Vargje biblike të njohura nga Matiö 6

Ndaje

'Pë 'ö 'ka dho‑ ꞊mɔɔ‑ ‑blɛɛsü yö ‑mü Atanna ‑bha ‑gblüdëdhɛ waa‑ ‑a dhɔɔbhaawɔn ‑nu kë ‑sü ꞊në‑ 'ka kö pë 'dhɛ 'wo to yöö ꞊dede ‑ya nu ka ‑dhɛ ‑a taa 'ka.

‑A ‑kë "dhʋ̈ ‑sü bha‑ 'gü, 'ka 'dho ‑ya ‑dhɛ 'ö dho ꞊kpaɔ dhia" ‑a ‑wɔn zuën ‑ta, ‑a ‑gɛn ‑mü ꞊dhɛ ‑dhɛkpaɔyi "pɛpɛ ꞊gban ‑bha 'gü ‑wɔn ‑yö 'do 'do. ‑Dhɛ 'dhɛ ꞊ya ꞊kpaɔ 'yö‑ ‑bha 'gü sëëbhodhe 'ö ꞊mɔɔ‑ ‑bha 'yö ‑kë 'pö‑ 'gü.

'Yö‑ pö: «'Wɔn 'ö‑ ‑wɔn 'gü 'yö 'a‑ pö ka ‑dhɛ ꞊dhɛ: 'Ka 'dho ‑ya pë ‑nu 'ka dho‑ ‑bhö "ɛɛn 'ö 'ka dho‑ mü kö 'ka ‑tosɛa kë‑ ‑ta, "ɛɛn sɔ ‑nu 'ka dho‑ ‑da bha‑ 'bha ‑wɔn zuën ‑ta bha 'yö bha; ‑a ‑gɛn ‑mü ꞊dhɛ ‑tosɛa kë ‑sü ‑wɔn ‑yö "gbɩɩ‑ 'ö‑ ‑ziö ‑bhöpë ‑wɔn ‑ta, "ɛɛn 'zü mɛ kwi ‑wɔn ‑yö "gbɩɩ‑ 'ö ‑ziö sɔ ‑wɔn ‑zë ‑ta, "ɛɛn ꞊sua ‑mü ‑ee?

"Kɛɛ bhi ‑zë 'bha‑ pö bhii bhɛa" Atanna ‑dhɛ, ‑bhö ‑da i ‑gɔ 'kɔɔdhö kö 'i "kwɛɛ ta i ‑ta kö 'i bhɛa"‑ ‑dhɛ. ꞊Ya kë "dhʋ̈ i Dë 'ö 'wɔn 'bha 'yaa ‑bin ‑bha 'ö i "piʋ̈ ‑bin 'gü mü bha ‑yö ‑dho i ꞊trɔɔn nu; ‑a ‑gɛn ‑mü ꞊dhɛ ‑a "yan ‑yö i ‑bha.

‑A ‑kë "dhʋ̈ ‑sü bha‑ 'gü 'ka‑ pö 'ka bhɛa" Atanna ‑dhɛ ‑kaa pö: Yi Dë Atanna 'i ‑ya ‑sü 'ka dhang‑ ‑nu 'gü, i 'tɔ 'ö "slʋ̈ʋ̈slʋ̈ bha ‑yö bhɔ ‑dhɛ ꞊gban "pɛpɛ 'gü. I ‑bha ‑gblüdëdhɛ ‑yö nu, i dhɔɔbhaawɔn ꞊në ‑yö kë "kpʋng ꞊taa ꞊dhɛ ‑kɔ 'ö‑ 'ka dhang‑ 'gü ‑a 'dhö.

‑Bhöpë 'ö ꞊mɔɔ yi ‑bha ꞊dɛɛ, ‑bhö ‑a nu yi ‑dhɛ.

