atua ra. 22Ē tēianei, e tatarā'ara koe i tēianei kino nō'ou na, ē e pure ki te 'Atu, pēnei ake, e 'akakore'ia mai tēianei 'akakoro'anga o tō'ou ngākau na. 23Tē kite nei 'oki au ē, kua kī koe i te vare'ae ma'ata, ē kua tā'ī'ī'ia koe i roto i te 'ere'ere tikakore ra.”
24Kua pa'u maira i reira a Simona, “E pure kōrua ki te 'Atu nōku kia kore au e roko'ia e tā kōrua i tuatua na.”
25E oti akera rāua i tā rāua 'akakite'anga atu ē te ako'anga atu i te tuatua a te 'Atu, kua 'oki maira rāua ki Iērūsalēma ma te tūtū 'aere'anga i te 'ēvangelia i te au 'ōire Sāmāria ra 'e mānganui.
Ko Philipa ē te tangata mana nō Ētiōpia mai
26Kua tuatua maira tēta'i 'āngela a te 'Atu ki a Philipa, nā kō maira, “Ka tū, e 'aere atu koe ki te pae i 'apatonga ra, ki te arāta'a e 'aere atura mei Iērūsalēma ki Gāza, te 'ōire i roto i te mēdēbara ra.” 27Tū akera aia ki runga, 'aere atura. Ē inā, ko tēta'i tangata Ētiōpia maira, 'e 'eunuka aia, 'e tangata mana rāi aia ki ō Kanadake, te ariki va'ine nō Ētiōpia ra. Ko ia te tiaki i te 'apinga tini nōna ra, ē i 'aere maira aia ki Iērūsalēma e 'akamori i te Atua, 28ē tē 'oki atura aia ki te kāinga. Tē no'o ra aia ki runga a'o i tōna kariota, ē tē tatau ra i tā Īsaia peroveta ra. 29Kua nā kō maira te Vaerua ki a Philipa, “Ka 'aere koe, e 'akapiri atu ki te pae i tērā ra kariota.” 30Kua 'oro atura a Philipa ki reira, e 'akarongo atura i aia i te tatau'anga i tā Īsaia peroveta ra, ē kua nā kō atura, “Tē mārama āina koe i tā'au e tatau na?”
31Kua pa'u maira aia, “'E a'a e rauka ai i āku kia kore tēta'i tangata e 'akamārama mai i āku?” Ē kua pati maira aia i a Philipa kia kake mai aia e no'o ki tōna pae. 32#Isa 53.7,8Ko tēia te tākiato o te tuatua i tātā'ia ra tāna i tatau ra:
“Mei te māmoe i arataki'ia aia ki te tainga ra,
ē mei te punua māmoe e mūtēkī 'ua ki mua i te aroaro o tei pākoti i tōna 'uru'uru ra,
kāre 'oki tōna va'a i tuatua mai.
33I 'akakore'ia te tuatua tika nāna i tōna tā'aka'aka'anga'ia ra.
Nā 'ai tōna uki e 'akakite?
Kua tīpū kē'ia 'oki tōna ora mei te 'enua nei.”
34Kua tuatua maira te 'eunuka ki a Philipa, nā kō maira, “Tēia tāku ui'anga ki a koe, nō 'ai tēia tuatua tā te peroveta e tuatua mai nei? Nōna 'ua'orāi āinei, mē kāre, nō tēta'i tangata kē āinei?” 35Kua 'akamata atura a Philipa nā taua tākiato rāi o te tuatua i tātā'ia ra i te 'akakite atu ki aia i te tuatua meitaki nō Iēsū. 36Ē tē 'ā'āere ra rāua nā te arāta'a, tae atura rāua ki tēta'i vai. Ē kua karanga maira te 'eunuka, “Inā, 'e vai tēia! 'E a'a au nei e kore ei e bāpetīto'ia?” #8.36 Kua tātā'ia te 'īrava i roto i ēta'i pōkaikai tuatua, kāre rā i roto i te au pōkaikai ta'ito tikāi: 37 Kua karanga atura a Philipa, “Kia 'akarongo koe ma tō ngākau katoa, e tika ia.” Kua tuatua maira aia, “Kua 'irinaki au ē, ko Iēsū Mesia, ko te Tamaiti nā te Atua ia.”
38Kua 'akaue atura aia kia tāpū te kariota, ē kua 'eke atura rāua, ko Philipa ē te 'eunuka katoa ra ki raro i te vai, ē nā Philipa i bāpetīto i aia. 39Ē kia kake maira rāua ki runga mei raro mai i taua vai ra, kua rave maira te Vaerua o te 'Atu i a Philipa, ē kāre atura te 'eunuka i kite 'aka'ou i aia; 'aere atura aia i tōna 'aerenga ma te rekareka. 40Ē e kitea'ia atura a Philipa i Āzoto, ē kua tūtū 'aere aia i te 'ēvangelia i tōna 'aerenga nā roto i te au 'ōire kātoatoa, e tae rava atura aia ki Kaisarea.
Iliyochaguliwa sasa
'Anga'anga 8: CIMRNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Cook Island Maori Revised New Testament © Bible Society of the South Pacific, 2021.
