Mistari Maarufu ya Biblia kutoka Roma 5

Shirikisha

Meneng impetaga-taga te Timanem kenitadon te ontò dakel se pedowan din kenitadon, so dalem pa te eg-inang kidon te salà, insogò din si Jesu Cristo aw inimetayan sikandin amon megpelowà kenitadon lekat te pelumun.

Eked kidon lengà te pegpemenal. Tomanen te Timanem se egpelimanan tadon, so nedekelan kidon din te pedowan pineokit te Espiritu Santo imbegay din kenitadon.

Doen heman doma ingkeluba tadon. Neluba kidon te doen den kelimahan tadon tandà te pegtaking tadon ki Cristo, so pineokit te pegtayod tadon te kelimahan, doen keilingan tadon amon eked kidon dàgi pengkey eden se domateng kenitadon. Aw meketayod kidon te kelimahan, metaga-taga kidon te egkeluba se Timanem te kenitadon pegpemenal, aw lekat kenyan, netegahan tadon te metoman se egpelimanan tadon.

Nayan, so netegahan tadon den te inaneng-aneng den te Timanem te metòlid kidon tandà te pegpemenal tadon ki Jesu Cristo, wedad den ikeopal te Timanem kenitadon. Migsebad kidon diyà te Timanem pineokit te pegkematay te Pengolo tadon si Jesu Cristo. Pineokit te pegpemenal tadon kandin, nekeakop kidon diyà te otaw egtebangan te Timanem. Neluba kidon den heman, so egpelimanan tadon se aldaw te meg-ogpà kidon doma te Timanem doton te langit.

Kedengan te wedà kidon pa pemenal, neallang kidon te salà. Meneng pegdateng te aldaw pinemallì te Timanem, nematay si Cristo amon megpelowà kenitadon egpekesalà.

Nayan, so inaneng-aneng den te Timanem te metòlid kidon pineokit te pegkematay i Cristo, netegahan tadon den te ontò kidon din ipelowà lekat te pelumun te modi aldaw.

Wedà tolò si Adam te Timanem, aw yan se doun te kinetinan se kedita te otaw te salà. Meneng timolò si Jesu Cristo te Timanem, aw yan se doun te medita se otaw eneng-enengen te Timanem te metòlid dan.

Pengkey meluba kidon so impelowà kidon lekat te pelumun, meneng doen heman keluba te pedowan tadon diyà te Timanem pineokit te Pengolo tadon si Jesu Cristo, so pineokit te ininang din, migsebad kidon den diyà te Timanem.