ꠔꠃꠞꠣꠔ ১: ꠙꠄꠖꠣ ꠘꠣꠝꠣ 2
2
1ꠅꠃ ꠟꠣꠈꠣꠘ ꠀꠍꠝꠣꠘ-ꠎꠝꠤꠘ ꠀꠞ ꠄꠞ ꠝꠣꠎꠞ ꠢꠇꠟꠔꠣ ꠙꠄꠖꠣ ꠇꠞꠣ ꠡꠦꠡ ꠅꠁꠟ। 2ꠀꠟ꠆ꠟꠣꠄ ꠁ ꠢꠇꠟ ꠇꠣꠝ ꠡꠦꠡ ꠇꠞꠤꠀ ꠢꠣꠞꠟꠦ ꠡꠣꠔ ꠘꠝ꠆ꠛꠞ ꠖꠤꠘ ꠀꠞꠣꠝ ꠇꠞꠟꠣ, ꠔꠣꠁꠘ ꠁꠖꠤꠘ ꠀꠞ ꠇꠥꠘ꠆ꠔꠣ ꠙꠄꠖꠣ ꠇꠞꠟꠣ ꠘꠣ। 3ꠅꠃ ꠡꠣꠔ ꠘꠝ꠆ꠛꠞ ꠖꠤꠘꠞꠦ ꠛꠞꠇꠔ ꠘꠣꠎꠤꠟ ꠇꠞꠤꠀ ꠙꠣꠇ ꠖꠤꠘ ꠇꠞꠟꠣ, ꠔꠣꠘ ꠢꠇꠟꠔꠣ ꠙꠄꠖꠣ ꠇꠞꠣ ꠡꠦꠡ ꠇꠞꠤ ꠔꠣꠁꠘ ꠅꠃ ꠖꠤꠘ ꠎꠤꠞꠣꠁꠟꠣ।
ꠀꠖꠝ-ꠢꠣꠅꠀ ꠙꠄꠖꠣ
4ꠅꠃ ꠅꠁꠟ ꠀꠍꠝꠣꠘ ꠀꠞ ꠎꠝꠤꠘ ꠙꠄꠖꠣꠞ ꠛꠄꠀꠘ। ꠝꠣꠛꠥꠖ ꠀꠟ꠆ꠟꠣꠄ ꠎꠦꠛꠟꠣ ꠀꠍꠝꠣꠘ ꠀꠞ ꠎꠝꠤꠘ ꠙꠄꠖꠣ ꠇꠞꠍꠤꠟꠣ, 5ꠁ ꠡꠝꠄ ꠎꠝꠤꠘꠞ ꠃꠙꠞꠦ ꠇꠥꠘꠥꠎꠣꠔꠞ ꠉꠣꠍ-ꠙꠣꠟꠣ ꠀꠍꠤꠟ ꠘꠣ ꠀꠞ ꠇꠥꠘꠥ ꠟꠔꠣ-ꠙꠣꠔꠣꠅ ꠚꠟꠤꠍꠦ ꠘꠣ, ꠇꠣꠞꠘ ꠔꠣꠁꠘ ꠎꠝꠤꠘꠞ ꠃꠙꠞꠦ ꠝꠦꠊ ꠖꠤꠍꠂꠘ ꠘꠣ, ꠀꠞ ꠎꠝꠤꠘ ꠀꠛꠣꠖ ꠇꠞꠣꠞ ꠝꠣꠘꠥꠡꠅ ꠀꠍꠤꠟ ꠘꠣ। 6ꠅꠃ ꠡꠝꠄ ꠝꠣꠐꠤꠞ ꠝꠥꠞ ꠕꠣꠇꠤ ꠙꠣꠘꠤ ꠃꠑꠔ ꠀꠞ ꠎꠝꠤꠘ ꠜꠤꠎꠔ। 7ꠛꠣꠖꠦ ꠝꠣꠛꠥꠖ ꠀꠟ꠆ꠟꠣꠄ ꠚꠦꠇ ꠝꠣꠐꠤ ꠖꠤꠀ ꠝꠣꠘꠥꠡ ꠛꠣꠘꠣꠁꠀ ꠔꠣꠞ ꠘꠣꠇꠞ ꠝꠣꠎꠦ ꠚꠥ ꠖꠤꠀ ꠎꠣꠘ ꠢꠣꠞꠣꠁꠟꠣ। ꠀꠞ ꠅꠃ ꠝꠣꠘꠥꠡ ꠎꠣꠘꠖꠣꠞ ꠅꠁꠟ। 