‑Bhö yi ‑kë ‑sɔng yaya ‑nu ‑mawɔn 'to ꞊dhɛ ‑kɔ 'yi 'mɛ 'wo 'wɔn yaa ‑kë 'pö yi 'ka ‑a ‑nu ‑mawɔn to‑ 'ka 'pö ‑a 'dhö.

'Bha 'dho kwaa‑ yi ‑zü 'ö 'yi dho 'wɔn yaa kë ‑zian ‑ta, "kɛɛ ‑bhö yi dha Sɔtraan ‑gɔ; ‑a ‑gɛn ‑mü ꞊dhɛ ‑gblüdëdhɛ, 'gügbɩɩdhɛ waa‑ 'tɔbhɔdhe ‑wo bhi ꞊në i ‑gɔ 'ö‑ zübhoyi 'yaa 'dhö, 'ö‑ "dhiʋ̈todhɛ 'yaa 'dhö. Kö ‑yö kë "dhʋ̈ bha 'aa ‑yö kë!

꞊Ya kë ꞊dhɛ 'wɔn yaa 'ö mɛ ‑nu ‑wa ‑kë ka 'ka, 'ka‑ ‑nu ‑mawɔn 'to, ka Dë 'ö dhang‑ 'gü ‑yö ‑dho ka ‑bha 'wɔn yaa ‑nu ‑mawɔn 'to 'pö.

‑Maa ‑nu 'wo ziö sië dhang‑ 'gü bha ‑kaa ‑nu ‑ga! 'Waa pë ta kö woo‑ ‑a "kan kö ‑wa ‑kɔ dɔ, "kɛɛ ka Dë 'ö ‑ya ‑sü 'ka dhang‑ 'gü bha ‑ya ‑nu "dhiʋ̈ ‑gba. "Ɛɛn ‑a ‑ga 'ka‑ wo bha ‑maanë ‑nu ‑zë ‑a ‑nu ‑wɔn ‑yö "gbɩɩ‑ 'ö ‑ziö ka ‑zë ka ‑ta ‑ee?

'Yö dhiang zë‑ ‑nu ‑dhɛ 'ö‑ pö: «'Ka 'dho kaa‑ ꞊naɔ ‑nu ‑duɛ bho "kpʋngtaadhɛ 'ö pë see‑ ‑pë waa‑ "kɔɔ ‑nu 'wo‑ ‑bha, 'ö ꞊kwaanmɛ ‑nu 'wo 'kpong ‑nu wü faandhɛ bha, 'wo pë ꞊kwaan‑ ‑bha ya‑ 'gü. "Kɛɛ ‑ka ka ‑bha ꞊naɔ ‑nu ‑duɛ bho dhang‑ 'gü ‑dhɛ, 'ö pë see‑ ‑pë bha waa‑ "kɔɔ ‑nu 'waa‑ ‑bha, "ɛɛn 'ö ꞊kwaanmɛ ‑nu 'waa 'kpong 'wü‑ ‑bha kö ‑wo pë ꞊kwaan bha ꞊në‑ 'gü! ‑A ‑gɛn ‑mü ꞊dhɛ ‑dhɛ 'ö i ‑bha ꞊naɔ 'dhö‑ ‑bha, 'yö i zuë" 'dhö ‑kë ‑bha 'pö.»

'Yö Yesu ‑yö dho dhiang 'ka ö "dhiʋ̈ 'ö‑ pö: «Mɛ do 'yaa ꞊mɔɔ‑ ‑bha kö ‑yö yë kë mɛ ꞊plɛ "piʋ̈. ‑A mɛ do ‑dhɔ ‑dho ‑a kë, 'ö‑ mɛ do ‑san ‑ya ‑kë "wɛ gbonggbongdhö. ‑Yö ‑dho ‑kplü mɛ do ‑bha 'ö ‑kan mɛ 'dhɛ 'ö 'dhö‑ ‑bha, ‑kɔ do bha‑ 'gü, 'kii 'dho ꞊mɔɔ‑ ‑bha 'pö kö 'ka ka ‑dɩ nu Atanna waa‑ ꞊naɔ ‑a ‑nu ‑dhɛ "kwëë.

