Tawamhã saihuri parimhã, Zezusi hã ma tô Simau Pedru sina sadanha, ãne:
— Simau, Zuwãhã 'ra, e aima ĩzawi uptabi di, ã norĩ hã te te 're ĩzawi za'ra mono nhipai u.
Tawamhã Pedru hã ma sada'â, ãne:
— Ĩhe. Wanhib'apito, aima waihu'u pese di, ĩma i'asawi uptabi na hã.
Tahawa te Zezusi hã tãma tinha, ãne:
— Ma'ãpé ĩte pone'ẽrebâ i'rare norĩ hã 're a'madâ'â pese mono!
Taha pari maparane ãma hã te duré sina sadanha, ãne:
— Simau, Zuwãhã 'ra, e aima ĩzawi uptabi di.
Pedru hã ma duré sada'â, ãne:
— Ĩhe. Wanhib'apito, aima waihu'u pese di, ĩma i'asawi uptabi na hã.
Tahawa te Zezusi hã duré tãma tinha, ãne:
— Ma'ãpé, 're a'madâ'â pese mono, ĩte pone'ẽrebâ norĩ hã.
Tawamhã si'ubdatõ ãma te duré sina sadanha, ãne:
— Simau, Zuwãhã 'ra, e aima ĩzawi uptabi di.
Tawamhã Pedruhu wi ma tô tirobzei'õ, Zezusi hã si'ubdatõ te te duré sadanharĩ wa, ãne: “E aima ĩzawi uptabi di.” Tawamhã ma tô sada'â, ãne:
— Wanhib'apito, uburé marĩ hã aima waihu'u pese di. Duré aima ĩwaihu'u pese di, ĩma i'asawi uptabi na hã.
Tahawa Zezusi hã ma tô duré tãma ti'ru, ãne:
— Ma'ãpé, 're a'madâ'â pese mono, ĩte pone'ẽrebâ norĩ hã.