EKSODAS 5
5
Ijip gu Heguang suage Mosabe benai Aaronbe Sapbe
1Chipau châng dege Mosabe benai Aaronbe Pharaobe dage tat ze acheu sa ze, “Tingwang, Israelme Rapeu ne acheu sa lei, ‘A gu ziemmename je peize tatchu lau, dezai hênamkang ge a hangge penui kahengîbe reibam ra hangge zeu,’ ze acheu zeu,” ze kacheu de lei.
2Kane Pharaobe ne, “Tingwang ze châu lau, dezai ning kuâ I ’ngking gai lu ze Israelme je I ’mpat kai ra hangge zeu? Tingwang je I â chî me lei, zai chipau peireige du Israelme je I â ’mpat ra mak lei,” kacheu de lei. 3Chidadege penai ne, “Hebraime Rapeu ne anai je kahedau de lei; hênamkang ’mbe hezie kechumne-beî hang zai Tingwang anui Rapeu dage herâtewrabe hangge ka’nggia ze anui je ’mpat kai lau, makchai â herarît benai hiazutkie tei lu pa ne anui peireige wangkeu gai gu de lei” ze acheu bei de lei. 4Kane Ijip gu heguang ne penai je, “Mosabai, Aaronbai, ’ndaitew ze ziemmename je penui tâtewbe gene ningnai nguatat ra lau? Ningnai tewrabe tâ ze tew le lau,” kacheu de lei. 5Pharaobe ne, “Pie le lau, heram gu ziemmename chuna â kie-desang la de lei, zai ningnai ne penui je tâtewkahereube gene sau ra pei gai bei zeu!” ze kacheu de lei. 6Chipau mai gîm ge Pharaobe ne tâtewme je kereîme zai penui peireige besuitewme je acheu ze samdie gai ze, 7“Besua-sua’ngkage gum ze, ningnui ne baudime je hegam teleu ra megau pei ta du lau; peize penui run-runne penui hangge tat ze rui’ndui le lau. 8Kane hegam riak ze â besua-suage penui tewbe riak luî ze peize tew bam lau, periak ze ningnui tew’ncham gai ra mak lei; penui â kezai-desang di daseu; chipauziegene penui kakeleu de lei, ‘Kei lei, anui Rapeu dage herâtew gai kei lei’ ze acheu zeu. 9Ai suadu keritbe tâ ze ’mpeumime peireige tuâsuâ gai lau, dezai chige penui tâtew’nrî ze karasa sam ramme ge peize ’ngking mak ra hangge zeu,” ze kacheu de lei.
10Chidadege târeime benai tâtewme peireige besuitewme ne pat lu baudime je, “Pharaobe ne acheu sa lei, ‘Ningnui je I ne megau pei ra mak lei. 11Ningnui runne tat ze ningnui ne getaika’ndui-duibe bâm gene getai le lau’ zeu, kane ningnui tatew â kecheîne du tew’ncham ra mak lei;” ze kacheu de lei. 12Chigum ze Israelme baudime â Ijipram huâzie leine ge megau hangge megaumui ramme getai’ndui ra kezitrariptat kam di de lei. 13Târeime ramme ne gechu-desang ze acheu sa ze, “Nai’nsangne ningnui tewbe tâ ze tew kam gai kelua du lau, megau ga de lei” ze kacheu de lei. 14Zai Israelme ruage tâtewme peireige besuitewme, Pharaobe gu târeime penui peireige sumgai’ndime je lakgetie ze sam ’nneu ze, “’Ndaitew ze nemai riâ du ningnui gu hegam kateleube tâ ze ningnui ne tew gai makse bam lau?” ze kacheu de lei.
15Dadege Israelme ruage kanguame besuitewme Pharaobe dage wang lu, “’Ndaitew ze ning guâ ka’ngguame peireige acheu ze kangua lau? ze acheu ze penui hap te lei. 16Ning guâ ka’ngguame je megau mâ de pei mak ze, penui ne anui je, ‘Hegam teleu gai du lau!’ ze kacheu de lei. Zai pie le lau, ning guâ ka’ngguame je lakgetie bei de lei; kane ning gu ziemmename ne maube kau lei,” ze kacheu de lei. 17Kane pa ne, “Ningnui kakezai lei, ningnui kakezai lei; chipauziegene ningnui ne, ‘Anui tat ze Tingwang dage herâtew gai kei lei’ ze kacheu de lei. 18Chuna ningnui tat ze tâtew du lau; megau â ningnui je pei be ra mak daseu, acheusede hegam â tingtie gu riak luî ze ningnui lupat kai bam ra lei” ze kacheu de lei. 19“Ningnui nai’nsangne hegam tewpatbe riak ze tew’nsîn ra peichi lak lei,” ze penui ne acheubeibe luage, Israelme tatew peireige besuitewme, (chize Israelme) ne penui â penui runne betedka’nsîbe ge bambe hang ngaupat kai ’ndi de lei. 20Penui Pharaobe dagene pat dege, penui je kuâbamme hangna Mosabe benai Aaronbe je penui kahedau de lei; 21dadege penui ne penai je, “Ningnai ne anui je Pharaobe benai pe guâ ka’ngguame mikngau hangge ka’nggibe kedibe tewgaibe ze anui je tewchat ra penui ba ge hiazutkie kaichanggaidibe ziegene Tingwang ne ningnai peireige pie ze samram la lei,” ze kacheu de lei.
Mosabe ne Tingwang peireige Pe Lumpumbe
22Chidadege Mosabe ze Tingwang tailam ’nrik kai dai lu acheu sa ze, “Hei Tingwang gau, ’ndaitew ze ai baudime dage nang ne mâ-kesiabe tew gai bei lau? ’Ndaitew ze nang ne achu ’nziene lang gai gai lau? 23Ning ji gene mâ-’mpau ra hang Pharaobe tailam I wangbe gene seuze, pa ne aime bau dage mâ-kesiabe tew gai bei de lei, zai nang ne ning gu baudime je lupat kai mak lei,” ze kacheu de lei.
Iliyochaguliwa sasa
EKSODAS 5: ZEMEBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
