Matthew 1
1
Kakala kemanava Jesus
(Luk 3.23-38)
1Kenei kemamaoha iho nakipuna Jesus Christ, kama la ekeiho kemanava kela David. David ekeiho kemanava kela Abraham.
2Abraham kamana Isaac,
Isaac kamana Jacob,
Jacob kamana Judah ia ma nakaina aia.
3Judah kamana Perez laua ma Zerah. Kina laua Tamar.
Perez kamana Hezron.
Hezron kamana Ram.
4Ram kamana Amminadab.
Amminadab kamana Nahshon.
Nahshon kamana Salmon.
5Salmon kamana Boaz. Ia Rehab kina Boaz.
Boaz kamana Obed. Kina Obed a Ruth.
Obed kamana Jesse.
6Jesse kamana kela kekuꞌu David.
David kamana Solomon. Kina Solomon heꞌavana Uriah imua.
7Solomon kamana Rehoboam.
Rehoboam kamana Abijah.
Abijah kamana Asa.
8Asa kamana Jehoshaphat.
Jehoshaphat kamana Joram.
Joram kamana Uzziah.
9Uzziah kamana Jotham,
Jotham kamana Ahaz,
Ahaz kamana Hezekiah,
10Hezekiah kamana Manasseh,
Manasseh kamana Amon,
Amon kamana Josiah.
11Josiah kamana Jechoniah ia ma nakaina aia. Keualoko na nakama Israel ukolia noꞌave i Babylon.
12Imuli nakama la ukolia noꞌave i Babylon,
Jechoniah kamana Shealtiel.
Shealtiel kamana Zerubbabel.
13Zerubbabel kamana Abiud.
Abiud kamana Eliakim.
Eliakim kamana Azor.
14Azor kamana Zadok.
Zadok kamana Achim.
Achim kamana Eliud.
15Eliud kamana Eleazar.
Eleazar kamana Matthan.
Matthan kamana Jacob.
16Jacob kamana Joseph. Joseph keꞌavana Mary. Kena Mary kina Jesus, emale ma Christ.
17Amaka Abraham haele nokae David, kela sanahulu ma haa nakaukama hakoa. Amaka David haele nokae kulana nakama Israel nikolia noꞌave i Babylon, kena kela sanahulu ma haa nakaukama hoi. Ia amaka kulana nakama Israel nikolia noꞌave i Babylon haele nokae kulana Christ nihanau, kena kela sanahulu ma haa nakaukama hoi.
Kemamaoha Jesus Christ
(Luk 2.1-7)
18Kenei kemamaoha Jesus Christ. Mary o kina Jesus. Kaupu la ehanoa iꞌavana Joseph. Ia imua koꞌolua la meꞌavana, Mary emakino pela aia unoho i namahi Keanana Kapu. 19Ia kena Joseph ehakekele ma laua ameselavaa keꞌavana. Ia Joseph hekama ekonu kahi, kena kama la sehihai kekakala aꞌe alakama, maikinimea kama la sehihai Mary inapa imua namaisu keonohenua la. 20Ia kulana Joseph ehakekele namenei, kama la emoe nomiki. Kama la eꞌike ke{enselo} Kealiꞌi haele aꞌe nome aꞌe, “Joseph kama haleaina David, aꞌoe sehakekele saꞌino i keꞌavana ia Mary. Maikinimea kamaliꞌi kama na enoho la, kamaliꞌi Keanana Kapu. 21Kaupu na meimamaoha kamaliꞌi kanaka, kena aꞌoe uanaa kemale kamaliꞌi na Jesus, maikinimea kama na meikonaꞌi nakama Israel ikaha ma nahaisala lakou.”
22Name nei hakoa ehuli mai kehamaoni nakakala kela Keakua nime aꞌe kekama hakae nakakala aia, 23“Kaupu#1.23 meihaikama nohanau kamaliꞌi kanaka. Kanamale Immanuel, eme ma, Keakua enoho ma kakou.”
24Kulana Joseph nimahulu, kama la ehalono hea ke{enselo} la eme aꞌe i aia, iꞌavana Mary. 25Ia Joseph semomoe laua ma Mary, hakali kulana kaupu la ihanau kamaliꞌi kanaka aia la. Kena Joseph usui kemale kamaliꞌi la Jesus.
Aktualisht i përzgjedhur:
Matthew 1: ojv
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 1999, Wycliffe Bible Translators, Inc. All rights reserved.