EKSODAS 10
10
Tîngkau Lungwangbe
1Chidadege Tingwang ne Mosabe je, “Pharaobe tailam gutchu lau; I ne pe lung benai pe guâ ka’ngguame lung tew’nchi gai ’nde lei, chidezai ai a gu ka’nchetbe ramme ze penui ruage I teilia le ra hangge zeu, 2chidezai Ijipme je I ne ’ndaigum ze teika’nra mei be zai ’ndaikau ka’nchetbe ramme penui ruage I tew gai ’ndi mei be ze ning name benai ning chaname geseube ge nang salia ra hangge zeu; chidezai I â Tingwang lei be ningnui chî le ra hangge zeu,” kacheu lei.
3Chidadege Pharaobe dage Mosabe benai Aronbe zuagut ti de lei, zai pechu, “Hebraime Rapeu, Tingwang ne aigum ze rang lei, ‘A suage ’ndaitiege nang helêukeu gai meu ze bam ra rei lau? A gu ziemmename je peize tatchu lau, dezai penui ne a guâ ’nggua le ra hangge zeu. 4Nang ne a gu ziemmename je tat ra peilak tizai â pie le lau, ’nchuamai ge ning ram ge I ne tîngkau ramme teiwang gai gu lei, 5zai heram dei luî penui ne chûmpuigit’ndibe ziegene mî de kedei ngauchi ta du de lei; ningnui hangge desak ne tew’nsia’nsakkaibe leine ze penui ne teu kam ’ndu de lei, zai helu ge ningnui gu hechîbang ramme bambe leine penui ne teu kam ’ndu lei, 6zai penui ne ning ki ramme benai ning guâ ka’ngguame ki ramme leine zai Ijipme ki ramme leine ge puiting ze bam gu de lei; kedeirei ge penui zuakeube mai gene chuna riâ changbe ge ning peume benai ning paume ne mâdau de ngaugaimakbe gumbe riâ wangchang gu lei,’ ze acheu zeu,” ze kacheu de lei. Chidadege â pa ’nreiwang lu Pharaobe dagene zuapat ti de lei.
7Zai Pharaobe guâ ka’ngguame ne pechu, “’Ndaitie aipau peu zene anui je tewkeleu ze bam ra lau? Peize penui je tat te zu lau, dezai penui Rapeu, Tingwang guâ penui ’nggua le ra hangge zeu; Ijipram ze tew’nsia kam ’nde lei be nang â ’nningchi mak kerei mei?” ze kacheu de lei. 8Chidadege Mosabe benai Aaronbe je Pharaobe dage nguawang gai kadai de lei; zai penai je pa ne, “Tat chu lau, ningnui Rapeu Tingwang guâ ’nggua zu lau; kane châu-chaume ne tat ra lau?” kacheu de lei. 9Dadege Mosabe ne, “Tingwang dage luube-bâm anui tew gai gu daze anui ruage gechîng-hena anui name ’mpeumi ramme benai ’mpuimi ramme, zai anui gu melidung ramme, benai kebuidung ramme tei lu anui tat ku lei,” kacheu de lei. 10Zai pa ne penai je, “Ningnui dage Tingwang ne peize nguada ze bam lau, ningnui benai ningnui name je tat ra I ne pei ra hangge â mâdau du mak te lei! Pie le lau, ning lung ge mâ-kesiabe tak ka’nning de lei. 11Lun me lei! ningnui ruage ’mpeumi ramme ne tat ze Tingwang guâ ’nggua le lau, chize ningnui ne ka’nchâ daseu,” ze kacheu de lei.