8ꠝꠣꠛꠥꠖ ꠀꠟ꠆ꠟꠣꠄ ꠙꠥꠛꠦꠖꠤ ꠀꠖꠣꠘ ꠘꠣꠝꠞ ꠎꠣꠉꠣꠔ ꠄꠇ ꠛꠣꠉꠣꠘ ꠇꠞꠍꠤꠟꠣ, ꠢꠘꠅ ꠔꠣꠘꠞ ꠛꠣꠘꠣꠁꠟ ꠅꠃ ꠝꠣꠘꠥꠡꠞꠦ ꠞꠣꠈꠟꠣ। 9ꠢꠤꠈꠣꠘꠞ ꠝꠣꠐꠤꠔ ꠔꠣꠁꠘ ꠅꠃ ꠟꠣꠈꠣꠘ ꠉꠣꠍ ꠅꠇꠟ ꠚꠟꠣꠁꠍꠟꠣ, ꠎꠦꠔꠣ ꠖꠦꠈꠔꠦ ꠈꠥꠛ ꠡꠥꠘ꠆ꠖꠞ ꠀꠞ ꠚꠟꠅ ꠈꠣꠁꠔꠦ ꠈꠥꠛ ꠝꠎꠣ। ꠀꠞ ꠛꠣꠉꠣꠘꠞ ꠝꠣꠎꠈꠣꠘꠅ ꠔꠣꠁꠘ “ꠎꠤꠘ꠆ꠖꠦꠉꠤ-ꠉꠣꠍ” ꠀꠞ “ꠘꠦꠇꠤ-ꠛꠖꠤꠞ ꠀꠈꠟ ꠖꠦꠅꠞꠣ ꠉꠣꠍ” ꠘꠣꠝꠞ ꠖꠥꠁꠐꠣ ꠉꠣꠍꠅ ꠞꠣꠈꠍꠤꠟꠣ।
10ꠢꠃ ꠛꠣꠉꠣꠘꠅ ꠙꠣꠘꠤ ꠎꠥꠉꠣꠁꠀ ꠖꠤꠔ ꠄꠇ ꠉꠣꠋ ꠀꠍꠤꠟ, ꠎꠦꠇꠐꠣ ꠀꠖꠣꠘꠞ ꠝꠣꠎꠦꠖꠤ ꠛꠣꠞ ꠅꠁꠀ ꠌꠣꠁꠞ ꠜꠣꠉ ꠅꠁꠉꠦꠍꠤꠟ। 11ꠙꠄꠟꠣ ꠉꠣꠋꠉꠞ ꠘꠣꠝ ꠀꠍꠤꠟ ꠙꠤꠡꠥꠘ, ꠁꠇꠐꠣ ꠀꠡ꠆ꠔꠣ ꠢꠛꠤꠟꠣ ꠖꠦꠡꠞ ꠜꠤꠔꠞꠦ ꠖꠤꠀ ꠉꠦꠍꠦ। ꠁꠘꠅ ꠡꠥꠘꠣ ꠙꠣꠅꠀ ꠎꠣꠄ, 12ꠀꠞ ꠅꠃ ꠖꠦꠡꠞ ꠡꠥꠘꠣ ꠈꠥꠛ ꠈꠣꠐꠤ, ꠁꠔꠣ ꠍꠣꠠꠣꠅ ꠢꠤꠘꠅ ꠝꠦꠡꠇꠦ-ꠀꠝ꠆ꠛꠞ ꠀꠞ ꠀꠇꠤꠇ ꠝꠘꠤ ꠙꠣꠅꠀ ꠎꠣꠄ। 13ꠖꠥꠁ ꠘꠝ꠆ꠛꠞ ꠉꠣꠋꠉꠞ ꠘꠣꠝ ꠎꠤꠢꠥꠘ, ꠁꠇꠐꠣ ꠀꠡ꠆ꠔꠣ ꠇꠥꠡ ꠖꠦꠡꠞ ꠜꠤꠔꠞꠦ ꠖꠤꠀ ꠉꠦꠍꠦ। 14ꠔꠤꠘ ꠘꠝ꠆ꠛꠞ ꠉꠣꠋꠉꠞ ꠘꠣꠝ ꠖꠎꠟꠣ, ꠁꠇꠐꠣ ꠀꠡꠤꠞꠤꠀ ꠖꠦꠡꠞ ꠙꠥꠛꠦ ꠖꠤꠀ ꠉꠦꠍꠦ। ꠀꠞ ꠌꠣꠁꠞ ꠘꠝ꠆ꠛꠞ ꠉꠣꠋꠉꠞ ꠘꠣꠝ ꠅꠁꠟ ꠚꠥꠞꠣꠔ।
