1 ಕೊರಿಂಥ 16
16
ಯೇಸುನ ನಂಬ್‍ನಯಿಂಗಕ್ ಸಹಾಯ ಮಾಡ್‌ವಕ್ ಪಣ ಕೂಟಿತ್ ಬೆಪ್ಪದ್
1ಯೆರೂಸಲೇಮ್‍ಲ್ ಉಳ್ಳ ಯೇಸುನ ನಂಬ್‍ನಯಿಂಗಕ್ ಸಹಾಯ ಮಾಡ್‌ವಕಾಯಿತ್ ಕೂಟಿತ್ ಬೆಪ್ಪ ಪಣತ್‍ರ ವಿಷಯತ್‍ಲ್, ಗಲಾತ್ಯ ನಾಡ್‍ಲ್ ಉಳ್ಳ ಸಬೇಕ್ ನಾನ್ ಆಜ್ಞೆ ಮಾಡ್‍ನನೆಕೆ ನಿಂಗಳು ಮಾಡಿ. 2ಓರೋರ್ ವಾರತ್‍ರ ಆದ್ಯ ದಿವಸತ್‍ಲ್ ನಿಂಗ ಕೂಡಿ ಬಪ್ಪಕ, ಆ ವಾರತ್‍ಲ್ ನಿಂಗ ನಯಿಚ ದುಡ್ಡ್‌ಲ್, ಚೆನ್ನ ದುಡ್ಡ್‌ನ ಬೋರೆ ಮಾಡಿತ್ ಬೆಕ್ಕಂಡು. ನಾನ್ ನಿಂಗಡಲ್ಲಿಕ್ ಬಪ್ಪಕತ್ತನೆ ನಿಂಗ ಪಾರಕಾತಂಡಿಪ್ಪಕ್ಕಾಗ. ಅಕ್ಕ ನಾನ್ ಬಪ್ಪಕ, ಪಣತ್‍ನ ಕೂಟಿತ್ ಬೆಪ್ಪ ಕೆಲಸ ನಿಂಗಕ್ ಇಪ್ಪುಲೆ. 3ನಾನ್ ಬಪ್ಪಕ, ನಿಂಗ ಸಹಾಯ ಮಾಡ್‌ವಕಾಯಿತ್ ಕೂಟಿತ್ ಬೆಚ್ಚ ಪಣತ್‍ನ ಯೆರೂಸಲೇಮ್‌ಕ್ ಕೊಂಡ್ ಪೋಪಕ್ ದಾರ್‌ಕ್ ಯೋಗ್ಯತೆ ಉಂಡ್‍ೕಂದ್ ನಿಂಗ ಗೇನ ಮಾಡ್‍ವಿರೋ, ಅಯಿಂಗಡ ಪಕ್ಕ ಪಣತ್‍ನ ಕೊಡ್‌ತಿತ್, ಅಯಿಂಗಡ ಕೈಯಿಲ್ ಕಾಗದ ಕೊಡ್‌ತಿತ್ ನಾನ್ ಅಯಿಪಿ. 4ಅಥವ, ನಾನು ಅಯಿಂಗಡ ಕೂಡೆ ಪೋಕಂಡೂಂದ್ ನಿಂಗ ಗೇನ ಮಾಡ್‍ಚೇಂಗಿ, ಅಯಿಂಗ ನಾಡ ಕೂಡೆ ಬರಡ್. 5ನಾನ್ ಇಕ್ಕ ಮಕೆದೋನ್ಯ ನಾಡ್‍ರ ಬಟ್ಟೇಲ್ ಪೋಯಂಡುಳ್ಳಗುಂಡ್, ಅದಾನ ಪಿಂಞ ನಾನ್ ನಿಂಗಡ ಪಕ್ಕ ಬಪ್ಪಿ. 6ಒರ್ ಸಮಯ ನಾನ್ ನಿಂಗಡ ಕೂಡೆ ಚೆನ್ನ ಕಾಲ ಒಳಿಯುವಿ, ಕಯ್ಯುವೇಂಗಿ ಕುಳ್‌ರ್ ಕಾಲತ್‍ಲ್‌ ನಿಂಗಡ ಕೂಡೆ ಒಳಿಯುವಿ. ಅಕ್ಕ ನಿಂಗ, ನಾನ್ ಪೋಪಕುಳ್ಳ ಪ್ರಯಾಣಕ್ ಬೋಂಡಿಯಾನ ಸಹಾಯ ಮಾಡ್‌ವಕ್ ಕಯ್ಯು. 