Mutendeko 2
2
1Ntheura kuchanya na charu cha pasi na vyose ivyo vili mwenemumo vikamara kulengeka. 2Pa zuŵa la chinkhonde na chiŵiri, Chiuta wakaŵa wamarizga mlimo wakhe uwo wakachitanga. Pa zuŵa ili la chinkhonde na chiŵiri wakapumula#2.2 wakapumula: Lizgu ili mu chiHebere ndi “sabata” ilo likung'anamula kuti kupumula panji kureka kugwira nchito ndipo likupulikwa nga ndi lizgu lakuti “chinkhonde na chiŵiri”. ku milimo yose iyo wakachitanga.#Heb 4.4, 10#Kuf 20.11 3Ntheura Chiuta wakatumbika zuŵa la chinkhonde na chiŵiri ndipo wakalipatula, pakuti pa zuŵa leneilo wakapumula ku mlimo wakhe uwo wakachita wa kulenga. 4Iyi ndiyo ndondomeko ya kalengekero ka kuchanya na charu apo vikalengekera.
Munda wa Edeni
Para Fumu Chiuta wakalenganga charu cha pasi na vyose vya kuchanya, 5vyakumera vya mu minda vikaŵa vindamere pa charu, ndiposo vivwati vya mu thondo vikaŵa vindambe kumera, chifukwa Fumu Chiuta wakaŵa wandarokweske vura pa charu. Ndiposo kukaŵavye munthu wakulima charu. 6Kweni nyathutwe wakakweranga kufumira pa charu na kuthilira charu chose.
7Penepapo Fumu Chiuta wakawumba munthu kufumira ku dongo la pasi, na kuthutiramo mu mphuno zakhe muvuchi wa umoyo. Ndipo munthu wakazgoka wamoyo.#1 Kor 15.45
8Ndipo Fumu Chiuta wakata munda mu Edeni, cha ku mafumiro gha dazi. Mwenemumo ndimo wakaŵika munthu mweneuyo wakamuwumba. 9Sono Fumu Chiuta wakamezga mu dongo makuni ghakutowa gha vipambi viweme pakurya. Pakati pa munda wakamezgapo khuni la umoyo na khuni la kumanyira uweme na uheni.#Uvu 2.7, 22.2, 14
10Mronga ukafuma mu Edeni kuthilira munda uwu, ndipo kufuma penepara ukagaŵikana kuŵa mironga yinayi. 11Zina la mronga wakudanga ndi Pishoni. Uwu ukwenda na kuporota mu charu chose cha Havila, uko kuli golide. 12Golide la charu icho ndiweme. Kuliso ulimbo wa sungu liweme ndiposo na libwe lakuzirwa la onike. 13Zina la mronga wa chiŵiri ndi Gihoni. Uwu ukwenda na kuporota mu charu chose cha Etiyopiya. 14Zina la mronga wa chitatu ndi Tigirisi uwo ukwenda ku mafumiro gha dazi kwa msumba wa Ashuru. Mronga wa chinayi ndi Yufurate.
15Sono Fumu Chiuta wakamutora munthu yura na kumuŵika mu munda wa Edeni, kuti wawulimenge na kuwupwererera. 16Ndipo Fumu Chiuta wakamuphalira munthu yura, wakati, “Uli mwanangwa kurya vipambi vya khuni lirilose mu munda. 17Kweni vipambi vya khuni la kumanyira uweme na uheni ungaryanga chara, chifukwa mu zuŵa leneilo uti uryere, ufwenge nadi.”
18 Fumu Chiuta wakati, “Nkhuweme chara kuti munthu wakharenge yekha. Nditi ndimupangire movwiri wakumwenerera.” 19Ntheura Fumu Chiuta wakatora dongo na kuwumba vinyama vyose vya mu thengere na viyuni vyose vya mudera, ndipo wakiza navyo kwa munthu kuti wawone mazina agho wangavithya. Zina lose ilo munthu wakathya chamoyo chilichose, leneilo ndilo likaŵa zina lakhe. 20Sono munthu wakathya mazina vyakuŵeta vyose, viyuni vya mudera, na vinyama vyose vya mu thengere. Kweni kwa munthu kuti kukasangika movwiri wakumwenerera chara.
21Ntheura Fumu Chiuta wakamugoneka munthu tulo tuzitu. Apo wakaŵa wachali mu tulo, Chiuta wakatorako mbambo yakhe yimoza na kuwezgerapo nyama apo yikafuma. 22Ndipo mbambo iyo Fumu Chiuta wakatorako ku mwanarume wakayizgora kuŵa mwanakazi, ndipo Chiuta wakiza nayo kwa mwanarume. 23Ndipo munthu wakati,
“Uyu sono nchiwangwa cha viwangwa vyane
ndiposo munofu wa munofu wane.
Wati wachemekenge, ‘Mwanakazi’,#2.23 Mwanakazi: Mu Bayibolo la chiHebere, lizgu lakuti “mwanarume” na lakuti “mwanakazi” ghakupulikikwa mwakuyana waka, ndiko kuti “Ish” (mwanarume) ndipo “Isha” (mwanakazi).
chifukwa wakatoreka kufuma ku mwanarume.”
24Pa chifukwa ichi, mwanarume wati waside ŵawiske na ŵanyina, na kubatikana na muwoli wakhe, ndipo ŵati ŵaŵe thupi limoza.#Mat 19.5; Mrk 10.7-8; 1 Kor 6.16; Efe 5.31
25Ndipo wose ŵaŵiri wuwo mwanarume na mwanakazi ŵakaŵa nkhule, kweni kuti ŵakaŵa na soni chara.
Aktualisht i përzgjedhur:
Mutendeko 2: Tumbuka
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Bible Society of Malawi