Numrat 2:1-34
Numrat 2:1-34 Bibla Shqip "Së bashku" 2020 (me DK) (AL1)
ZOTI i tha Moisiut e Aronit: «Izraelitët të fushojnë sipas njësive, secili nën emblemën e familjes së etërve. Të fushojnë me kah nga tenda e takimit dhe përreth saj. Në krahun lindor, të fushojë sipas njësive ushtarake, njësia e Judës. Prijësi i pasardhësve të Judës është Nahshoni, biri i Aminadabit. Ushtria e tij numëron shtatëdhjetë e katër mijë e gjashtëqind veta. Përkrah tij të jetë fisi i Isaharit e i Zabulonit. Prijësi i pasardhësve të Isaharit është Netaneli, biri i Cuarit. Ushtria e tij numëron pesëdhjetë e katër mijë e katërqind veta. Prijësi i pasardhësve të Zabulonit është Eliabi, biri i Helonit. Ushtria e tij numëron pesëdhjetë e shtatë mijë e katërqind veta. Kështu, tërë fushimi i Judës, sipas njësive ushtarake, numëron njëqind e tetëdhjetë e gjashtë mijë e katërqind veta. Ata të nisen të parët. Në krahun jugor, të fushojë sipas njësive ushtarake, njësia e Rubenit. Prijësi i pasardhësve të Rubenit është Elicuri, biri i Shedeurit. Ushtria e tij numëron dyzet e gjashtë mijë e pesëqind veta. Përkrah tij të jetë fisi i Simeonit e i Gadit. Prijësi i pasardhësve të Simeonit është Shelumieli, biri i Curishadait. Ushtria e tij numëron pesëdhjetë e nëntë mijë e treqind veta. Prijësi i pasardhësve të Gadit është Eliasafi, biri i Reuelit. Ushtria e tij numëron dyzet e pesë mijë e gjashtëqind e pesëdhjetë veta. Kështu, tërë fushimi i Rubenit, sipas njësive ushtarake, numëron njëqind e pesëdhjetë e një mijë e katërqind e pesëdhjetë veta. Ata të nisen të dytët. Pastaj të niset, në mes të fushimeve, tenda e takimit dhe fushimi i levitëve. Secili të jetë në vendin e tij, në njësinë përkatëse, si në udhëtim ashtu, edhe në fushim. Në krahun perëndimor, të fushojë sipas njësive ushtarake, njësia e Efraimit. Prijësi i pasardhësve të Efraimit është Elishamai, biri i Amihudit. Ushtria e tij numëron dyzet mijë e pesëqind veta. Përkrah tij të jetë fisi i Manaseut e i Benjaminit. Prijësi i pasardhësve të Manaseut është Gamalieli, biri i Pedahcurit. Ushtria e tij numëron tridhjetë e dy mijë e dyqind veta. Prijësi i pasardhësve të Benjaminit është Abidani, biri i Gideonit. Ushtria e tij numëron tridhjetë e pesë mijë e katërqind veta. Kështu, tërë fushimi i Efraimit, sipas njësive ushtarake, numëron njëqind e tetë mijë e njëqind veta. Ata të nisen të tretët. Në krahun verior, të fushojë sipas njësive ushtarake, njësia e Danit. Prijësi i pasardhësve të Danit është Ahiezeri, biri i Amishadait. Ushtria e tij numëron gjashtëdhjetë e dy mijë e shtatëqind veta. Përkrah tij, të jetë fisi i Asherit e i Neftaliut. Prijësi i pasardhësve të Asherit është Pagieli, biri i Okranit. Ushtria e tij numëron dyzet e një mijë e pesëqind veta. Prijësi i pasardhësve të Neftaliut është Ahirai, biri i Enanit. Ushtria e tij numëron pesëdhjetë e tre mijë e katërqind veta. Kështu, tërë fushimi i Danit, sipas njësive ushtarake, numëron njëqind e pesëdhjetë e shtatë mijë e gjashtëqind veta. Ata të nisen të fundit». Ky është regjistri i izraelitëve sipas familjeve të etërve. Tërë fushimi i izraelitëve, sipas njësive ushtarake numëroi gjashtëqind e tre mijë e pesëqind e pesëdhjetë veta. Levitët nuk u përfshinë në numërimin e izraelitëve ashtu siç ZOTI e kishte urdhëruar Moisiun. Kështu, izraelitët bënë gjithçka që ZOTI i kishte urdhëruar Moisiut. Secili fushoi e udhëtoi sipas njësive përkatëse e sipas klaneve të familjeve të etërve.
