Non-dramatized audio in the language of pyen.

Pyen

Haeˉ mae beu, Sawˉluˆ nawˍ Ang suingˉ Yeˍsuˆ beu ta peˍ uiˍ na saeˍ naeˍ hingˉ naeˍ naˇ ciˍ yao, kaˍ yuˉ taw laeˍ yao hawkˆ nga cangˉ naeˉ. Yang yit pa rawˉ hek ang kaeˍ kawngˉ ang liˍ paˉ lae jiˉ. Nae yao, Daˍmaˍsaetˆ vengˍ veu ca naeˉ hpawm lang kyaˉ htiˍ baˍ uiˍ na piˍ seuˍ saˍ laiˍ ang laiˍ paˉ jiˉ. Yang ba ceuˉ ha yao ningˉ mae ha naeˉ nae baoˉ vaˍ, Ang suingˉ Yeˍsuˆ beu Kaˉ ba ang liˍ ningˍ na awngˉ lae jiˉ uiˉ, kaˍ hpaˍ yaˍ na baˍ upˍ hkaˍ ba yaˍ na baˍ upˍ, hkaˉ myangˉ naeˉ uiˉ changˉ na yang hpui yao, Yeˍruˆsaˍlaemˍ vengˍ veu ya suiˍ laˉ naeˉ uiˉ saˍ laiˍ yaˇ.
Yang Daˍmaˍsaetˆ vengˍ veu aeˉ beu, vengˍ htang veu hkeu aeˉ yao, buingˍ htaˍ veu ang chit yangˍ yang na tiˍ chitˍ nae htawngˉ luiˍ biˍ jiˍ. Yang nuingˉ chaˍ htaˍ veu heung nga aengˉ yao, Sawˉluˆ, Sawˉluˆ veuˉ, ba ceuˉ ha yao ga na hkanˍ chuiˍ yaˍ laˍ naeˇ nae yang na ciˍ sangˍ naeˍ ang tangˍ ya kyaˍ jiˍ.
Ang suingˉ veuˉ, Naˇ aˍ sangˍ mangˉ nae yang naˉ laeˍ beu, Yeˍsuˆ tawpˍ laeˍ jiˍ yang, Gaˇ nang hkanˍ yaˍ chuiˍ yaˍ laˍ yao ca naeˉ Yeˍsuˆ mangˉ yaˇ. Hta laˉ yao, vengˍ hkaoˍ veu awngˉ aeˉ voˍ. Nang aˉ mae ya ha naeˉ na maˍ laˍ naeˍ yaˇ nae ciˍ sangˍ jiˍ. Yang kawngˉ aeˉ yao ca jiˉ changˉ uiˉ, ang tangˍ hingˍ na ya kyaˍ yao muiˉ, htiˍ hu na muiˉ baˍ myangˍ. Nae yao, yawng kuitˆ manˍ laeˍ yao hingˉ keung cung jiˉ. Sawˉluˆ hta laˉ yao, mi nuing hingˉ hpawng ngangˉ laˉ beu ba ceuˉ na muiˉ baˍ myangˍ laˇ. Haeˉ mae yao, Daˍmaˍsaetˆ vengˍ veu yawng yang na chuingˉ nga aengˉ jiˉ. Sumˍ nuing veu tiˍ hkeu yang mae nuing baˍ myangˍ nae, baˍ caˍ baˍ tangˍ nae ca jiˉ.