15ꠛꠣꠖꠦ ꠝꠣꠛꠥꠖ ꠀꠟ꠆ꠟꠣꠄ ꠅꠃ ꠝꠣꠘꠥꠡꠞꠦ ꠀꠖꠣꠘ ꠛꠣꠉꠣꠘꠅ ꠞꠣꠈꠟꠣ, ꠢꠤꠘꠅ ꠈꠦꠔ-ꠈꠣꠝꠣꠞ ꠀꠞ ꠢꠦꠚꠣꠎꠔ ꠇꠞꠣꠞ ꠟꠣꠉꠤ। 16ꠔꠣꠁꠘ ꠀꠖꠝꠞꠦ ꠢꠥꠇꠥꠝ ꠖꠤꠟꠣ, “ꠔꠥꠝꠤ ꠔꠥꠝꠣꠞ ꠈꠥꠡꠤꠝꠔ ꠁ ꠛꠣꠉꠤꠌꠣꠞ ꠎꠦꠇꠥꠘꠥ ꠉꠣꠍꠞ ꠚꠟ ꠈꠣꠁꠔꠣꠄ ꠙꠣꠞꠛꠣꠄ, 17ꠈꠣꠟꠤ ꠘꠦꠇꠤ-ꠛꠖꠤꠞ ꠀꠈꠟꠞ ꠉꠣꠍꠞ ꠚꠟ ꠈꠣꠁꠅ ꠘꠣ, ꠎꠦꠖꠤꠘ ꠔꠥꠝꠤ ꠅꠃ ꠉꠣꠍꠞ ꠚꠟ ꠈꠣꠁꠛꠣꠄ ꠁꠖꠤꠘ ꠔꠥꠝꠤ ꠝꠞꠛꠣꠄꠃ ꠝꠞꠛꠣꠄ।”
18ꠄꠞꠛꠣꠖꠦ ꠝꠣꠛꠥꠖ ꠀꠟ꠆ꠟꠣꠄ ꠇꠁꠟꠣ, “ꠝꠣꠘꠡꠞ ꠟꠣꠉꠤ ꠄꠇꠟꠣ ꠕꠣꠇꠣ ꠜꠣꠟꠣ ꠘꠣꠄ। ꠀꠝꠤ ꠔꠣꠞ ꠟꠣꠈ ꠄꠇꠎꠘ ꠎꠥꠠꠤ ꠛꠣꠘꠣꠁꠝꠥ।” 19ꠀꠞ ꠝꠣꠛꠥꠖ ꠀꠟ꠆ꠟꠣꠄ ꠖꠥꠘꠤꠀꠁꠞ ꠢꠇꠟ ꠎꠣꠘꠖꠣꠞ ꠀꠞ ꠀꠍꠝꠣꠘꠞ ꠢꠇꠟ ꠙꠣꠈꠤ ꠝꠣꠐꠤꠖꠤ ꠛꠣꠘꠣꠁꠀ ꠅꠃ ꠝꠣꠘꠡꠞ ꠍꠣꠝꠘꠦ ꠀꠘꠟꠣ, ꠖꠦꠈꠟꠣ ꠄꠁꠘ ꠁꠔꠣꠞꠦ ꠇꠤꠔꠣ ꠇꠁꠀ ꠒꠣꠇꠂꠘ, ꠀꠞ ꠔꠣꠁꠘ ꠎꠣꠞꠦ ꠎꠦ ꠘꠣꠝꠦ ꠒꠣꠇꠟꠣ, ꠔꠣꠞ ꠅꠃ ꠘꠣꠝ ꠅꠁꠟ। 