Salmos 27
27
1Xránadxu Dios naque̱' xel-la' naxaní' chia',
ne Benne' dxuselé̱' neda'.
¿Nu benne' gaca guchebe̱' neda'?
Xránadxu Dios naque̱' Benne' dxucu'uje̱' neda'.
¿Nu benne' gaca guzúe̱' neda' lu da sté̱bele̱'e̱?
2Gate guléchaj benne' ca' dxelune̱' da cale̱la chia',
nen benne' ca' dxulusaca zi'e̱ neda',
ne benne' ca' dxeledábague̱' neda' chee̱ xuluzría xi'e̱ neda',
na' gulechégüe̱', ne xeajlecházie̱'.
3Láqueze xeléchaj tu cue' benne' dxjaque̱' wedil-la neda',
benne' ca' dxeledábague̱' neda', quebe zrébequeza'.
Láqueze xuluzúe̱' neda' lu wedil-la, neda' guxrén lázrequeza' Dios.
4Tu da gunábeda' Xránadxu Dios.
Da nigáze sa lazra', da naca na chee̱ sua' lizre Xránadxu
xúgute̱ zra gaca bana',
chee̱ gulaba lazra' ca naca da xrtante̱ chee̱ Xránadxu,
ne chee̱ guchálajle̱na' Le̱' lu xudau' lá'azxa chee̱'.
5Le̱' gucache chawe̱' neda' lu lataj lá'azxa chee̱'
lu zra dxaca da cale̱la.
Gucache chawe̱' neda' lu lataj cheé̱queze̱' naga zúaqueze̱'.
Guzúe̱' neda' tu naga se̱ cháweda'.
6Nadxa gune̱' guzétaja' benne' dxeledábague̱' neda',
ne zaj naxéchaje̱' neda',
na' nen dute̱ xel-la' dxebé gutia' béadu ca' guzúa'-ba'
lu cugu chee̱'.
Gúl-laqueza', ne tu güe lá'anazqueza' Xránadxu.
7Xran, ben chi'a gate ne dxuláwizra' Lue'.
Bexache lazre' neda', ne beche̱be chia'.
8Lu xichaj lázrdawa' benda' chi'u, gunníu': “Bexilaj chia'.”
Xexílaja' chiu', Xran.
9Quebe gucache lau' chia' neda'.
Lu xel-la' dxezrá'a chiu' quebe xebigu' naga zua' neda',
we̱n zrin chiu'.
Nacu' Benne' dxácale̱ne̱' neda'.
Quebe gusanu' neda', ne quebe cueaj xichju' neda',
Dios, weselá chia'.
10Lácala xulusán xra xrna'a neda',
tu xecá'azqueze Xránadxu Dios neda'.
11Bse̱de neda' da dxaca lazru' guna', Xran,
ne ble'e neda' da li lazre' da dxal-la' guna',
lawe' da zaj naxán benne' dxeledábague̱' neda'.
12Quebe gu'u lataj benne' dxeledábague̱' neda'
xelune̱' chia' da dxelaca lazre̱'
lawe' da zaj naxechaj benne' we̱n lazre' neda'
nen benne' dxelaca lazre̱' xulusaca zi'e̱ neda'.
13Xránadxu Dios guche̱be lazre̱' le'eda' da xrlátaje chee̱'
naga gaca bana'.
La quebe guxéajle̱'a da nigá, na' gute ni'a na'a.
14Le cueza xelá' Xránadxu.
Le gutipa lázrele, na' Le̱' guzé̱ chúchue̱' le'e.
Awe', le cueza xelá' Xránadxu.
Aktualisht i përzgjedhur:
Salmos 27: zat
Thekso
Kopjo
Krahaso
Ndaje
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 1981, Wycliffe Bible Translators, Inc. All rights reserved.