Mistari Maarufu ya Biblia kutoka Lucas 12

Shirikisha

Tahawa, ma'ãpé a norĩ wa'aba zama asimiza'rese sina 're aihâimana u'âsi za'ra wa'aba mono, Ti'ai ãma Dasiré Ipodo hã nimahã bâtâ na, sô i'asimipari za'ra wa'aba õ zém na, za wei morĩ wa apâ.

Tahawa, 'Re ihâimana u'âsi mono da'ãma 're Isib'a'uwẽ mono zép si, asima 're sõré wa'aba mono, uburé marĩ nhipai u. Tawap si uburé marĩ aihâimanazéb da hã te za te te aima 're anhomri 'wa.

Tawamhã te oto uburé dama tinha, ãne: — Ma'ãpé, ĩwapari pese za'ra wa'aba! Ãma 're pibui pese za'ra wa'aba mono, asibrob ahâ zô asima 're rob'ruiwapari za'ra wa'aba mono tõ da. E marĩ wa. Dahâimanazé tô sena hã, marĩ dama 're ihâimana za'ra mono zarinai õ wa, danhibrob ahâ nherẽ.

E marĩ wa. Nimame asibro aima 're ihâimana za'ra wa'aba mono ãma, te za aipẽ'ẽ na 're aihâimana za'ra wa'aba mo.

Ai'reb za'ra wa'aba hã, e 'wa hã 're hâimana hâ mono da, bâdâ hã te te sima apraba waihu'u pese bâ, tihâimanazém na 're ihâtâ'â mono zéb zarina.

Tawamhã Zezusi hã isiré 're inomro mono norĩ ma, ma tô tãma nharĩ za'ra, ãne: — Tahawa, wa za ãne aima waihu'u za'ra wa'wa: Aihâimanazém na 're aihâtâ'â za'ra wa'aba mono tõ, za 're i'asaihuri aba mono zém na hã, duré aihâiba na za 're i'asi'uza za'ra wa'aba mono zém na zama.

Tane duré aséré za'ra wa'wa hã, ai'rã na 're isimasa za'ra wa'aba mono hã sa'rata pese na te 're hâimana za'ra. Tahawa, ma'ãpé 're aipahi za'ra wa'aba mono tõ, a norĩ wa'wa hã aiwa'âbâ za'ẽtẽ uptabi za'ra wa'aba wa, si norĩ i'ahâ uptabi nhipai u.

Tawamhã Zezusi hã te duré tãma nharĩ za'ra, ãne: — Ai'umrore wa'aba nherẽ, ĩte pone'ẽrebâ norĩ, aipahi za'ra wa'aba tõ, Ĩmama ma, ãma tãma 're rowẽ uptabi mono wa, Da'ãma 're Isib'a'uwẽ mono zé te te aima 're i'anhomri aba mono zém na hã.

Ma'ãpé, 'madâ'â za'ra wa'aba, si toro norĩ hã. Ta norĩ hã tisazéb da, te te 're robzuri mono õ di. Duré amnho hã te te sima 're tehâri za'ra mono õ di. Duré isai ubumrozé hã tãma 're hâimana za'ra mono õ di. Tane nherẽ, 'Re ihâimana u'âsi mono te ĩsa hã te te tãma 're anhomri. E a norĩ wa'wa hã aiwa'âbâ za'ẽtẽ uptabi za'ra wa'aba ã bâ bété, si norĩ nhipai u.

Tahawa, 're aihâtâ'â za'ra wa'aba mono tõ, asa na hã duré niwamhã 're i'âhuri wa'aba mono zém na zama.

'Re ihâimana u'âsi mono si, te du hã rom na 're isimasa mono hã te te 're a'uza wẽ, bâtâ na simasam nherẽ, awẽ za da te ãma isazu hã, ro'o da. Tahawa, taha nhipai u te za duré a norĩ wa'wa hã 'Re ihâimana u'âsi mono asina 're i'umnhasi za'ra wa'aba mono zé hã surure nherẽ, te te 're ai'a'uza wẽ wa'wa.

Uburé marĩ upsibi na 're ihâimana za'ra mono hã te za 'Re ihâimana u'âsi mono te te 're a'upsibi me. Duré marĩ simi'uri na 're ihâimana za'ra mono hã, sõ'awi te za oto da te 're waihu'u za'ra.