12Chidadege Tingwang ne Mosabe je, “Tîngkau ramme lungwangrabe hangge Ijipram dei peireige ning ba getuapat kai zu lau, chidezai desak ne tew’nsia’nsakkaibe leine ze penui ne Ijipram dei ge lungwang ze heram lungge mâ-hîmra bang leine teu ra hangge zeu,” ze kacheu de lei. 13Chipau luigum ze Ijipram peireige Mosabe pe gu hetui getuapat kai de lei, zai chipau mai ’nrîmbeting tâluî benai tingmuî tâluî naimikpat ’mbia gu tingkai heram peireige gui bam ra Tingwang ne teiwang gai bei de lei; zai hechua bapat dege â naimik pat ’mbia gu tingkai zene tîngkau ramme teiwang gai bei de lei. 14Zai Ijipram kedei bâm ’nsangne ge tîngkau ramme wang ze Ijipram luî lungpuiting di de lei, aigumbe tîngkau lungbe pedûttak ze pedung di-kadesangbe ze â mâdau de wangchang gai mak lei, zai aigumbe riâ â mâdau de wang dai ra mak lei. 15Penui ne kedei luî kûmtenaitai’ndibe ziegene heram ze muîrui ze bam di de lei, zai desak ne tew’nsia’nsakkaibe heram ge hingbang ramme leine benai hingbang rachî leine penui ne teu kam ’ndi de lei; Ijipram dei luî ge ka’ndiakbe zat kacheube leine, hingbang mei, nune helu gu mâ-hîmra bang mei be leine mâ de ’nsak ta di de lei. 16Chidadege Pharaobe ne Mosabe benai Aaronbe je kelau ze kûwang gai de lei, zai acheu sa ze, “Ningnui Rapeu, Tingwang peireige benai ningnai peireige I ne hemui gai ’ndi de lei. 17Chunage chidaze, a gu hemui ze chuna sâng chuna hangge lun gai ra hangge ning dage I kie lei, zai aipau kechaibe ze a dagene tei’mbiagairabe hangge runne ningnui Rapeu Tingwang dage kie gai lau,” ze kacheu de lei. 18Chidadege Pharaobe dagene pa zuapat lu, Tingwang dage kie gai de lei. 19Zai Tingwang ne naimik kêu ’mbia gu tingkai kechibe tei’nreiwang gai bei ze chize ne tîngkau ramme je guichu gai ze Kegiebe Sungkling ’mbe kumtua gai ’ndi de lei; Ijipram dei luî ge tîngkau katte ga di de lei. 20Kane Tingwang ne Pharaobe lung tew’nchi gai bei de lei, zai pa ne Israel name je tat ra pei mak tai de lei.
Muîwangbe
21Chidadege Tingwang ne Mosabe je, “Ijipram lungge peize muiterîng bam de ra hangge tinggîm ’mbe ning ba getuachu gai zu lau,” ze kacheu de lei. 22Chidadege tinggîm ’mbe Mosabe pe ba getuachu gai de lei, zai Ijipram pebâm leine ge hezie kechumne muiterîng bam di de lei; 23penui kat-kat je ngau mak, zai penui bâm bâm gene du hezie kechum riâ â mî du zuachu mak ze bam di de lei; kane Israelme leine dage â penui bambe bâm ge kebabe bam de lei. 24Chidadege Pharaobe ne Mosabe je kû lu, acheu sa ze, “Tat ze Tingwang guâ ningnui ’nggua le lau; ningnui name je du ningnui nguatat dui lei; ningnui gu melidung benai kebuidung ramme je runne ’nsak kai be lau,” ze kacheu de lei. 25Kane Mosabe ne kak ze, “Anui Rapeu Tingwang dage herâtew gai ra hangge herâtewbe benai rûkambe-râtewbe hangge du nang pei gai ra ’nnang gu lei. 26Anui gu kaurui ramme je du anui nguatat ra ’nnang gu lei; katte ’nsak-kaidiak ra mak lei, anui Rapeu Tingwang dage herâtewgairabe hanggene penui je anui teitat himchang gu lei; zai chige chang mak tâne ’ndaikau ne Tingwang guâ anui ’nggua gai ra mei be anui â chî mak daseu,” ze kacheu de lei. 27Kane Tingwang ne Pharaobe lung tew’nchi gai bei de lei, zai pa ne penui je tat ra peimeu de lei. 28Chidadege Pharaobe ne pechu, “A dagene tat te lau; nang runne ’ntîng le lau; mâtew-tewsede nang a ju ngau dai ra mak lei; a ju nang ngaube mai gîm ge nang chai gu lei,” ze kacheu de lei. 29Mosabe ne, “Nang rangbe luî ra de lei! ning ju I ne ngau dai ra mak te lei,” acheu bei de lei.
Iliyochaguliwa sasa
EKSODAS 10: ZEMEBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