20ꠀꠖꠝꠦ ꠢꠇꠟ ꠙꠣꠟꠣ ꠢꠦꠝꠣꠘ, ꠀꠍꠝꠣꠘꠞ ꠙꠣꠈꠤ ꠀꠞ ꠎꠋꠟꠤ ꠎꠣꠘꠥꠀꠞꠞ ꠘꠣꠝ ꠞꠣꠈꠟꠣ, ꠁꠔꠣꠞ ꠝꠣꠎꠦ ꠔꠣꠘ ꠟꠣꠈ ꠇꠥꠘꠥ ꠎꠥꠠꠤ ꠝꠤꠟꠟ ꠘꠣ। 21ꠄꠞꠛꠣꠖꠦ ꠔꠣꠁꠘ ꠀꠖꠝꠞ ꠝꠣꠎꠦ ꠛꠦꠢꠥꠡꠤ ꠊꠥꠝ ꠀꠘꠟꠣ। ꠅꠃ ꠊꠥꠝꠞ ꠝꠣꠎꠦ ꠔꠣꠘ ꠙꠣꠁꠘ꠆ꠎꠞꠞ ꠄꠇꠐꠣ ꠀꠒ꠆ꠒꠤ ꠈꠥꠟꠤꠀ ꠘꠤꠀ ꠎꠣꠉꠣꠐꠣ ꠛꠘ꠆ꠖ ꠇꠞꠤ ꠖꠤꠟꠣ, 22ꠀꠞ ꠅꠃ ꠀꠒ꠆ꠒꠤ ꠖꠤꠀ ꠝꠣꠛꠥꠖ ꠀꠟ꠆ꠟꠣꠄ ꠄꠇ ꠛꠦꠐꠤꠝꠣꠘꠥꠡ ꠛꠣꠘꠣꠁꠀ ꠀꠖꠝꠞ ꠉꠦꠍꠦ ꠀꠘꠟꠣ। 23ꠔꠣꠘꠦ ꠖꠦꠈꠤꠀ ꠀꠖꠝꠦ ꠇꠁꠟꠣ, “ꠅꠈꠘ ꠅꠁꠍꠦ, ꠔꠣꠁ ꠀꠝꠣꠞ ꠀꠒ꠆ꠒꠤꠞ ꠀꠒ꠆ꠒꠤ, ꠉꠥꠡ꠆ꠔꠞ ꠉꠥꠡ꠆ꠔ। ꠔꠣꠁꠞ ꠘꠣꠝ ꠅꠁꠛ ꠘꠣꠞꠤ, ꠔꠣꠁꠞꠦ ꠘꠞ ꠕꠣꠇꠤ ꠘꠦꠅꠀ।” 24ꠄꠞꠟꠣꠉꠤ ꠛꠦꠐꠣꠁꠘ꠆ꠔꠦ ꠝꠣ-ꠛꠣꠚꠞꠦ ꠍꠣꠠꠤꠀ ꠛꠃꠞ ꠟꠉꠦ ꠞꠁꠛꠣ, ꠔꠣꠞꠣ ꠖꠥꠁꠅꠎꠘ ꠄꠇ ꠡꠞꠤꠟ ꠅꠁꠛꠣ। 25ꠀꠖꠝ ꠀꠞ ꠔꠣꠘ ꠛꠤꠛꠤꠞ ꠡꠞꠤꠟ ꠃꠖꠣꠝ ꠕꠣꠇꠔ, ꠁꠔꠣ ꠇꠥꠘꠥ ꠡꠞꠝ ꠀꠍꠤꠟ ꠘꠣ।
Aktualisht i përzgjedhur:
ꠔꠃꠞꠣꠔ ১: ꠙꠄꠖꠣ ꠘꠣꠝꠣ 2: sylN
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© Ahle Kitab Society. All rights reserved.