"Bü ‑blëë "wɛɛwɛɛ dhe ‑nu 'ö ꞊wa "bin ‑ya ꞊dɛɛ 'ö dhia" kö ꞊wa "kpɛa 'kpɔ 'wo dho‑ ‑nu "kan 'wo‑ ‑gʋ̈ bha Atanna ꞊ya wo ‑zë ‑a ‑nu dhi "sinma ‑sinma wo "dhʋ̈ bha ‑oo, 'yö ka ‑zë ꞊wɛ? ‑Më ꞊në ‑kë 'yö 'yaa sɔ ‑da ka ‑bha ("kɛɛ kö ka ‑zë ka ꞊bhlëësü wo ‑zë ‑a ‑nu ‑bha)? 'Dhang 'ö kaa‑ bho Atanna "dhiʋ̈ 'kpakpadhö bha 'yö ‑kë!

"Kɛɛ bhi ‑zë 'bha‑ pö 'i 'wëëga nu ‑wëëmɛ ‑dhɛ ‑a "slë mɔɔ‑ kö mɛ ‑zian 'ö dɔ ‑sü 'ka i "sɔɔ 'ya 'dho 'wɔn ꞊slɔɔ‑ 'gü! Kë "dhʋ̈ kö gbaɔ‑ 'i‑ wo bha ‑yö 'to ‑bin 'gü kö i Dë 'ö 'wɔn 'bha 'yaa ‑bin ‑bha bha ‑yö i ꞊trɔɔn nu.»

꞊Dhɛ 'ö ꞊yaa‑ pö "dhʋ̈, 'yö go mü 'zü 'ö‑ pö: «‑Kaa kë ‑së kö ka ‑bha 'wɔn ‑së kë ‑sü 'ya 'dho kë ꞊dhɛ pë ‑yaan kë ‑sü 'dhö. ꞊Ya kë ꞊dhɛ 'ka‑ kë "dhʋ̈ kö 'kii 'dho ka ꞊trɔɔn yö ka Dë 'ö ‑ya ‑sü 'ka dhang‑ 'gü bha‑ "piʋ̈.

'Yö‑ pö: «꞊Ya kë ꞊dhɛ 'ka 'sunng‑ 'ma sië kö 'ka bhɛa" Atanna ‑dhɛ, 'ka 'dho ka wë 'gü ‑siö ꞊dhɛ ‑kɔ 'ö ‑dɩ ‑to mɛ ‑nu "yënngmɛ ‑nu 'wo‑ kë‑ 'ka ‑a 'dhö! 'Ö 'wo wo wë 'gü ‑siö kö mɛ ꞊gban "pɛpɛ ‑wa 'wɔn dɔ ꞊dhɛ ‑wo 'sunng‑ 'ma sië. A‑ ‑pö ka ‑dhɛ tɛan‑ ꞊dede 'ka ꞊dhɛ: 'Mɛ 'wo bha ꞊wa wo ꞊trɔɔn ꞊slɔɔ "pɛpɛdhö ꞊naa bha. "Kɛɛ bhi ‑zë, a‑ ‑pö i ‑dhɛ ꞊dhɛ i 'sunng‑ 'ma sië, ‑bhö i wëë' "zu "pɛpɛdhö kö 'i i ‑gɔ 'gü ‑piö ‑së 'ka kö mɛ 'bha 'ya 'dho‑ 'wɔn dɔ ꞊dhɛ i 'sunng‑ ma sië; i Dë doseng 'ö 'wɔn 'bha 'yaa ‑bin ‑bha, 'ö i "piʋ̈ mü bha ꞊në dho‑ 'wɔn dɔ, 'yö 'wɔn ‑nu 'i‑ kë sië bha‑ ‑gɔ "yɔɔ dɔ i ‑gɔ.»