مزامیر ۱۹
۱۹
خوداوندٚ شریعت کامل ایسه
پیله رهبرٚ وأسی کی سرود خوأنأنَ هیدایت کونه. داوودٚ مزمور.
۱ آسمان خودا جلالٚ جأ گب زنه
و فلک، اونٚ دسٚ کارأنٚ جأ گه.
۲ همه‌تأ روزأن کلامَ اوسه کونه
و همه‌تأ شبأن دأنستنَ اعلام کونه.
۳ با اَنکی نه گبی زنیدی، نه کلامی
و هیکسم اوشأنٚ صدایَ نیشنأوه،
۴ ولی اوشأنٚ آواز تومامی زیمینٚ سر پخشَ به
و اوشأنٚ کلام زیمینٚ چار طرفَ فأرسه.
پیله‌دأنه چادر آسمانٚ جور خورشیدٚ رِه بپا بوکوده
۵ و خورشید، تازه دامادٚ مأنستن خو حجله جأ بیرون اَیه،
ایتأ پألوانٚ مأنستن شادی اَمرأ میدانٚ دورون دووٚه.
۶ جٚه ایطرفٚ آسمان ویریزه
و خو رایَ دونبألَ کونه ایطرفٚ دیگر شه؛
اونٚ گرما همه چی‌یَ فأرسه.
۷ خوداوندٚ شریعت کامله
و جانَ تازَه کونه.
خوداوندٚ شهادتأن امین ایسیدی
و نادانٚ آدمأنَ فأم یاد دهه.
۸ خوداوندٚ حوکمأن دوروسته
و دیلَ شادَ کونه.
خوداوندٚ دستورأن پاکه
و چومأنَ روشنَ کونه.
۹ خوداوندٚ جأ حیساب بردن پاک ایسه
تا اَبد و همیشگی.
خوداوندٚ قانونأن حقه
و همه‌تأنٚ اوشأن عیدالتٚ اَمرأییدی.
۱۰ طلا جأ خیلی ویشتر ارزش دأره،
حتی ایتأ عالمه خالصٚ زرٚ جأ؛
عسلٚ جأ شیرین‌تره،
حتی جٚه عسلی کی شانه جأ تُکّه کونه.
۱۱ تی ختمتگوزار اوشأنٚ جأ یاد گیره
هر کی‌یم اوشأنٚ جأ ایطاعت کونه، پیله پاداش فیگیره.
۱۲ کیسه کی بتأنه خو اشتباه‌یأنَ تشخیص بده؟
اَی خوداوند، مرَ می نأنسته‌بو گونایأنٚ جأ آزادَ کون!
۱۳ هَطویم تی ختمتگوزارَ، دأنسته‌بو گونایأنٚ جأ دور بدأر،
ونأل کی اوشأن مرَ فرمان بدید!
بأزین بی‌عیب بم
و دورْ جٚه پیله سرکشی.
۱۴ گبأنی کی می دَهنٚ جأ بیرون اَیه و فیکرأنی کی جٚه می دیل اَیه
ترَ خوش بأیه،
اَی خوداوند، کی می صخره‌یی و مرَ نجات دیهی.
Iliyochaguliwa sasa
مزامیر ۱۹: گیلکی (رشتی)
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2010-2019 Gilak Media