EXODUS 35

Sabat hman dân tûr

1Mosia chuan Israel fa pungkhâwmho chu a ko khâwm a, an hnênah, “Hêng hi in tih tûra Lalpa thupêk chu a ni. 2Ni ruk chhûng hna in thawk ang a, a ni sarih ni erawh chu in tân ni serh a ni ang a, Lalpa chawimawi nân urhsûn taka hman tûr a ni; hna thawk lui chu tihhlum tûr a ni. 3In awmna apiangah sabat ni chuan mei pawh in chhêm tûr a ni lo,” a ti a.

Lalpa Biakbûk sakna thawhlâwm

4Mosia chuan Israel fa pungkhâwmho hnênah, “Lalpa chuan heti hian a ti: 5Lalpa tân thilpêk han pe rawh u, mahni phal ang ang han pe rawh u; rangkachak te, tangkarua te, dâr te, 6la dumpâwl te, la senduk te, la senlâr te, la zai sîn te, kêl hmul te, 7berâm vun tihsen te, savun ṭha chi te, sitim thing te, 8khâwnvâra chhit tûr oliv hriak te, thih tûr hriak te, hâl tûr thil rimtui te, 9soham lung te leh âwmbela dah tûr lungmantam te rawn dah khâwm rawh u.

Lalpa chênna Biakbûka thil dah tûr

(Exod. 39:32-43)

10“In zînga mi themthiam rual lo thawk sela, Lalpa sawi angin hêng zawng zawng hi rawn siam rawh se. 11Biakbûk, a chung khuhna leh a thuahna te, a inbahna te, a bang tun te, a kaihna te, a ban te, a bulṭhut te, 12Thuthlung Bâwm leh a zâwnfung te, bâwm chhîn leh a zâr hliahna tûr puan te, 13dawhkân leh a zâwnfung te, a hmanrua zawng zawng leh chhang serh te, 14khâwnvâr bâwr chhit ên tûr leh a bungrua te, a chhitna tûr lu bâwk leh a tui tûr hriak te, 15rimtui hâlna dawhkân leh a zâwnfung te; hriak thih tûr te, hâl tûr thil rimtui te, Biakbûk luhna kawngka puanzâr tûr te; 16thilhlan hâlna tûr maichâm, a sîra dâr tlâwn nên, zâwnfung leh a bungrua zawng zawng te, dâr chawhtawlh leh a hûnna te, 17a hungna puanzâr tûr, a ban leh a bulṭhut te, a tual kawngka luhnaa zâr tûr puan te, 18Biakbûk khen nghehna leh hungna pal khen nghehna leh a pawhna hrui te; 19Hmun Thianghlima rawngbâwltute hâk tûr thawmhnaw zeh mawi te, puithiam Arona kawr serh te, puithiam hna an thawha Arona fate hâk tûr kawr te siam rawh se,” a ti a.

Mipuiin an thilpêk an rawn dah

20Israel fa pungkhâwmho chu an ṭîn darh a, 21Biakbûk sakna tûr, a chung khuhna tûr te leh thawmhnaw thianghlim tûr te chu mahni phal ang ang Lalpa hnênah chuan an rawn hlân a. 22Pêk châkna nei chu a hmei a pain an lo kal a, hnâr vuah te, bengbeh te, pinmawi te, ṭhi te, rangkachaka siamte chu rangkachak tlangte nên Lalpa tân an rawn pe a. 23La dumpâwl te, la senduk te, la senlâr te, la zai sîn te; kêl hmul te, berâm vun tihsen te, savun ṭha chi neite chuan an rawn pe bawk a. 24Tangkaruate pawh a pe thei chuan Lalpa chu an rawn pe a; Biakbûka hman tûr sitim thing nei chuan an rawn dah bawk a. 25Nu themthiam tak takte chuan la zai sîn te, la dumpâwl te, la senduk te, la senlâr te an kai a, an rawn pe a. 26Nu themthiam bîkten kêl hmul an thlûr chu an rawn pe bawk a. 27An hotute chuan soham lung leh lungmantam dang, efod-a dah tûr leh âwmbela târ tûr an rawn keng a. 28Thil rimtui leh hriak, chhit atân te, thih atân te, hâl atân te an rawn thawh bawk a. 29Mosia hnêna Lalpan siam tûra a tih siam nân Israel zînga mi, a hmei a pa, a duh apiangin thilpêk an rawn hlân bawk a.

Biakbûk sa tûr themthiam rual

(Exod. 31:1-11)

30Mosian Israel fate hnênah, “Juda hnam zînga mi, Hura tupa Bezalela, Uria fapa chu Lalpa chuan a thlang ta. 31Finna te, hriatna te, hmangchâng hriatna te, engkim siam tûra kut themthiamna nei tûrin Pathian Thlarauvin a pe a ni. 32Rangkachak te, tangkarua te, dâr tea thil mawi tinrêng ruahmana siam thiamna te, 33phûm atân lungmantam zai mawi te, thing ker mawite leh thil chi tinrêng siam thiamna te a pe a ni. 34Dana thlaha mi, Ahisamaka fapa Oholiaba nên, an pahnihin, mi dang hnêna thil siam zirtîr thiamna pawh Lalpa chuan a pe bawk a ni. 35Thil ker thiam te, thil mawi hria ten puan zai sîn, a dumpâwl te, a senduk te, a senlâr tea puan tah thiamte anga engkim tih thiamna a pe a ni. Engkim an siam thiam a, a rel vêl pawh thiam tak an ni.

Iliyochaguliwa sasa

EXODUS 35: MIZCLBSI

Kuonyesha

Shirikisha

Nakili