2 ಕೊರಿಂಥ 2
2
1ಆನಗುಂಡ್, ನಾನ್ ನಿಂಗಡ ಪಕ್ಕ ಪುನಃ ದುಃಖತ್‍ಲ್ ಬಪ್ಪದ್ ಬೋಂಡಾಂದ್ ನಾನ್ ತೀರ್ಮಾನ ಮಾಡ್‍ನ. 2ನಾನ್ ಅನ್ನನೆ ನಿಂಗಳ ದುಃಖ ಪಡ್‍ತ್‍ಚೇಂಗಿ, ನಾನ್ ದುಃಖ ಪಡ್‍ತ್‍ನಂವೊ ಅಲ್ಲತೆ, ನನ್ನ ಕುಶಿ ಪಡ್‍ತ್‍ವಕ್ ಬೋರೆ ದಾರ್ ಉಂಡ್? 3ಅಕ್ಕ ನಾನ್ ನಿಂಗಡ ಪಕ್ಕ ಬಪ್ಪಕ, ನನ್ನ ಕುಶಿಪಡ್‌ತ್‌ವಯಿಂಗಡಗುಂಡ್ ದುಃಖ ಪಡ್‍ವಕ್ ಆಗಾಂದು ಪಿಂಞ ನಾಡ ಕುಶಿ ನಿಂಗ ಎಲ್ಲಾರ್‌ಕು ಕುಶಿಯಾಯಿತಿಕ್ಕಂಡೂಂದು, ನಿಂಗ ಎಲ್ಲಾಡ ವಿಷಯತ್ ನಂಬಿಕೆಯಾಯಿತೇ, ನಿಂಗಡ ಪಕ್ಕ ಬಂದಿತ್ ನಿಂಗಳ ಕಾಂಬಕ್ ಮಿಂಞಲೇ ಅನ್ನನೆ ನಾನ್ ನಿಂಗಕ್ ಈ ಕಾಗದತ್‍ನ ಒಳ್‍ದಿಯೆ. 4ಅದಲ್ಲತೆ, ನಿಂಗ ದುಃಖ ಪಡಂಡೂಂದ್ ನಾನ್ ಒಳ್‍ದಿತ್‌ಲ್ಲೆ, ನಿಂಗಡ ಮೇಲೆ ನಾಕ್ ಉಳ್ಳ ಬಲ್ಯ ಪ್ರೀತಿನ ನಿಂಗ ಅರಿಯಂಡೂಂದ್ ನಾನ್ ದುಂಬ ದುಃಖತ್ಂಜಲು, ಹೃದಯತ್‍ರ ನೊಂಬಲತ್ಂಜಲು, ದುಂಬ ಕಣ್ಣೀರಿಂಜಲು ನಿಂಗಕ್ ಒಳ್‍ದಿಯೆ.
ತಪ್ಪ್ ಮಾಡ್‍ನಂವೊಂಗ್ ಮನ್ನಿಪ್ಪ್
5ಒಬ್ಬ ದುಃಖಪಡ್‍ತಿತ್ಂಜತೇಂಗಿ, ಅಂವೊ ನನ್ನ ಮಾತ್ರ ದುಃಖಪಡ್‍ತಿತ್‌ಲ್ಲೆ, ಚೆನ್ನಮಟ್ಟಕ್ ನಿಂಗ ಎಲ್ಲಾರ್‌ನ ಸಹ ದುಃಖಪಡ್‍ತಿತುಂಡ್‍ೕಂದ್ ನಿಂಗ ಎಲ್ಲಾಡ ಮೇಲೆ ದುಂಬ ಕಠಿಣವಾಯಿತ್ ಇರತನೆಕೆ ಇದ್‍ನ ಎಣ್ಣ್‌ವಿ. 6ಅನ್ನನೆ ದುಃಖ ಪಡ್‍ತ್‍ನಂವೊಂಗ್, ನಿಂಗಡಡೆಲ್ ಉಳ್ಳ ದುಂಬ ಜನತ್‍ರಗುಂಡ್ ಕ್‍ಟ್ಟ್‌ನ ಈ ಶಿಕ್ಷೆಯೇ ಮದಿ ಆಚಿ. 7ಆನಗುಂಡ್ ಅಂವೊ, ಬಲ್ಯ ದುಃಖತ್‍ಲ್ ಮನಸ್ಸ್ ಬುಟ್ಟಿತ್ ಪೋಕತನೆಕೆ, ನಿಂಗ ಅಂವೊನ ಮನ್ನಿಚಿಟ್ಟಿತ್ ಸಮಾದಾನ ಮಾಡಂಡು. 8ಅನ್ನನೆ ನಿಂಗಡ ಪ್ರೀತಿನ ಅಂವೊಂಗ್ ದೃಡಪಡ್‌ತ್‍ವಕಾಯಿತ್ ನಾನ್ ನಿಂಗಳ ಬೋಡುವಿ.
