'Anga'anga 12
12
Kua tā'ia a Iākōbo ē kua mou'āuri'ia a Pētero
1I te reira tuātau, kua 'opu maira te ariki ra ko Heroda i tēta'i pae o te 'ēkālēsia e tākinga kino mai i a rātou. 2Kua tā i'ora aia i a Iākōbo, te tuakana o Ioane, ki te koke. 3I tōna kite'anga ē, kua mareka te Ngāti Iūda i te reira, kua 'opu katoa atura aia i a Pētero. (Ko te au rā 'oki te reira o te Kai 'Aka'ōpuekore'ia.) 4#Exo 12.1-27Ē i muri ake i tōna 'opu'anga'ia mai, kua titiri'ia atura aia ki roto i te 'are 'āuri, ē i tuku'ia atura aia ki ngā pupu va'e'au e 'ā, taki'ā rātou 'ei tiaki i aia. Ko tō Heroda 'akakoro'anga 'oki e arataki i aia ki mua i te 'iti tangata i muri ake i te 'Ōro'a Pāsa ra. 5Ko Pētero, kua tāpū'ia aia i roto i te 'are 'āuri, kua pure rā te 'ēkālēsia ki te Atua nōna ma te kore e tukumoe.
Tē 'akaora'ia nei a Pētero mei roto mai i te 'are 'āuri
6I te pō i mua ake ka arataki mai ei a Heroda i aia ki va'o, tē moe 'ua ra a Pētero i taua pō ra i rotopū i ngā va'e'au e rua, i tāpeka'ia aia ki a rāua ki te 'āuri piri'anganaoa e rua ra. Ē kua tiaki ēta'i va'e'au i te 'are 'āuri ki te pae ngūtupa. 7Ē inā, kua mama maira tēta'i 'āngela a te 'Atu ra, ē kua kakā maira tēta'i mārama i roto i taua pi'a ra. Kua papaki maira aia i te kaokao o Pētero, e 'akaara maira i aia, nā kō maira, “Ka tū viviki ki runga.” Ē kua topa atura ngā 'āuri piri'anganaoa mei tōna rima. 8Kua 'akaue i'ora te 'āngela i aia, “'A'ao'ia tō'ou kāka'u, e tākai ana i tō tāmaka ki tō vaevae.” Ē kua pērā atura aia. Kua 'akaue 'aka'ou atura te 'āngela i aia, “Ka kāka'u ana koe i tō pereue, ē ka āru mai ei i āku.” 9Kua āru atura a Pētero i te 'āngela i tōna 'aere'anga ki va'o; kāre rā aia i nakiro ē, kua tupu tikāi tā taua 'āngela ra i rave ra, kua manako rā 'oki aia ē, 'e 'ōrama tāna i kite ra. 10Kua 'aere atura rāua nā rotopū i ngā tiaki mua ē te rua katoa 'oki, e tae atura rāua ki te ngūtupa 'āuri tei 'aere atu ki te 'ōire. Kua ma'eu 'ua maira taua ngūtupa ra ki a rāua, ē kua tomo atura rāua ki va'o, 'aere atura nā te roa'anga o te mataara 'okota'i. Ē kua 'akaruke maira te 'āngela i a Pētero i reira.
11E rako tangata maira a Pētero, kua nā kō akera aia, “Kua kite pāpū tikāi au i tēianei ē, nā te Atua i tono mai i tāna 'āngela, ē kua 'akaora mai i āku mei roto mai i te rima o Heroda ē te au mea rava rāi tā te 'iti tangata Ngāti Iūda e tāpapa maira.”
12I tōna nakiro'anga i te reira, kua 'aere atura aia ki te 'are o Māria, te metua va'ine o Ioane, tei tapa'ia katoa ē ko Māreko; ko te ngā'i 'oki i putuputu mai ei ē i pure katoa 'oki te au tangata 'e mānganui. 13Ē tē tōpāpā atura a Pētero i te ngūtupa o te ngā'i tomo'anga, kua 'aere maira tēta'i va'ine, ko Rōda te ingoa, i te ui ē, “Ko 'ai tēnā?” 14Ē i tōna kite'anga i te reo o Pētero, nō tōna rekareka 'oki, kāre atura aia i 'e'eu i te ngūtupa, kua 'oro rā ki roto e 'akakite atura ē, “Tē tū maira a Pētero i te ngūtupa!” 15Kua tuatua atura rātou ki aia, “Kua nēneva'ia koe!” Kua mārō atura aia ē, “'E tika rāi!” Kua pa'u atura rātou, “Ko tōna 'āngela pa'a tērā.”
16Kua tāmou mārie atura a Pētero i te tōpāpā'anga atu; ē i tō rātou 'e'eu'anga i te pā ē te kite'anga i aia, kua 'itirere atura rātou. 17Kua kamokamo atura a Pētero ki tōna rima kia mūtēkī rātou, ē kua 'akakite atura aia ki a rātou i tā te 'Atu arataki'anga mai i aia ki va'o mei roto mai i te 'are 'āuri, ē kua 'akaue atura, “E 'akakite atu i tēia au mea ki a Iākōbo ē te au taeake.” Riro atura aia, 'aere atura ki tēta'i ngā'i kē atu.
18E ao akera, 'e keukeu'anga ma'ata tei tupu i rotopū i te au va'e'au ra, “'E a'a rā 'oki tei tupu ki a Pētero?” 19Kua kimi atura a Heroda i aia, ē kāre akera aia i kitea. Kua uiui mārie atura aia ki te au tiaki, ē kua 'akaue atura kia tāmate'ia rātou.
Te matenga o Heroda
Ē kua 'aere atura a Heroda mei Iūdea atu ki Kaisarea, e no'o atura ki reira. 20Tē riri 'oto'oto akera aia i tō Tūria ē tō Sīdona. Kua 'aere kāpipiti maira rātou ki mua i tōna aroaro, ē kia oti akera rātou i te 'akapāpū i te tauturu a Belaseto, te tāvini 'irinaki'ia o te ariki, kua pati atura rātou i te 'au, nō te mea, nō kō mai te kai i tō rātou 'enua i te 'enua o te ariki ra.
21I te rā i 'ākono'ia ra, kua no'o maira a Heroda ki runga i te terōno ma te kāka'u ariki i te kāka'u'anga, ē kua kōrero maira ki a rātou. 22Kua kāpiki atura te tangata, “'E reo atua tēia, kāre ē nō te tangata!” 23I taua 'ati'anga rāi kua papaki maira tēta'i 'āngela a te 'Atu i aia, nō te mea, kāre aia i 'ōronga atu i te kakā ki te Atua ra. Kua pou atura aia i te kai'ia e te toke, e unu'i rava akera.
24Kua tupu atura 'oki te tuatua a te Atua, ē pararauare rava atura.
25Kua 'oki maira a Bānaba rāua ko Paulo, kia oti tō rāua tere aro'a i Iērūsalēma, ē kua arataki katoa maira rāua i a Ioane tei tapa'ia katoa ē ko Māreko.
Iliyochaguliwa sasa
'Anga'anga 12: CIMRNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Cook Island Maori Revised New Testament © Bible Society of the South Pacific, 2021.
