1 ಕೊರಿಂಥ 8
8
ವಿಗ್ರಹಕ್ ಬಲಿ ಕೊಡ್‍ಪ ಯರ್ಚಿರ ವಿಷಯ
1ಇಕ್ಕ, ನಿಂಗ ಕ್‍ೕಟ ವಿಗ್ರಹಕ್ ಅರ್ಪಿಚಿಟ್ಟ ಆಹಾರತ್‍ರ ವಿಷಯತ್, ನಾನ್ ಎಣ್ಣ್‌ವಿ. ನಂಗಕೆಲ್ಲಾರ್‌ಕೂ ಈ ವಿಷಯತ್ ಅರಿವ್ ಉಂಡ್‍ೕಂದ್ ನಂಗಕ್ ಗೊತ್ತುಂಡ್. ಬುದ್ದಿ ಆಂಗಾರತ್‍ನ ಉಂಟ್ ಮಾಡ್‌ವ, ಆಚೇಂಗಿ ಪ್ರೀತಿ ಬೋರೆಯಿಂಗಳ ಬಲಪಡ್‍ತ್‍ವಕ್ ಸಹಾಯ ಮಾಡ್‌ವ. 2ಒಬ್ಬ ಅಂವೊಂಗ್ ಎಂತಾಚು ಗೊತ್ತುಂಡ್‍ೕಂದ್ ಗೇನ ಮಾಡ್‍ಚೇಂಗಿ, ಅಂವೊಂಗ್ ಎಚ್ಚಕ್ ಗೊತ್ತಿರಂಡುವೊ ಅಚ್ಚಕ್ ಅಂವೊಂಗ್ ಇಂಞು ಗೊತ್ತ್‌ಲ್ಲೆ. 3ಆಚೇಂಗಿ ದೇವನ ಪ್ರೀತಿ ಮಾಡ್‍ವಂವೊನ, ದೇವಕ್ ಗೊತ್ತಿಪ್ಪ.
4ಆನಗುಂಡ್ ವಿಗ್ರಹಕ್ ಅರ್ಪಿಚಿಟ್ಟ ಆಹಾರತ್‍ರ ವಿಷಯತ್: ಈ ಲೋಕತ್‍ಲ್ ವಿಗ್ರಹ ಎಣ್ಣುವದ್ ಒಂದು ಇಲ್ಲೇಂದು, ಒಬ್ಬನ ಬುಟ್ಟಿತ್ ಬೋರೆ ದೇವ ಇಲ್ಲೇಂದು ನಂಗಕ್ ಗೊತ್ತುಂಡ್. 5ಪರಲೋಕತ್‌ಲು, ಬೂಲೋಕತ್‌ಲು ದೇವಂಗ ಉಂಡ್‍ೕಂದ್ ಜನ ಗೇನ ಮಾಡ್‌ವ. ಇಂಞು, ದುಂಬ ದೇವಂಗ ಪಿಂಞ ಒಡೆಯಂಗ ಉಂಡ್‍ೕಂದ್ ಜನ ಗೇನ ಮಾಡಿಯಂಡುಂಡ್‍ೕಂದ್ ನಂಗಕ್ ಗೊತ್ತುಂಡ್. 6ಆಚೇಂಗಿ, ಎಲ್ಲಾನ ಸೃಷ್ಟಿ ಮಾಡ್‍ನ ಅಪ್ಪನಾನ ದೇವ ಒಬ್ಬನೇ; ನಂಗ ಅಂವೊಂಗಾಯಿತ್ ಬದ್‍ಕಿಯಂಡುಂಡ್. ಯೇಸು ಕ್ರಿಸ್ತ ಎಣ್ಣುವ ಒರೇ ಒರ್ ಒಡೆಯ ನಂಗಕ್ ಉಂಡ್; ಅಂವೊನಗುಂಡ್ ದೇವ ಎಲ್ಲಾನ ಸೃಷ್ಟಿ ಮಾಡ್‍ಚಿ. ಅಂವೊನಗುಂಡ್ ನಂಗ ಬದ್‍ಕಿಯಂಡುಂಡ್.