7ಇಕ್ಕತ್‍ರ ಪ್ರಯಾಣತ್‍ಲ್, ನಾನ್ ನಿಂಗಡ ಪಕ್ಕ ಬಂದಿತ್ ಬೆರಿಯ ಬುಟ್ಟಿತ್ ಪೋಪಕ್ ನಾಕ್ ಕುಶಿಯಿಲ್ಲೆ; ಒಡೆಯ ಅಪ್ಪಣೆ ಕೊಡ್‍ತತೇಂಗಿ, ನಿಂಗಡ ಪಕ್ಕ ಬಂದಿತ್ ಚೆನ್ನ ಕಾಲ ಇಪ್ಪಕ್ ಆಪಾಂದ್ ನಂಬಿಕೇಲ್ ಉಳ್ಳ. 8ಆಚೇಂಗಿಯು ಪಂಚಾಶತ್ತಮ#16.8 ಪಂಚಾಶತ್ತಮ ಎಂತ ಎಣ್ಣ್‌ಚೇಂಗಿ ಯೆಹೂದ್ಯ ಜನ ಪಸ್ಕ ನಮ್ಮೆರ ದಿವಸತ್ಂಜ ಐಂಬದನೆ ದಿವಸತ್ ಮಾಡ್‌ವ ನಮ್ಮೆ. ಇದ್ಂಗ್ ಇಬ್ರಿಯ ತಕ್ಕ್‌ಲ್ ಪೆಂತೆಕೋಸ್ತೇಂದ್ ಎಣ್ಣುವ. ನಮ್ಮೆಕತ್ತನೆ ಎಫೆಸ ಪಟ್ಟಣತ್‍ಲ್ ಇಪ್ಪಿ. 9ಎನ್ನಂಗೆಣ್ಣ್‌ಚೇಂಗಿ, ದೇವಡ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವಕ್ ಬಲ್ಯ ಪಡಿ ತೊರ್‌ಂದಿತುಂಡ್. ನಾನ್ ಮಾಡ್‌ವಾನ ವಿರೋದಿಚಿಡುವಯಿಂಗಳು ಇಲ್ಲಿ ದುಂಬ ಉಂಡ್. 10ತಿಮೊಥೆಯ ನಿಂಗಡ ಪಕ್ಕ ಬಾತೇಂಗಿ, ಅಂವೊ ನಿಂಗಡ ಕೂಡೆ ದೈರ್ಯತ್‍ಲ್ ಇಪ್ಪಕ್ ಸಹಾಯ ಮಾಡಿ, ಅಂವೊ ನಾಡನೆಕೆ ದೇವಡ ಸೇವೆ ಮಾಡಿಯಂಡುಂಡ್. 11ಆನಗುಂಡ್ ದಾರೂ ಅಂವೊನ ಕೀಳಾಯಿತ್ ಕಾಂಗತಿ. ಅಂವೊ ನಾಡ ಪಕ್ಕ ಬಪ್ಪಕ್, ನಿಂಗ ಅಂವೊನ ಸಮಾದಾನತ್‍ಲ್ ಅಯಿಚಿರಿ. ಬಾಕಿ ತಮ್ಮಣಂಗಡ ಕೂಡೆ ಅಂವೊ ಇಲ್ಲಿ ಬಪ್ಪಾಂದ್ ನಾನ್ ಪಾರಕಾತಂಡುಂಡ್. 12ತಮ್ಮಣನಾನ ಅಪೊಲ್ಲೋಸ ಬೋರೆ ತಮ್ಮಣಂಗಡ ಕೂಡೆ ನಿಂಗಡ ಪಕ್ಕ ಬಂತ್ ನಿಂಗಳ ಕಾಂಗಂಡೂಂದ್ ಅಂವೊನ ನಾನ್ ದುಂಬ ಬೋಡಿಯಂಡಿಯೆ; ಆಚೇಂಗಿ. ಅಂವೊಂಗ್ ಇಕ್ಕ ಅಲ್ಲಿ ಬಪ್ಪಕ್ ಮನಸ್ಸಿಲ್ಲೆ, ಅಂವೊಂಗ್ ಎಕ್ಕ ಸಂದರ್ಪ ಕ್‍ಟ್ಟುವ ಅಕ್ಕ ಬಪ್ಪ.
