Psalmet 112:1-10
Psalmet 112:1-10 Psalmet Gegërisht - Konstandin Kristoforidhi 1872 (PSGEKK1872)
Alleluia. Lum ai njeri qi druen Zotinë, i ka anda fort urdhënimet’ e ati. Fara e ati ka me qenun’ e fortë ndë dhet, brezi i të dreitëvet ka me u bekuem. Nder e pasëje kanë me qenunë ndë shtëpi t’ati, edhe dreitënia e ati mbet ndë jetët të jetësë. Len dritë nd’errësinë për të dreitët, ashtë përdëllyes, e i dhimpshim, e i dreitë. Njeriu i mirë ban përdëllim e ep hua, guvernon punët’ e veta me gjyq. Andai s’ka me u tundunë kurrë, i dreiti ka me u përmendunë për gjithë jetënë. Prei zanit keq s’ka me pasunë frikë, zemëra e ati ashtë gati për me shpëryem mbë Zotinë. Zemëra e ati asht’ e fortë, s’ka me drashunë, ngjer sa të shofi shpagiminë mbë anëmiqt e vet. Përdau, dha të vobegëvet; dreitënia e ati mbet ndë jetët të jetësë, brini i ati ka me u naltuem me lavdi. I pabesi ka me pamë, edhe ka me u zemëruem; ka me ngërcëllyem dhambët’ e vet, edhe ka me u tretunë, dëshërimi i të pabesëvet ka me u vdierrë.
Psalmet 112:1-10 Bibla Shqip "Së bashku" 2020 (me DK) (AL1)
Lum njeriu që e druan ZOTIN, që gjen kënaqësi të madhe në urdhërimet e tij. Pasardhësit e tij do të jenë të fortë mbi tokë, breznia e të drejtëve do të bekohet. Pasuri e begati do të ketë në shtëpinë e tij dhe drejtësia e tij do të mbetet përjetë. Për të drejtët lindi drita mes errësirës, i mëshirshëm, i dhembshur dhe besnik është ai. I mirë është njeriu i mëshirshëm që jep hua, që i bën punët e tij me drejtësi. Ai nuk do të tronditet kurrë, i drejti do të kujtohet përjetë. Lajmit të keq nuk i trembet, zemra e tij ka besim të patundur te ZOTI. Zemra e tij është e fortë, nuk do të tutet, derisa të shohë shkatërrimin e armiqve të tij. Është dorëdhënës, u jep nevojtarëve, drejtësia e tij mbetet përjetë, ballin e mban lart me nder. Do ta shohë i paudhi e do të pezmatohet
Psalmet 112:1-10 Bibla Shqip 1994 (ALBB)
Aleluja. Lum njeriu që ka frikë nga Zoti dhe gjen një gëzim të madh në urdhërimet e tij. Pasardhësit e tij do të jenë të fuqishëm mbi tokë, brezat e njerëzve të drejtë do të jenë të bekuar. Në shtëpinë e tij ka bollëk dhe pasuri dhe drejtësia e tij vazhdon përjetë. Drita lind në terr për ata që janë të drejtë, për njeriun e dhembshur, të mëshirshëm dhe të drejtë. Do të jetë i lumtur njeriu që ka dhembshuri dhe jep hua, dhe i drejton punët e tij me drejtësi, sepse nuk do të lëvizet kurrë; i drejti do të kujtohet gjithnjë. Ai nuk do t'u trembet lajmeve të këqija; zemra e tij është e fortë, me besim tek Zoti. Zemra e tij është e sigurt; ai nuk do të ketë fare frikë, derisa të mos shikojë triumfues mbi armiqtë e tij. Ai ka shpërndarë lirisht, u ka dhënë nevojtarëve, drejtësia e tij vazhdon përjetë dhe fuqia e tij do të ngrihet në lavdi. I pabesi do ta shohë dhe do të zemërohet, do të kërcëllijë dhëmbët dhe do të konsumohet; dëshira e të pabesëve nuk do të realizohet kurrë.