9ನಿಂಗ ಎಲ್ಲಾ ವಿಷಯತ್‍ಲು ತಗ್ಗಿತ್ ನಡ್ಂದಂಡುಳ್ಳಿರಾಂದ್ ಪರೀಕ್ಷೆ ಮಾಡ್‌ವಕಾಯಿತೇ ಅನ್ನನೆ ಒಳ್‍ದಿಯೆ. 10ನಿಂಗ ದಾರ್‌ಕ್, ಏದ್‍ನ ಮನ್ನಿಚಿಡ್‌ವಿರೋ, ನಾನು ಸಹ ಅಯಿಂಗಳ ಮನ್ನಿಚಿಡುವಿ. ನಾನ್ ಏದ್‍ನ ಮನ್ನಿಚಿಟ್ಟಿತುಂಡೋ, ಅದ್‍ನ ನಿಂಗಕಾಯಿತ್ ಕ್ರಿಸ್ತಂಡ ಸನ್ನಿದಾನತ್‍ಲ್ ಮನ್ನಿಚಿಟ್ಟಿಯೆ. 11ಸೈತಾನಗುಂಡ್ ನಂಗ ಮೋಸ ಪೋಕತನೆಕೆ ನಾನ್ ಅನ್ನನೆ ಮಾಡಿಯೆ; ಸೈತಾನಂಡ ತಂತ್ರ ಎಂತ್‍ೕಂದ್ ನಂಗಕ್ ಚಾಯಿತೆ ಗೊತ್ತುಂಡಲ್ಲ.
12ಪಿಂಞ, ಯೇಸು ಕ್ರಿಸ್ತಂಡ ನಲ್ಲ ಸುದ್ದಿನ ಬೋದನೆ ಮಾಡ್‌ವಕಾಯಿತ್ ನಾನ್ ತ್ರೋವ ಪಟ್ಟಣಕ್ ಬಪ್ಪಕ, ಒಡೆಯನಗುಂಡ್ ನಾಕ್ ಪಡಿ ತೊರ್ಂದ್‍ತ್ಂಜತ್. 13ಆಚೇಂಗಿಯು, ಅಲ್ಲಿ ನಾಡ ಪ್ರೀತಿರ ತಮ್ಮಣನಾನ ತೀತನ ಕಾಂಗತಗುಂಡ್, ನಾಡ ಮನಸ್ಸ್‌ಕ್ ಸಮಾದಾನ ಇಲ್ಲತಾಚಿ. ಆನಗುಂಡ್, ನಾನ್ ಪೊರಟಿತ್ ಪೋಪೀಂದ್ ಅಯಿಂಗಕ್ ಎಣ್ಣಿತ್, ಮಕೆದೋನ್ಯ ಪ್ರಾಂತ್ಯಕ್ ಪೋಯೆ.
ಪುದಿಯ ಒಪ್ಪಂದತ್‍ರ ಸೇವಕಂಗ
14ಆಚೇಂಗಿ, ಕ್ರಿಸ್ತಂಡಲ್ಲಿ ಎಕ್ಕಾಲು ನಂಗಕ್ ಜಯ ಕ್‍ಟ್ಟ್‌ವನೆಕೆ ಮಾಡಿತ್, ಎಲ್ಲಾ ಜಾಗತ್‍ಲು ನಂಗಡ ಮೂಲಕ ಅಂವೊನ ಅರಿವಕುಳ್ಳ ಬುದ್ದಿ ಎಣ್ಣುವ ಸುಗಂದ ವಾಸನೆನ ಪಬ್ಬ್‌ಚಿಡ್‌ವ ದೇವಕ್ ವಂದನೆ. 15ರಕ್ಷಣೆ ಕ್‍ಟ್ಟ್‌ವಯಿಂಗಡ ಮದ್ಯತ್‍ಲು, ಪಾಳಾಯಿ ಪೋಪಯಿಂಗಡ ಮದ್ಯತ್‍ಲು, ನಂಗ ದೇವಕ್ ಕ್ರಿಸ್ತಂಡ ಸುಗಂದ ವಾಸನೆಯಾಯಿತುಂಡ್. 16ನಂಗ ಪಾಳಾಯಿ ಪೋಪಯಿಂಗಡ ಮದ್ಯತ್‍ಲ್ ಚಾವ್‍ರ ವಾಸನೆಯಾಯಿತು, ರಕ್ಷಣೆ ಕ್‍ಟ್ಟ್‌ವಯಿಂಗಡ ಮದ್ಯತ್‍ಲ್ ಜೀವತ್‍ರ ಸುಗಂದ ವಾಸನೆಯಾಯಿತು ಉಂಡ್. ಇನ್ನನೆ ಮಾಡ್‌ವಕ್ ಯೋಗ್ಯನಾಯಿತುಳ್ಳಂವೊ ದಾರ್?
17ದುಂಬ ಜನತ್‍ರನೆಕೆ, ನಂಗಕ್ ಲಾಬ ಕ್‍ಟ್ಟ್‌ವಕಾಯಿತ್ ದೇವಡ ವಾಕ್ಯತ್‍ನ ಕಲಪ್‍ಲ್ ಬೋದನೆ ಮಾಡತೆ, ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್, ನಂಬಿಕಸ್ತಂಗಳಾಯಿತ್, ದೇವ ಅಯಿಚಯಿಂಗಳಾಯಿತ್, ದೇವಡ ಮಿಂಞತ್‍ಲ್ ತಕ್ಕ್ ಪರ್ಂದಂಡುಂಡ್.
Aktualisht i përzgjedhur:
2 ಕೊರಿಂಥ 2: ಕೊಡವ
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2017, New Life Literature (NLL)