Numrat 2:1-34 Bibla Shqip 1994 (ALBB)
Zoti i foli akoma Moisiut dhe Aaronit, duke u thënë: "Bijtë e Izraelit do të vendosen secili pranë flamurit të vet nën shenjat e shtëpisë së etërve të tyre; do të vendosen rreth e rrotull çadrës së mbledhjes, por në një farë largësie prej saj. Në krahun lindor, ndaj diellit që po ngrihet, do të vendoset flamuri i kampit të Judës sipas renditjes së tij; prijësi i bijve të Efraimit është Nashoni, bir i Aminadabit; ata që u regjistruan në divizionin e tij ishin shtatëdhjetë e katër mijë e gjashtëqind. Pranë tij do të vendoset fisi i Isakarit; prijësi i bijve të Isakarit është Nethaneeli, bir i Tsuarit; ata që u regjistruan në divizionin e tij ishin pesëqind e katër mijë e katërqind. Pastaj do të vijë fisi i Zabulonit; prijësi i bijve të Zabulonit është Eliabi, bir i Helonit; ata që u regjistruan në divizionin e tij ishin pesëdhjetë e shtatë mijë e katërqind. Të gjithë ata që u regjistruan në kampin e Judës, sipas ndarjeve të tij, ishin njëqind e tetëdhjetë e gjashtë mijë e katërqind. Ata do ta fillojnë marshimin të parët. Në krahun jugor do të vihet flamuri i kampit të Rubenit sipas renditjes së ushtarëve të tij; dhe prijësi i bijve të Rubenit është Elitsuri, bir i Shedeurit; dhe ata që u regjistruan në divizionin e tij ishin dyzet e gjashtë mijë e pesëqind. Pranë tij do të vendoset fisi i Simeonit; dhe prijësi i bijve të Simeonit është Shelumjeli, bir i Tsurishadait; ata që u regjistruan në divizionin e tij ishin pesëdhjetë e nëntë mijë e treqind. Pastaj do të vijë fisi i Gadit; prijësi i bijve të Gadit është Eliasafi, bir i Reuelit, ata që u regjistruan në divizionin e tij ishin dyzet e pesë mijë e gjashtëqind e pesëdhjetë. Tërë ata që janë regjistruar në kampin e Rubenit, sipas divizioneve të tyre, ishin njëqind e pesëdhjetë e një mijë e katërqind e pesëdhjetë. Këta do ta fillojnë marshimin të dytët. Pastaj do të niset për marshim çadra e mbledhjes bashkë me kampin e levitëve në mes të kampeve të tjera. Do ta fillojnë marshimin në po atë rend të sistemimit të tyre, duke qëndruar secili në vendin e tij, pranë flamurit të vet. Në krahun perëndimor do të jetë flamuri i kampit të Efraimit sipas renditjes së tij, prijësi i bijve të Efraimit është Elishama, bir i Amihudit; ata që u regjistruan në divizionin e tij ishin dyzet mijë e pesëqind. Pranë tij do të zërë vend fisi i Manasit; prijësi i bijve të Manasit është Gamalieli, bir i Pedahtsurit; ata që u regjistruan në divizionin e tij ishin tridhjetë e dy mijë e dyqind. Pastaj do të vijë fisi i Beniaminit; prijësi i bijve të Beniaminit është Abidan, bir i Gideonit; ata që u regjistruan në divizionin e tij ishin tridhjetë e pesë mijë e katërqind. Të gjithë ata që janë regjistruar në kampin e Efraimit, sipas divizioneve të tyre, ishin njëqind e tetë mijë e njëqind. Këta do ta fillojnë marshimin të tretët. Në krahun perëndimor do të jetë flamuri i kampit të Danit sipas renditjes së tij; prijësi i bijve të Danit është Ahiezeri, bir i Amishadait; ata që u regjistruan në divizionin e tij ishin gjashtëdhjetë e dy mijë e shtatëqind. Pranë tij do të zërë vend fisi i Asherit; prijësi i bijve të Asherit është Pagieli, bir i Okranit; ata që u regjistruan në divizionin e tij ishin dyzet e një mijë e pesëqind. Pastaj do të vijë fisi i Neftalit; prijësi i bijve të Neftalit është Ahira, bir i Enanit; ata që u regjistruan në divizionin e tij ishin pesëdhjetë e tre mijë e katërqind. Të gjithë ata që u regjistruan në divizionin e Danit, ishin njëqind e pesëdhjetë e shtatë mijë e gjashtëqind. Ata do të nisen për marshim të fundit, pranë flamujve të tyre". Këta janë bijtë e Izraelit që u regjistruan në bazë të shtëpive të etërve të tyre. Të gjithë ata që u regjistruan në kampet e ndryshme sipas divizioneve të tyre ishin gjashtëqind e tre mijë e pesëqind e pesëdhjetë. Por levitët nuk u regjistruan me bijtë e Izraelit, sepse kështu e kishte urdhëruar Zoti Moisiun. Bijtë e Izraelit iu bindën të gjitha urdhrave që Zoti i kishte dhënë Moisiut: kështu ata fushuan pranë flamurëve të tyre dhe kështu e nisnin marshimin, secili sipas familjes së tij dhe sipas shtëpisë së etërve të tij.