Haeˉ mae beu, Daˍmaˍsaetˆ vengˍ hkaoˍ veu Aˍnaˍniˆ nae maengˉ jiˉ ta peˍ htiˍ hu ca jiˉ. Ang suingˉ Yeˍsuˆ nawˍ, yuˍ paˍ yongˍ hkaoˉ veu, Aˍnaˍniˆ veuˉ, nae yang na haoˉ biˍ beu, Ang suingˉ veuˉ, ga nawtˆ ca ngaeˉ nae tawpˍ lae jiˍ.
Ang suingˉ Yeˍsuˆ yang na ha biˍ jiˍ yang, Hta laˉ yao kaˉ ba ang pawng nae haoˉ naeˉ hingˉ senˍ veu aeˉ voˍ. Yuˉdaˆ yumˉ veu Taˍsuˆ vengˍ changˍ Sawˉluˆ na hu aeˉ voˍ. Yaˇ ang buinˉ paˉ yao ca ngaeˉ yaˇ. Yang mi nuing myangˉ laˉ laeˍ hkiˍ naeˍ uiˉ saˍ laiˍ, Aˍnaˍniˆ nae maengˉ jiˉ changˉ htiˍ hu awngˉ laˉ yao, yang htaˍ veu laˍ puˍ boeˉ naeˉ na Sawˉluˆ myangˉ nga byaˇ nae, Yeˍsuˆ Aˍnaˍniˆ na ciˍ sangˍ jiˍ. Caˇ, Aˍnaˍniˆ tawpˍ laeˍ jiˍ. Ang suingˉ veuˉ, changˉ hiˉ maˇ Yeˍruˆsaˍlaemˍ vengˍ hkaoˍ veu changˉ ang seungˍ sangˉ uiˉ na ang haiˉ kanˉ aˉ mawk vaˍ jiˍ awˍ lawng changˉ ang byaˍ hkai lang naeˉ na ga kyaˍ byaˇ. Ningˉ keung veu muiˉ, nang beu ang maengˉ na hkaˉ haoˉ naeˉ uiˉ changˉ na hpui naeˉ uiˉ saˍ laiˍ, yit pa rawˉ hek ang huiˍ uiˍ kawngˉ yang a hkvangˍ ya byaˇ nae, Aˍnaˍniˆ tawpˍ laeˍ jiˍ. Caˇ, Ang suingˉ Yeˍsuˆ yang na ha biˍ jiˍ yang, Aeˉ bao, aˉ mae yao nae baoˉ vaˍ, changˉ hiˉ maˇ, Yuˉdaˆ changˉ baˍ aˍ nae changˉ uiˉ kawngˉ nae ang suingˉ mae nuing suiˍ huˍ veu na baˍ upˍ, ga beu ang maengˉ na maˍ yao lae naeˉ uiˉ yaˇ ga cheˉ yuˉ jiˉ mangˉ hpeuˍ naeˍ yaˇ. Aˉ mae yao nae baoˇ, ga pa nae aˉ mawk ya tuk ya hpan naeˉ lawng ga yang na piˉ myangˉ naeˇ yaˇ nae ha biˍ jiˍ.
Haeˉ mae yao, Aˍnaˍniˆ aeˉ yao yumˉ hiˉ keung awngˉ aeˉ jiˉ. Haeˉ mae beu, Sawˉluˆ htaˍ veu laˍ puˍ boeˉ yao ciˍ jiˍ. Ang hpaeˉ Sawˉluˆ veuˉ, nang mi nuing myangˉ laˉ laeˍ yao Ang hkawˍ laˉ ang seungˍ sangˉ puing laˉ naeˉ uiˉ saˍ laiˍ, kaˉ ba veu nang lui beu, nang na myangˉ laˍ jiˍ Ang suingˉ Yeˍsuˆ maˇ, ga na caiˍ yaˍ luiˍ langˍ ngaeˉ yaˇ nae ha biˍ jiˍ. Tiˍ chitˍ nae Sawˉluˆ beu mi nuing hkaoˉ veu ang kaˍ na tuˉ laˉ nae uiˉ kla luiˍ yao, yang mi nuing myangˉ laˉ laeˍ jiˍ. Haeˉ mae beu, yang hta laˉ yao baˆtiˆsamˍ hkamˉ yuˉ peunˉ yao, caˍ keungˍ ca yao kaˍ ca laˉ laeˍ jiˍ.

Daˍmaˍsaetˆ vengˍ hkaoˍ veu ta peˍ uiˍ kawngˉ yang tiˍ hkaoˍ htiˍ nyamˍ ca yao, Yeˍsuˆ nawˍ Hpaˍcaoˍ beu Ang yaˍ mangˍ yaˇ nae tiˍ chitˍ nae hkaoˉ veu Yuˉdaˆ changˉ ceuˉ hpawm lang kyaˉ veu yang ang buinˉ tangˍ maˍ jiˍ. Ya kyaˍ jiˍ changˉ uiˉ manˍ yao ciˍ jiˍ yang, Changˉ niˇ maˇ, Yeˍruˆsaˍlaemˍ vengˍ hkaoˍ veu ang maengˉ hingˉ na hkaˉ haoˉ naeˉ changˉ uiˉ na tiˍ kangˍ naeˍ mangˉ baˍ aˍ la. Ningˉ keung veu muiˉ haeˉ mae uiˉ changˉ na hpui yao yit pa rawˉ hek ang huiˍ uiˍ kawngˉ chuingˉ ngangˉ naeˉ nae yawng hkeu luingˉ jaˇ nae yawng hkai lang ga jiˉ. Sawˉluˆ nawˍ ang hkawˍ laˉ kanˉ kaˉ seu ya caeˉ ca yao ya caeˉ huiˍ laˉ yao, Yeˍsuˆ nawˍ Hkrit mangˍ yaˇ nae maenˍ nae maˍ yao, Daˍmaˍsaetˆ vengˍ veu ca naeˉ changˉ uiˉ aˉ mae tawpˍ laeˍ ceuˇ nae yawng baˍ kuitˍ taw lae.
Ang nyamˍ iˉ yaˍ mangˍ ngangˍ yao, Sawˉluˆ na ya saeˍ naeˍ uiˉ saˍ laiˍ Yuˉdaˆ changˉ uiˉ hpawm laeˍ lang jiˉ. Haeˉ mae, yawng hpawm lang naeˉ na Sawˉluˆ ya bae jiˉ. Yang na saeˍ naeˍ uiˉ saˍ laiˍ, vengˍ langˉ kaw htiˍ baˍ uiˍ na muˍ hkiˍ nuing kawngˉ yawng hawˍ yao, yang beu ta peˍ uiˍ muˍ hkiˍ veu Sawˉluˆ na suiˍ yao, hkongˍ longˍ veu kan yao vengˍ kamˉ htuikˍ htaˍ veu yang na poiˉ taw aeˉ jiˉ.

