Malgo 1
1
Malooŋ ma Yowaan Mbodog
(Maday 3:1-12; Luug 3:1-18; Yowaan 1:19-28)
1Dala guyandag Nsaaŋ ya piim ya Yees Kilisid, Mwaan a Nzaam. 2Mu mugaand wu munsuun paan Yezay, gasonog ndaa:
«Yadum ngeenz ame gutwaal anze,
mumbad gu guboŋseen nzil.
3Yini ndag ya muud wabala wagal mu maan mawum.
Luyilig nzil ya Mfum,
Lu muyiligeen nswal dumanzil dwasyalala!»
4Gyagin, Yowaan Mbodog gaduug mu maan mawum, gayandag gubiil mun gunsuun ndaa: «Lusob bigalal, lubodom, gungoy Nzaam nga galulolol masum mabeen.» 5Baad abooz ba ginzuuŋ gya Yudey ande Yelusalem baween gulu nde, bafuŋun masum ma baa ha miis mya baad abooz, ibun Yowaan gababodog mu mazya ma Yoldan.
6Yowaan gabwadaag mulel wu bayilig ande mavun ma Syamo ande mugab wu giged gya mbiiz mu luged, ga lyaag bapas ande bwiig. 7Galoŋoog gul baad ndaa: «Muud wawiy gungoy ame, wandig mu ngol; loo yimafwaan mu gunyeeg mumbad gugudul misiiŋ mi bilaad byande. 8Mee, yilubodog ande mazya, Nde galubodog ande Muhuuŋ Agelel.»
Mbodom ande gumegem gwa Yees
(Maday 3:13; 4:11; Luug 3:21-22; 4:1-13)
9Mudaaŋ lun, Yees gaduug gu Nazaled bul bwa Ngalil; Yowaan gamubodog mu mweez wa Yoldan. 10Mudaaŋ Yees gadugaag mu mazya, gadeel yul lagangag, Muhuuŋ gadye hatal ande nga yiim. 11Ndag yimos yaduug gu tal ndaa: «Nze, wulene Mwaan ame wuluzol; gul nze, telege gyees gyavul#1:11 Gufwanas ande Mig 2.7; Yez 42.1..» 12Mumbal yimos, Muhuuŋ gamudwaal mu maan mawum. 13Yees gagal gunu biluum magumaya, gaziiŋaag ande bambiiz bamusid. Gunu sadan gamumeg, ibunu dupuuŋ duwaag gulya.
Yees gabiil balongog bateeg
(Maday 4:12-22; Luug 4:14-15; 5:1-11)
14Daaŋ lubagam Yowaan mu bolog, Yees gaween gu Galiley, galooŋoog Nsaaŋ ya piim ya Nzaam. 15Gansunaag ndaa: «Daaŋ laluŋu, mumbad Gimfum gya Nzaam gyaduul bela bel, lusob bigalal, lugwigil Nsaaŋ ya piim!»
16Giluum gimos, Yees galigaag bela bel ande zwa la Galiley. Gadeel milob bambiiz bool, Simon ande paaŋ ande Andele. Balumaag mawaand mu zwa mumbad bagal bilob. 17Yees gabalees ndaa: «Luwiy, yilundab nga yilugidil bilob baad.» 18Mumbal imos, basiis mawaand ma baa ibun bamulab. 19Yees lugapusaan gidaman, gadeel Zyaag ande paaŋ ande Yowaan, baan ba Zebede. Bagal mu mabwaad munu guyilig mawaand ma baa. 20Mumbal imos, Yees gababiil, basiis daad a baa Zebede ande baad bagisal mu bwaad, ibun balab Yees.
