متى 2
2
يِنِّي يقَّارن لْعِلم ن يِثْرَان
1وَامِي د يخْڒق عِيْسَى ذݣ وبِيلَاج ن بَيْت لَحْم ذِي ثْمُوْرْث ن يَهُوْذِيَا ذِي ڒْوقْث ن وزدْجِيذ هِيرُوْدُس، ؤُسِين-د شَان يِوذَان زݣ يِنِّي يقَّارن لْعِلم ن يِثْرَان زِي شَّرْق غَار ثنْدِينْت ن لْقُدْس. 2نَّان: "مَانِي يدْجَا وحنْجِير نِّي إِي د يخڒْقن اَذ يِيڒِي ذ اَزدْجِيذ ن أَيث-إِسْرَائِيل؟ أَقَا نࢲْرَا يثْرِي نّس ذِي شَّرق، قَا نُوْسَا-د اَذَاس نْسجّذ."
3وَامِي يسْڒَا وزدْجِيذ هِيرُوْدُس مَانَايَا، ئِخيّق ييْسِي يجّن ن ومْنُوْس ذ اَمقّْرَان نتَّا ذ يمزْذَاغ ن لْقُدْس. 4ئِسْمُوْن مَارَّا اَرُّوْيَاس ن ڒْفُقَهَا ن أَيث-إِسْرَائِيل ذ يمْسڒْمَاذن ن شَّرِيعَا يسّقْسَا-ثن ينَّا-ٱسن: "مَانِي د غَا يخْڒق لْمَسِيح؟"
5أَرِّين خَاس نَّان-اَس: "ذِي بَيْت لَحْم ذِي ثْمُوْرْث ن يَهُوْذِيَا، مَامّش يُوْرَا نَّبِي مِيخَا ذݣ يِجّن ن زْمَان:
6 أَربِّـي ينَّا: <ؤُڒَا ذ شم،
آ بَيْت لَحْم ذِي ثْمُوْرْث ن يَهُوْذِيَا،
وَار ثدْجِيذ بُو ذ ثَمزْيَانْت
جَار ثْندَّام#2.6 ثِندَّام نِثنْتِي ذ ثِنْدِينِين. ن يَهُوْذِيَا.
زَّايم إِي د غَا يفّغ يجّن ن لْحَاكم
إِي غَا يندْهن شَّعْب ينُو ن أَيث-إِسْرَائِيل.>"
7ڒخْدّنِّي يڒَغَا-يَاسن-د وزدْجِيذ هِيرُوْدُس س ثْنُوْفْرَا إِ يِنِّي يقَّارن لْعِلم ن يِثْرَان، ئِسّقْسَا-ثن يسّن زَّايْسن مڒْمِي تُوْغَا د يمظْهَار يِيثْرِي-يَا. 8سّنِّي يسّكّ-يثن غَار بَيْت لَحْم ينَّا-ٱسن: "رُوْحم ذِنِّي رْزُوْم مْلِيح خ وحنْجِير نِّي. خْمِي ث غَا ثَافم، عڒْمم-اَيِي بَاش اَذ رَاحغ ؤُڒَا ذ نش اَذَاس سجّْذغ."
9سْڒِين مِين ينَّا وزدْجِيذ، كَّرن رُوْحن ذِنِّي. ئِثْرِي نِّي إِي ࢲْرين ذِي شَّرق يݣُّوْر غَار زَّاث. وَامِي يُوْوض يِثْرِي نِّي، ئِبدّ ذݣ وجنَّا غَار مَانِي يدْجَا وحنْجِير نِّي. 10وَامِي ࢲْرِين يثْرِي نِّي فَرْحن اَطَّاس. 11ؤُذْفن ثَدَّارْث نِّي، ؤُفِين اَحنْجِير نِّي اَك يمَّاس مَرْيَم، ؤُضَان خ يفَادّن نْسن سجّْذن-اَس. كّْسن-د ڒكْنُوْز نْسن، يعْنِي دّْهب ذ تْبَخُوْر لْلُبَان ذ يِجّن ن ڒْحَاجث ذ تُوْفُح قَّارن-اَس مُوْرّْ، ؤُشِين-اَس-ثن ذ لْهَدِيَاث.
12ئِعْڒم-اَسن أَربِّـي ذِي ثِيرْجِيث ينَّا-ٱسن وَار تعْقِيبم شَا غَار وزدْجِيذ هِيرُوْدُس. صَافِي كَّرن ذوْڒن غَار ثْمُوْرْث نْسن خ يِجّن ن وبْرِيذ نّغْنِي.
