Mistari Maarufu ya Biblia kutoka Roama 8

Shirikisha

Ngo beehda gihn me ngahyo kejea Juog tiihyo kaa yaa anhyaar en kedea giih nyepinye cang ge ayuge ne giih me kony yaa akwanye wa kar cwihnye.

Bang gihn ngo ngahya ne cohg kejea gihn me mahn ngo ubahnge wo be nhyaare tooro, keehd me nahgo nyoge me kuow wale nyoge maa athow. Keehd atiihbe maa jaag maalo, e ngo be rom gene ke mahno ubahnge wo be nhyaare. Keehd giih tiihj rog gen awaahn ni kedea muu utiihj rog gen cahng moogo wale giih ne maalo wale ne thar piny, kwaad gihn acag me rom Juog ke mahno ubahnge wo be nhyaare ngo tooro. Nhyaahro gihr Juog yoado ke bang Ruohdho Jeacuu Kriihjto.

Thiow, wo ge gaahno gihro thiin, Wahy Juog ubeehn ukonye won. Nea kar kwaj yihr Juog ke nying giih raahm giih yoado ngo kwihyo beer mee, e Wahy Juog ukwahyo yihr Juog ke nyingo ke dhe yooh me kwihyo.

Batien giih ateed kan, gihn moogo nud me dog ke teedo keehdo? Nea Juog nud ke won, e gihn me diero ke nyinge tooro nea nyoge mooge wo maan gene maano.

Abea awaahn ni ngahyo ngo kejea awuohj me yoad Juoge rog yaa anweehd keehd Jeacuu Kriihjto tooro

Cub wihj rog giih daahd kuohme, ngo kahl thoo, abea log cwihny rih Juog weehg nyoge beehdo e thoo tooro, kedea doohr nud yihro nea wudho naa rog giih daahd Juoge.

Bekihd gihn me rom kiino ke paahngo, bang gihn kwaad giih upahdho yihdh gen ge utaajo cang ke nying nhyaahro gihr Juog ngaan anhyaar won.

Wiiha para paro kejea giih raahm giih yoado awaahn ni, wudh gen ne dhe caahn keraahyo rih moar wihj ge ubeehn Juoge ne cubo yihro.

Bekihd ngaa me rom kiino ke paahngo ke Ngad Boadh nyoge ubahnge wo be nhyaare. Keehd raahm rog wale ngoohng wong wale giih ajohr wale ngoohngo wale kahj wale thoo e kiino be paahng gene.

Dhe yoohn nu beehda gihr Juog, ngaa ngahy giih ne yi aduun nyoge. Kedea e ne dead yihdh giih daahd Wahy Juoge ke robo. Ge rom Juoge kaa deado bang gihn Wahy Juog ukwahyo yihr Juog ke nying yaa Juog wa kar cwihny Juog.

Yaa nii cing Wahy Juog, ge beehda nyethen Juog.

Yaa beehdo ke dhe yoohn giih wiih piny wudh gen naa bang giih daahd kuohme. Yaa beehdo ke dhe yoohn anyoadh Wahy Juoge wudh gen naa bang giih daahd Juoge.

Juog wo akoohje naa awiie Waahde uyoade giih raahm rog kedea uthowe ke nyingo. Me neehn maano ayuge Waahde ne gihn me koohje won keehde, e gihn e nuu umahn Juog ke cub giih ne yihre cang yihro.

Wahy Juog ke ngude urubo yi aduuno ne teed ngo kejea wo nyethen Juog. Me neehn maano nahgo nyethene nu, e dooj gihn anaa agweehge ke nying joe ngo ucube yihro. Thiow gihn ucube yihr Ngad Boadh nyoge ngo ucube yihro bang gihn wudho umoar Juoge nea giih raahm rog naa ayoade ge nywaago nywaago keehd en neehn kaa amoare wiih Ngad Boadh nyoge.

Kaano e naa ka beehn ngaa wiihe acube rog giih daahd kuohme udoohnge ne ngad mahn ke Juog bang gihn loohng gihr Juog be wuore kedea ngo be rome ke koaro.

Kwaad gihn acag cang cwihnye uloge ne koar yaa unyoadh Juoge ne nyethene.

Ngo beehda gihn me ngahyo cang kejea me neehn awaahn ni kan, e gihn acag ngo poohd nii koar ke raahm me wa mar raahm nyoohdo e ngo ucuro.