Соломона хамгин сән дун 4
4
[Көвүн:]
1– Чи ямаран сәәхнч, эңкр күүкн,
Чи ямаран сәәхнч!
Чини нүдн йир таалта,
Нүднчнь бүркәг һатцас үзгднә.
Чини үсн ямана сүрг мет,
Гилад уулас гүүсн болна.
2Чини шүдд сән хөд мет,
Чивәд уснас һарчах бәәдлтә.
Тедн икр хурһд мет,
Тооһан геедго, цугтан хошаһад.
3Чини урл – улан тасм,
Чини амн чигн сәәхн.
Чини халх бүркәг һатцас
Гранат темснә өрәлнь мет үзгднә.
4Чини күзүн Давидин
өндр башнь мет кевтә.
Миңһн халхц деернь өлгәтә,
Олн дәәчнрин зер-зев өлгәтә.
5Чини көкн – хойр бичкн хурһд,
Эс гихлә икр гөрәсд,
Эдн лилия цецгүд дунд бәәнә.
6Өдр экләд угад,
Өр цәәһәд угад,
Би миррар каңкнсн уул тал однав,
Би ладанар каңкнсн довун тал однав!
7Чи йир сәәхнч, эңкр күүкн,
Чамд төрүц һаң уга!
8Ливанас, келсн күүкн, ир,
Ливанас ир, орад ир!
Амана уулын ораһас,
Хермона-Сениран ораһас бу,
Тендәс – арслңгин бәәрнәс ир,
Тендәс – ирвсгин уулын җимәс ир.
9Келсн күүкн, эңкр минь,
Көркхн түрүн хәләцәрн авлвч,
Күзүндән зүүсн һанцхн цевәрн
Кевтнь мини зүрк авлвч!
10Келсн күүкн, эңкр минь,
Чини дурн ямаран сәәхн!
Чини таалмҗ йир әмтәхн:
Чини дурн чаһрас әмтәхн!
Чамас һарчах каңкнсн үнр
цугтаһаснь сәәхн.
11Келсн күүкн, чини урл шикр мет,
Чини келн нанд бал, үсн мет.
Чини бүшмүдин үнр –
Ливана моддын үнрлә әдл.
12Келсн күүкн, эңкр минь –
мел хаалһата сад,
мел хаалһата худг,
мел тамһлсн булг.
13Чи хадһлҗ хәләдг сад болҗанач:
Тенд гранат болн зүсн-зүүл темсд,
Тенд хна болн нард,
14Тенд өңгтә гүргл, нард,
Тенд аир болн корица,
Тенд ладан, мирр, алой модн –
Хамгин сән үнртә…
15Сад дотр булг,
Серүн уста худг,
Ливана уулас түрглҗәх урсхул…
16Ар үзгин салькн, серич,
Өмн үзгин салькн, ирич!
Мини сад тал үлә,
Каңкнсн үнр тартха!
[Күүкн:]
– Эврәннь садт иньгм иртхә,
Энд әмтәхн темсд идтхә!
Aktualisht i përzgjedhur:
Соломона хамгин сән дун 4: ХКО_ӘБ
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© Институт перевода Библии, 2002-2023