ಆಕೀರ್ ಆಲೋಚನೆ
13ನಿಂಗ ಎಕ್ಕಾಲು ಎಚ್ಚರತ್‍ಲ್ ಇರಿ. ದೇವಡ ಮೇಲೆ ಉಳ್ಳ ನಂಬಿಕೇಲ್ ನಿಂಗ ದೃಡವಾಯಿತ್ ಇರಿ, ನಿಂಗ ದೈರ್ಯತ್‍ಲ್ ಪಿಂಞ ಬಲವುಳ್ಳಯಿಂಗಳಾಯಿತ್ ಇರಿ. 14ನಿಂಗ ಮಾಡ್‌ವ ಎಲ್ಲಾ ಕೆಲಸತ್‍ನ ಪ್ರೀತಿಲ್ ಮಾಡಿ. 15ನಾಡ ಅಣ್ಣತಮ್ಮಣಂಗಳೇ, ಸ್ತೆಫನಂಡ ಕುಟುಂಬತ್‍ಲ್ ಉಳ್ಳಯಿಂಗ ಅಖಾಯ ಪ್ರಾಂತ್ಯತ್‍ಲ್ ಆದ್ಯವಾಯಿತ್ ಯೇಸುನ ನಂಬ್‍ನಯಿಂಗಾಂದು, ಪಿಂಞ ದೇವಡ ಮಕ್ಕಕ್ ಸೇವೆ ಮಾಡ್‌ವಕ್ ಅಯಿಂಗೆಲ್ಲಾ ಅಯಿಂಗಳ ಒಪ್ಪ್‌ಚಿಟ್ಟಿತುಂಡ್‍ೕಂದೂ ನಿಂಗಕ್ ಗೊತ್ತುಂಡಲ್ಲ. 16ಇನ್ನನೆ ಉಳ್ಳಯಿಂಗಕು, ಅಯಿಂಗಡ ಕೂಡೆ ದೇವಡ ಸೇವೇನ ಕಷ್ಟಟತ್‍ಲ್ ಮಾಡಿಯಂಡುಳ್ಳ ಸೇವಕಂಗಕೂ, ಅಯಿಂಗ ಎಣ್ಣ್‌ವಾನ ಕ್‍ೕಟಿತ್ ಅದ್ಂಗ್ ಬಗ್ಗಿತ್ ನಡ್‍ಕಂಡೂಂದ್ ನಿಂಗಕ್ ಬುದ್ದಿ ಎಣ್ಣ್‌ವಿ. 17ಸ್ತೆಫನ, ಫೊರ್ತುನಾತ ಪಿಂಞ ಅಖಾಯಿಕ ಎಣ್ಣ್‌ವಯಿಂಗ ಕೊರಿಂಥ ಪಟ್ಟಣತ್ಂಜ ಇಲ್ಲಿ ಬಂದಾಂಗ್ ನಾಕ್ ದುಂಬ ಕುಶಿಯುಂಡ್. ನಿಂಗ ನಾಕ್ ಎಂತ ಮಾಡಂಡೂಂದ್ ಗೇನಮಾಡಿಯಂಡಿಂಜಿರೋ ಅದ್‍ನೆಲ್ಲಾ ಅಯಿಂಗ ನಾಕ್ ಮಾಡಿತ್. 18ಅಯಿಂಗ ನಾಕ್ ಪಿಂಞ ನಿಂಗಕ್ ಚಾಯಿ ಒತ್ತಾಸೆ ಮಾಡ್‍ಚಿ, ಅನ್ನನೆ ದೇವಡ ಸೇವೇನ ಚಾಯಿ ಮಾಡ್‌ವಯಿಂಗಳ ನಿಂಗ ದುಂಬ ಗನಪಡ್‌ತಂಡು.
ಆಕೀರ್ ವಂದನೆ
19ಆಸ್ಯ ನಾಡ್‍ಲ್ ಉಳ್ಳ ಸಬೇಲ್ ಉಳ್ಳಯಿಂಗ ನಿಂಗಕ್ ವಂದನೆ ಎಣ್ಣಿಯಂಡುಂಡ್. ಅಕ್ವಿಲನು ಪ್ರಿಸ್ಕಿಲ್ಲಳು ಅಯಿಂಗಡ ಮನೆಲ್ ಕೂಡಿ ಬಪ್ಪ ಸಬೆರ ಜನಳು ನಿಂಗಕ್ ಒಡೆಯಂಡಲ್ಲಿ ವಂದನೆ ಎಣ್ಣಿಯಂಡುಂಡ್. 20ಇಲ್ಲಿ ಉಳ್ಳ ಅಣ್ಣತಮ್ಮಣಂಗ ಎಲ್ಲಾ ನಿಂಗಕ್ ವಂದನೆ ಎಣ್ಣಿಯಂಡುಂಡ್. ನಿಂಗ ಒಬ್ಬಂಗ್ ಒಬ್ಬ ಪವಿತ್ರವಾನ ಮುತ್ತ್ ಕೊಡ್‌ತಿತ್#16.20 ಆದ್ಯ ಸಬೇಲ್ ಒಬ್ಬೊಬ್ಬಂಗಡ ಕಪಾಲ್‍ಲ್ ಮುತ್ತ್ ಕೊಡ್‌ತಿತ್ ವಂದನೆ ಮಾಡ್‌ವ. ವಂದನೆ ಮಾಡಿ. 21ಪೌಲನಾನ ನಾನ್ ನಾಡ ಸ್ವಂತ ಕೈಯಿಂಜ ನಿಂಗಕ್ ವಂದನೆ ಒಳ್‌ದಿಯಂಡುಂಡ್. 22ಒಬ್ಬ, ಒಡೆಯನ ಪ್ರೀತಿ ಮಾಡತೆ ಪೋಚೇಂಗಿ ಅಂವೊಂಡ ಮೇಲೆ ಶಾಪ ಬರಡ್. ಓ ನಂಗಡ ಒಡೆಯನೇ ಬಾ. 23ಒಡೆಯನಾನ ಯೇಸುರ ಕೃಪೆ ನಿಂಗಡ ಕೂಡೆ ಇರಡ್. 24ಕ್ರಿಸ್ತ ಯೇಸುರ ಮೂಲಕ ನಾಡ ಪ್ರೀತಿ, ನಿಂಗೆಲ್ಲಾಡ ಕೂಡೆ ಇರಡ್. ಆಮೆನ್.
Aktualisht i përzgjedhur:
1 ಕೊರಿಂಥ 16: ಕೊಡವ
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2017, New Life Literature (NLL)