Цецн селвгүд 20
20
1Чаһр дөөглнә, искәсн әрк догшн.
Терүнәс ууһад көлврсн күүнд
төрүц ухан оршго.
2Хаана һалзурлт – арслңгин оркрлһн,
терүгинь көндәхлә, бийдән му кехч.
3Цүүгәнәс хол йовх күн тоомсрта,
муңхг күн цүүгәнд хәәһәд орна.
4Хуурмг күн киитн цагт һазр хаһлхш,
тиигхлә тәрә хадлһна цагт юм олҗ чадшго.
5Күүнә әрүн седвәр – гүн худгин усн мет,
болв ухатань терүг татад гүүнәс авч чадх.
6Олн-әмтн эврәннь итклин тускар хәәкрнә,
болв нәәлх дүңгә кү олҗ болхий?
7Үннч күн чиктән бәәнә,
терүнә үйнр кишгтә.
8Хан зарһ кехәр суухла,
терүнә нүүрт хорта йовдл тәәлгдх.
9«Мини зүркнд буру уга,
би килнцәсн цеврлгдүв», – гиҗ кен келх?
10Чиңнүрдхләрн меклсн күн, кемҗәлхләрн меклсн күн –
Деед Эзнд тер җигшүртә.
11Баахн күн кергәрн медгднә,
терүнә седвәр цевр-цеерий, үнний?
12Соңсхиг чигн, үзхиг чигн –
Деед Эзн үүдәсмн.
13Унтхдан бичә дурл – һууль һуухич,
нүдән бичә ань – цадхлң бәәхич.
14«Йир му юмн!» – гиҗ хулдҗ авх күн келнә,
зуг хооран һарн хулдад авсан нер уга магтна.
15Делкәд алтн бәәнә, өңгтә чолун бәәнә,
болв медҗ келсн терүнәс үнтә.
16Талдан күүнә төр хаһлхар орлцсн күн бәәсән бәрүлх,
күүнә гергнә төлә бас тиим бәрүллһ кех.
17Мекәр авсн өдмг әмтәхн,
болв хөөннь амн дотр элснд хүврх.
18Ухалсн санан күүндхлә орҗ ирдг:
дәәлдхләрн селвг соңс.
19Хов зөөдг күн, нуувч чигн келҗ өгдг,
тегәд бурмха күүнлә бичә харһ.
20Эцкән, экән харасн күүнә герлнь
харңһу тагт унтрх.
21Хамгин эклцд ховдглҗ буласн өвкин зөөр
хөөннь төрүц евәлтә болшго.
22«Хорта йовдл өшәһән авх!» – гиҗ бичә кел.
Деед Эзнд нәәл, Тер чамаг аврх.
23Чиңнүрдхләрн, әмтиг меклсн күн – Деед Эзнд җигшүртә,
төв биш чиңнүртә болсн му.
24Деед Эзн күүнә ишкдл заана.
Күн болһн эврәннь хаалһан яһҗ медхмб?
25Бурхнд андһар, үгән өгхин өмн сәәнәр ухал,
хөөннь терүндән һундрхад бәәвзәч.
26Цецн хан хар саната әмтиг сергәх,
тедниг чаңһар засглх.
27Күүнә седвәр – Деед Эзнә шам,
терүг Тер ивтрәһәд герлткнә.
28Хааг чик седкл болн үнн хадһлна,
терүнә ширә иткмҗәр батрна.
29Баһчуд чидләрн герлтнә,
көгшдиг буурл үсн кеерүлнә.
30Шарх болн шав хар сананас цеврлнә,
күүнә дотрк цокхла чикрнә.
Aktualisht i përzgjedhur:
Цецн селвгүд 20: ХКО_ӘБ
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© Институт перевода Библии, 2002-2023