7ಆಚೇಂಗಿಯು, ಈ ವಿಷಯತ್‍ರ ಅರಿವ್ ಎಲ್ಲಾರ್‌ಕು ಇಲ್ಲೆ. ಚೆನ್ನ ಜನ ಇಕ್ಕಲು ವಿಗ್ರಹಕ್ ಜೀವ ಉಂಡ್‍ೕಂದ್ ಗೇನ ಮಾಡಿಯಂಡ್, ವಿಗ್ರಹಕ್ ಅರ್ಪಿಚಿಟ್ಟ ಕೂಳ್‌ನ ತಿಂದಂಡುಂಡ್, ಅಯಿಂಗಡ ಮನಸಾಕ್ಷಿ ಬಲಹೀನವಾಯಿತ್ ಉಳ್ಳಾಂಗ್ ಅದ್ ಅಶುದ್ದವಾಯಿತುಂಡ್. 8ನಂಗ ತಿಂಬ ಆಹಾರತ್‍ರಗುಂಡ್ ದೇವ ನಂಗಳ, ಬಲ್ಯಂವೋಂದ್ ಎಣ್ಣುಲೆ. ಎನ್ನಂಗೆಣ್ಣ್‌ಚೇಂಗಿ, ನಂಗ ಉಂಗತೆ ಇಂಜತೇಂಗಿ, ನಂಗಕ್ ಒರ್ ನಷ್ಟವು ಆಪುಲೆ; ಅನ್ನನೆ ಉಂಡತೇಂಗಿಯು ನಂಗಕ್ ಒರ್ ಲಾಬವು ಇಲ್ಲೆ. 9ನಿಂಗಕ್ ಎಂತ ಬೋಂಡ್‍ಚೇಂಗಿಯು ತಿಂಬಕ್ ಕಯ್ಯೂಂದ್ ಉಳ್ಳ ಸ್ವಾತಂತ್ರ ದೇವ ತಂದಿತುಂಡ್. ಆಚೇಂಗಿ ಆ ಸ್ವಾತಂತ್ರ, ದೇವಡ ಮೇಲೆ ಉಳ್ಳ ನಂಬಿಕೇಲ್ ಬಲಹೀನವಾಯಿತುಳ್ಳಯಿಂಗ ಬೊಳಿಯುವಕ್ ತಡೆಯಾಯಿತ್ ಇಪ್ಪಕ್ಕಾಗ. 10ಎನ್ನನೆ ಎಣ್ಣ್‌ಚೇಂಗಿ, ವಿಗ್ರಹಕ್ ಜೀವ ಇಲ್ಲೇಂದ್ ಗೊತ್ತುಳ್ಳ ನಿಂಗ, ದೇವಸ್ತಾನತ್‍ಲ್ ತಿಂಬಕ್ ಅಳ್‌ತಂಡ್ ಇಪ್ಪದ್‍ನ, ಅನ್ನನೆ ತಿಂಬದ್ ಪಾಪಾಂದ್ ಗೇನ ಮಾಡಿಯಂಡ್ ಉಳ್ಳ ಇಂಞೊಬ್ಬ ನಿಂಗಳ ಕಾಂಬಕ, ಅಂವೊ ಅನ್ನನೆ ಮಾಡ್‍ವದ್ ಪಾಪಾಂದ್ ಗೇನ ಮಾಡಿತ್ಂಜತೇಂಗಿಯು, ನೀಡಗುಂಡ್ ಅಂವೊಂಗ್ ಸಹ ಅನ್ನನೆ ದೇವಸ್ತಾನತ್‍ಲ್ ಅರ್ಪಿಚಿಟ್ಟ ಕೂಳ್‌ನ ತಿಂಬಕ್ ದೈರ್ಯ ಬಪ್ಪ ಅಲ್ಲ? 11ಬಲಹೀನವಾನ ನಿಂಗಡ ಅಣ್ಣತಮ್ಮಣಂಗ ನಿಂಗಡ ಅರಿವ್‍ಯಿಂಜ ಪಾಳಾಯಿತ್ ಪೋಪ. ಅಂವೊಂಗಾಯಿತ್ ಸಹ ಕ್ರಿಸ್ತ ಚತ್ತತಲ್ಲಾ? 12ಇನ್ನನೆ ನಿಂಗಡ ಅಣ್ಣತಮ್ಮಣನ, ಪಾಳ್ ಮಾಡ್‍ಚೇಂಗಿ, ಅಂವೊಂಡ ಬಲಹೀನವಾನ ಮನಸಾಕ್ಷಿನ ನಿಂಗ ಗಾಯ ಮಾಡ್‌ವಗುಂಡ್, ನಿಂಗ ಕ್ರಿಸ್ತಂಗ್ ವಿರೋದವಾಯಿತ್ ಪಾಪ ಮಾಡ್‌ವಿರ. 13ಆನಗುಂಡ್, ಯೇಸುನ ನಂಬ್‍ನ ಅಣ್ಣತಮ್ಮಣಂಗ ಪಾಪ ಮಾಡ್‌ವಕ್ ನಾನ್ ಆಹಾರ ತಿಂಬದ್ ಕಾರಣವಾಯಿತ್ ಇಂಜತೇಂಗಿ, ಅಯಿಂಗ ಕ್ರಿಸ್ತಂಡ ಮೇಲೆ ನಂಬಿಕೆ ಇಡ್‌ವಕ್ ನಾನ್ ತಡೆಯಾಯಿತ್ ಇಕ್ಕತನೆಕೆ ನಾನ್ ಎಕ್ಕಾಲು ಯರ್ಚಿ ತಿಂಬದೇ ಇಲ್ಲೆ.
Aktualisht i përzgjedhur:
1 ಕೊರಿಂಥ 8: ಕೊಡವ
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2017, New Life Literature (NLL)