Muud wagal ande muhuuŋ ambi
(Luug 4:31-37)
21Yees ande balongog bande baween gu Gapelnawum. Mu giluum gi gisabad, Yees gawiŋin mu nzo yi bisaam yi bayuda ibun gayandag gulooŋ. 22Baad bamuwugaag, bayandag guyidig mumbad mu pil yande yi gulooŋ; mumbad loo gagal nga balooŋ ba nsig, gaanz nde galooŋag ande gimfum agyooz. 23Mu nzo yi bisaam yi bayuda, gwagal ande muud mos wagal ande mihuuŋ myambi, gawabag: 24«Kii mazol mumbad abiis,Yees wa Nazalet? Wawiyi mumbad guduzwa? Yayaab ndaa nze wulu saand wadum Nzaam!» 25Yees gaŋanen muhuuŋ wambi ndaa: «Gaaŋ gaan lanze ibun dugu mu muud wu!» 26Muhuuŋ ambi ganigis muud mween ngol, ibun gaduug mun gwaŋan mundag yangol. 27Baad abooz bayidig, bayandag guwufulanaan mos mos ndaa: «Kii mamb maa? Kii malooŋ mapa maa mabala loŋom ande ngol! Muud wu gabala ŋaneen ada mihuuŋ myambi, myase munu gumulemvegeen!» 28Mbal imos, paan yande ya mwaŋaan mu bihan abyooz bya Galiley. 29Lubaduug mu nzo yi bisaam yi bayuda, baween ande Zyaag ande Yowaan gu nzo Simon ande Andele. 30Bugo bwa Simon wu mukaad gagal ande mbaa ya lud yavul, wabidi. Lawiy Yees, bamudeleen paan yande. 31Gapusaan bela bel ande nde, gamugam mu goog gamuwusul. Mbaa ya lud yawi, gayandag gubasaleen malya.
32Lumasig, baad badwaaleen Yees bambeef abooz ande baad bagal ande mihuuŋ mya mbi. 33Baad abooz ba guŋumaan gutwaal gifug gya nzo . 34Yees gazunus baad bavul bagal ande bikaas bya pil ande pil ande bagal ande mihuuŋ mya mbi. Loo gabawaag nswa mu guwagal mumbad baa bubayabaag de, nde naa gagal.
Guzunus gu Galiley
(Luug 4:42-44)
35Mukela kel, mu giluum gya lab, piib yagal lyag yavul, Yees gawusug, gaduug ha mbaanz. Gaween ha gihan gimos gi gingeeŋ, gayandag mu gusaam. 36Simon ande bandug bande baween mu gumusag; 37daaŋ lubamudeel, bamulees ndaa: «Baad abooz babal gugaam.» 38Gaanz Yees ga balees ndaa: «Tweneen mu mabul mamban mabela bel mumbad yafed gulooŋ se gun. Pamb lo, mya min yawiyeen.» 39Ibun, gaween gu Galiley alooz gayandag gwalooŋ mu manzo mabisaam ma Bayuda magal gun ande mu guyid mihuuŋ mya mbi.
Yees gazunus Muud wa Bwaanz
(Maday 8:1-4; Luug 5:12-16)
40Muud mos wa bwaanz gawiy gul Yees, gafogom gutwaal ande, gamuloom ndaa: «De bumazol keenz.» 41Yees gamuwugeen kyeen#1:41 Yees gayuul ande kyeen: mu bison byambaan gayuul mukab mumbad ande., gasilimin goog, gamugam ande gumules ndaa yazolo keenzege!» 42Mumbal imos, bwaanz bumudoog, gageenzem. 43Gungoy, Yees gamufudul, gamunan manswi: 44«Ngug piim, loo gulees muud paan yi. Gaanz ween gisongos gul bangaŋa Nzaam, uleed magab magyel Mose mumbad gulees baad ndaa wa geenzege.» 45Mu daaŋ muud wun gaduug, gayandag mugwada paan yi muwiyeen mu bihan abyooz. Mumbad andubun, Yees loo gagug lyaag mu guwiiŋin mu mbaanz mugu bisongos gutwaal abaad abooz, gaanz gagalaag gunze mu bihan bigingeeŋ, baad badugaag ndamb ande ndamb, ibun bawiyaag gul Nde.
Aktualisht i përzgjedhur:
Malgo 1: noq
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
2025 The Seed Company in coordination with Association Congolaise de Traductions de la Bible