ثَرْوڒَا غَار مِصْرَا
13وَامِي ؤُيُوْرن يِوْذَان نِّي يقَّارن لْعِلم ن يِثْرَان، ثْبدّ-د يجّن ن لْمَلَائِكَا ن سِيذِي أَربِّـي ذِي ثِيرْجِيث غَار يُوْسف ثنَّا-ٱس: "كَّر إِيْسِي اَحنْجِير ذ يمَّاس ارْوڒ غَار مِصْرَا، زذْغم ذِنِّي اَڒ ذَاش غَا ينِيغ ذْوڒ-د. أَقَا اَزدْجيذ هِيرُوْدُس يرزُّو خ وحنْجِير-أَ بَاش اَث ينغ." 14ئِكَّر يُوْسف يُوْيُوْر س دْجِيڒث غَار مِصْرَا يُوْوِي اَحنْجِير نِّي ذ يمَّاس اَكِذس. 15ئِقِّيم ذِنِّي حتَّا اَڒ وَامِي يمُّوْث هِيرُوْدُس. قَاع مَانَايَا يوْقع حمَا اَذ يكمّڒ وَاوَاڒ إِݣ ينَّا سِيذِي أَربِّـي إِ نَّبِي ؤُمِي قَّارن هُوْشَع ذݣ يِجّن ن زْمَان: <قَا ڒَاغِيغ-د إِ مِّي باش اَذ د يفّغ زِي مِصْرَا.>
ڒْموْث ن يحنْجِيرن ن بِيْت لَحْم
16وَامِي د يَارَّا ڒخْبَار هِيرُوْدُس بلِّي يِنِّي يقَّارن لْعِلم ن يِثْرَان شمْثن-ث، يعصّب اَطَّاس يغْضب. ئِسّكّ بَاش اَذ ينغ يحنْجِيرن نِّي مَارَّا ذِي بَيْت لَحْم ذ نَّوَاحِي نّس إِي غَار ثدْجَا قلّ زِي عَمَاين. مَانَايَا عْلَاحْسَاب ڒْوقْث إِي ذَاسن د يمظْهَار يِيثْرِي نِّي إِ يِنِّي يقَّارن لْعِلم ن يِثْرَان. 17ڒخْدّنِّي يكمّڒ وَاوَاڒ نِّي إِي ينَّا سِيذِي أَربِّـي إِ نَّبي ؤُمِي قَّارن إِرْمِيَا ذݣ يِجّن ن زْمَان:
18<ثْغُويِّيث تسْڒَان-اَس زِي دْشَار ن رَامَا، ذ يمطَّاون ذ وَاطَّاس ن لْحُزن،
ذ أَيث-رَاحِيل إِݣ يتْرُوْن خ ثَارْوَا نْسن، وَار خْسن اَثن يعزَّا حَدّ خ ثَارْوَا نْسن يمُّوْثن.>
تعْقَابن-د زِي مِصْرَا غَار نَاصِرَا
19وَامِي يمُّوْث وزدْجِيذ هِيرُوْدُس ثْبدّ-د يجّن ن لْمَلَائِكَا ن سِيذِي أَربِّـي غَار يُوْسف ذِي ثِيرْجِيث ذِي مِصْرَا. 20ثنَّا-ٱس: "كَّر عْقب، أَوِي اَكِذش اَحنْجِير-أَ ذ يمَّاس غَار ثْمُوْرْث ن أَيث-إِسْرَائِيل، أَقَا يِنِّي يخْسن اَذ نْغن اَحنْجِير-أَ قَا مُّوْثن." 21سّنِّي يكَّر يُوْسف يُوْوِي اَكِذس اَحنْجِير نِّي ذ يمَّاس يذْوڒ غَار ثْمُوْرْث نّس ن أَيث-إِسْرَائِيل. 22وَلَكِن وَامِي يسْڒَا بلِّي اَزدْجِيذ أَرْخِيلَاوُس يخْڒف بَابَاس هِيرُوْدُس ذِي ڒحْكَام ن يَهُوْذِيَا، ئِݣّْوذ اَذ يرَاح ذِنِّي. سِيذِي أَربِّـي يعْڒم-اَس-د عَاوذ ذݣ يِجّن ن ثِيرْجِيث، ئِكَّر يرُوْح غَار جِّهث ن ثْمُوْرْث ن لْجَلِيل. 23ئِزْذغ ذݣ يِجّن ن وبِيلَاج قَّارن-اَس نَاصِرَا حمَا اَذ يكمّڒ وَاوَاڒ نِّي إِي ينَّا سِيذِي أَربِّـي إِ لْأَنْبِيَا ذݣ يِجّن ن زْمَان: <أَقَا اَذَاس سمَّان نَاصِرِي.>
Aktualisht i përzgjedhur:
متى 2: ريف
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr