Sawmus 95
95
Avat adahan kabeyhene Uhokri
1Aytninay madikte! Uyay kabayha Kiyavwiye Uhokri! Uyay pak akak batekka git ner kene tipbe ku pariye mpithawiy hawata amnihwiy.
2Uyay kahayak ta givetunat akak kabayhaki, pekempi avat akak batekka adahan kabayhaki.
3Mmanawa ig Kiyavwiye Uhokri ka gidatnisima. Ig detye Ikivarat. Ig givitminkis madikte uhokriviyene henenwatnenwa.
4Ig kumaduka pahakte hawkri, ku samah ariwntak miyokwiyebdi kane amihnisima danuhte arit waxribdi kane amunisima.
5Ig kumaduka parahwokwa ku pariye igwa keh. Hawata ig kumaduka waxri ku pariye gikehniwata.
6Aytninay, uyay paberetusaw adahan wixwiy kiyathene Kiyavwiye Uhokri! Uyay paberetusaw givetunat uhumtenwiy!
7Mmanawa ig uwohkigawiy, wixwiyme gihiyegavu ku pariye ig avuriw. Wixwiy gimuwtohravu ku pariye ig huwitha. Timapnay kuri ku pariye giwn wotwiy:
8“Ka yi muwaka ikaw karatonavye, ke ignesbe yahawkrivwi minikweknevwibe aynte amun ini iwetrit Meribá hawata ayge amatmadga kewye Massá.
9Ayge igkis hikekwen ba nah aywatma gikakkis hawata igkisevye ayta nutivut, hiyawa igkis hiyepnekuye ku pariye nah kuwis kehe gidahankis.
10Abetnewa paxnika madikwa (40) kamukri ignes hiyeg kehne nudagoni. Nikwe nah awna: “Yisneki hiyeg mbeyviye yihiyekemni! Yis ka ihpekere nukumadukan!”
11Nah dagawne gitkis, nah kehe inin nukaksan giminkis, nah awna: “Yis ka tukunima paraknek atere avitit Waxri Ikaksaki, ku kiney aygekama nah iki yit mayaka.”
Aktualisht i përzgjedhur:
Sawmus 95: pluPB
Thekso
Kopjo
Krahaso
Ndaje
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2018, Wycliffe Bible Translators, Inc. All rights reserved.