EXODUS 20
20
Thupêk sâwm
(Deut. 5:1-21)
1Pathian chuan thu a sawi a, a sawite chu hêngte hi a ni: 2“Bawiha in awmna Aigupta ram aṭanga hruai chhuaktu che u Lalpa, in Pathian chu ka ni.
3Kei lo hi chu Pathian dang rêng rêng nei suh.
4I tân milem siam suh, chung lam vâna awm emaw, leia awm emaw lei hnuai tuia thil awm lem emaw i siam tûr a ni hek lo.#Exod. 34:17; Lev. 19:4; 26:1; Deut. 4:15-18; 27:15. 5Chûng chu kûnin chibai i bûk tûr a ni lo va, an rawng i bâwl tûr a ni hek lo. Kei Lalpa i Pathian hi Pathian thîkthuchhe tak ka ni, min hawtute chu an thlah chhuan thum chhuan li thleng pawhin ka hrem ṭhîn a; #Exod. 34:6,7; Num. 14:18; Deut. 7:9,10. 6min hmangaiha ka thupêk zâwmtute erawh chu an thlah chhuan sâng tam tak chungah pawh ngil ka nei ṭhîn.
7I Pathian, Lalpa hming chhâlin dâwt sawi suh; dâwta a hming chhâltu chu Pathianin hrem lohvin a chhuah lo vang.#Lev. 19:12.
8Sabat ni hi thianghlim taka serh tûr a ni tih hre reng rawh.#Exod. 16:23-30; 31:12-14. 9Ni ruk chhûng hna i thawk ang a, i hna zawng zawng i thawk thei ang. #Exod. 23:12; 31:15; 34:21; 35:2; Lev. 23:3. 10A ni sarih ni erawh hi chu Lalpa tâna sabat ni a ni a, hna eng mah i thawk tûr a ni lo; i fapa te, i fanu te, i bawihpa te, i bawihnu te, i ran te, in khaw chhûnga hnam dang awm te pawhin hna an thawk tûr a ni lo. 11Lalpa pawhin ni rûk chhûngin tuifinriat te, lei leh vân leh a chhûnga awm zawng zawng te a siam a, a ni sarih ni chuan a châwl a ni. Chuvângin, mal a sâwm a, a serh a ni.
12I nu leh i pa chawimawi rawh; tichuan, Lalpa i Pathianin ram a pêk che-ah chuan i dam rei dâwn nia. #Deut. 27:16; Mt. 15:4; Mk. 7:10; 10:19; Lk. 18:20; Efe. 6:2,3.
13Tual that suh. #Gen. 9:6; Lev. 24:17; Mt. 5:21; 19:18; Mk. 10:19; Lk. 18:20; Rom. 13:9; Jak. 2:11.
14Uire suh. #Lev. 20:10; Mt. 5:27; 19:18; Mk. 10:19; Lk. 18:20; Rom. 13:9; Jak. 2:11.
15Ru suh. #Lev. 19:11; Mt. 19:18; Mk. 10:19; Lk. 18:20; Rom. 13:9.
16I vêngte dâwtin hêk suh. #Exod. 23:1; Mt. 19:18; Mk. 10:19; Lk. 18:20.
17I vêngte in leh lo awt suh; i ṭhian nupui pawh ît suh, a bawihpa emaw, a bawihnu emaw, a bâwng emaw, a sabengtung emaw, a neih eng mah i awt tûr a ni lo,” tiin. #Rom. 7:7; 13:9.
Mipui an thlabâr
(Deut. 5:22-33)
18Mipui chuan kâwlphe te, tawtawrâwt rite an hriata, kâwlphe te, tlânga meikhu vung vung te an hmuh chuan hlauvin an khûr a, hla fêah an ding a. #Heb. 12:18,19. 19Mosia hnênah, “Kan hnênah thu sawi la, kan lo ngaithla ang e, Pathian meuh chuan kan hnênah thu sawi teh suh se, kan thi mai dâwn alâwm,” an ti a. 20Mosia chuan, “Hlau suh u, Pathian chu in ṭih renga, a thu sawi in awih reng dâwn leh dâwn loh fiah tûr che uin a lo kal mai a ni e,” a ti a. 21Mosia chuan Pathian awmna chu a va hnaih a, mipui erawh chu hla fêah an ding ta tlat a.
Maichâm hman dân tûr
22 Lalpa chuan Mosia hnênah, “Vân aṭangin ka rawn bia che tih Israel-te chuan an hria a, hetiang hian hrilh rawh. 23Tangkaruain emaw, rangkachakin emaw in tân kei bâk#20:23 ‘Keimah anga biak tûr tangkarua leh rangkachaka siam pathian rêng rêng siam suh u’ tih theih bawk a ni. biak tûr siam suh u. 24Min biakna hmun tûr ka ruat apiangah ka tân hlum maichâm siam ula, chutah chuan hâlral thilhlan leh remna thilhlan berâm leh bâwngte chu hlân ang che u, ka lo kal ang a, mal ka sâwm ang che u. 25Ka tâna lung maichâm in siam chuan chher suh ang che u, in chher chuan in thîrkhen avângin a bawrhbâng tawh a ni.#Deut. 27:5-7; Jos. 8:31. 26Kailâwn siam ngai khawpa sângin maichâm siam hek suh u, in lâwn chhoh zawngin in lang palh ang e,” tiin.
Iliyochaguliwa sasa
EXODUS 20: MIZCLBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.