Populära bibelverser från Tio 23

Dela

Atz jabʼiste ex, uvaʼ laʼ saʼon tiqʼol iviʼ xoʼl inqʼa emol, tul aʼetz exe, uvaʼ ech ex eche kʼuulanal laʼ ebʼana.

Tan jabʼiste ex, uvaʼ laʼ etaqʼ bʼen etibʼ s-nim, tul aʼetz exe, uvaʼ yeʼ laʼ oksal eqʼij taʼn quBʼaal Tiuxh. Pet jabʼiste ex, uvaʼ laʼ etiqʼo kuʼl etibʼ, tul aʼetz exe, uvaʼ laʼ oksal eqʼij taʼn quBʼaal Tiuxh.

Atz ¡txumlebʼalxh evatz, ex, inqʼa nik txhusun ibʼekʼbʼal inqʼa qumol s-tijaq imam Israeel, tuchʼ ex, inqʼa fariseeo, tan tulxh u kʼaxkʼo setiibʼa! Tan ¡bʼan vatz kuxh nik motx ebʼan tuchʼ vetatineʼ! Tan kʼuxh nik etaqʼ juunil te txhaq laalavil oxvatzul inqʼa txʼumbʼisabʼ tetz inqʼa etxhbʼubʼal, u meenta, u eneeldo tuchʼ u komiino, poro aʼ yeʼ nik ebʼan jolt inqʼa ibʼekʼbʼal quBʼaal Tiuxh, inqʼa sibʼ itxakunbʼal. Aʼetze inqʼaa: Vebʼant u jik, atz vetxumt ivatz emol, atz vekʼuqbʼat ekʼuul tiʼ quBʼaal Tiuxh. Aʼetz inqʼae, tetxhal laʼ enima, tul jitoq laʼ etanbʼa taqʼax txhaq juunil te txhaq laalavil inqʼa tzeʼ, eche uvaʼ nik motx ebʼan s-txheel.

Poro ¡txumlebʼalxh evatz, ex, inqʼa nik txhusun ibʼekʼbʼal inqʼa qumol s-tijaq imam Israeel, tuchʼ ex, inqʼa fariseeo, tan tulxh u kʼaxkʼo setiibʼa! Tan ¡bʼan vatz kuxh nik motx ebʼan tuchʼ vetatineʼ! Tan ech ex eche u vaaso tuchʼ u laq uvaʼ nik motx etxʼaj tiʼ. Tul bʼaʼn veteʼ nik etileʼ. Poro yeʼbʼaʼn u tuul. Echetze vetatineʼ, tan mamala elaqʼ nik motx ebʼaneʼ, atz mamala inqʼa jitxh inuqul nik ebʼaneʼ.

¡Ex, aj tenam Jerusaleen, ex inqʼa nik motx yatzʼon inqʼa qʼexsan tetz viyol quBʼaal Tiuxh, atz ex inqʼa motx kʼonin inqʼa qʼexsan tetz viyol quBʼaal Tiuxh s-sivan, inqʼa junun itxhaqax tzaan sexoʼl tiʼ talax viyol quBʼaal Tiuxh, tan jatpaqx kuxh val inmolt ex sinkʼatza, eche nik imoltoʼk vaʼq u txutx kaxhan tzaqatz tal jaqʼ ixichʼ! Poro ¡tira yeʼ nik esaʼeʼ!

Echetz etatine, tan kʼuxh jikxh ex vatz inqʼa xaol nik etaleʼ, poro mamala yeʼbʼaʼn tetaanima. Tul bʼan vatz kuxh nik motx ebʼan vatz inqʼa xaol.