Yang Yeˍruˆsaˍlaemˍ vengˍ veu hkeu lui beu, taˍ peˍ uiˍ kawngˉ ca pawˉ lae ceuˉ nae yang kuitˆ yao muiˉ, Sawˉluˆ muiˉ ta peˍ htiˍ hu hpeuˍ laˉ byaˇ nae yawng baˍ yumˍ nae yao, yawng hkaˉ hko laˉ hko yang na hkae jiˉ. Caˇ, Baˍnaˍbaˆ yang na suiˍ yao, naiˍ htangˍ uiˍ kawngˉ lae jiˉ. Kaˉ ba veu Sawˉluˆ Ang suingˉ Yeˍsuˆ na ya myangˉ jiˉ. Ang suingˉ Yeˍsuˆ yang na ciˍ sangˍ jiˍ na Baˍnaˍbaˆ yawng na hkai biˍ jiˍ. Peunˉ na yao, Daˍmaˍsaetˆ vengˍ hkaoˍ veu Yeˍsuˆ beu ang maengˉ na cuˉ yao nuing ba hatˆ naeˉ hkaoˉ veu yang ang buinˉ tangˍ maˍ biˍ jiˍ na ta ta, Baˍnaˍbaˆ yawng na hkai yao piˉ kyaˍ jiˍ. Haeˉ mae yao, Sawˉluˆ nawˍ Yeˍruˆsaˍlaemˍ vengˍ htang veu yawng kawngˉ awkˍ awkˍ taw taw ca jiˉ. Ang suingˉ Yeˍsuˆ beu ang maengˉ na cuˉ yao, nuing ba hatˆ naeˉ hkaoˉ veu yang ang buinˉ tangˍ maˍ jiˍ. Heˍlaˍsaˆ tangˍ ciˍ naeˍ Yuˉdaˆ changˉ uiˉ kawngˉ yang ang changˍ taeng yao hteng lang ga jiˉ. Haeˉ mae beu, yawng ngaˍ yang na saeˍ naˇ nae kuitˆ yao ca jiˉ. Hingˉ awˍ lawng na yumˉ naeˉ saˉ naeˉ uiˉ changˉ yaˍ kyaˍ beu, yang na Kaeˉsaˍriˆ vengˍ veu suiˍ aengˉ yao Taˍsuˆ vengˍ veu hkeu yang na piˉ aeˉ laeˍ jiˍ.
Haeˉ mae beu, Yuˉdaˆ ang meungˉ, Gaˍliˉlaeˉ ang meungˉ nae Saˍmaˍriˆ ang meungˉ ku ti ti veu Hkritˆ yanˍ ang muˉ uiˉ, ca buiˍ duingˉ buiˍ nae ca yao, huiˍ mawng laˉ jiˉ. Ang suingˉ Hpaˍcaoˍ na hkae naeˉ hkaoˉ veu na baˍ upˍ, Ang hkawˍ laˉ ang seungˍ sangˉ yawng na kaˍ piˍ htaengˍ nae aeˉ laˉ yao hpae laˉ geuˉ laˉ jiˉ.

Haeˉ mae beu, Peˍtruˆ nawˍ, yawng beu ca kyaˉ veu htiˍ tawngˍ peunˉ yao htiˍ tawngˍ aeˉ yao, Luˆdaˆ vengˍ hkaoˍ veu ca duingˉ naeˉ Hkritˆ yanˍ uiˍ kawngˉ hkeu aeˉ jiˉ. Hiˉ keung veu laˍ puˍ laˍ hkuiˍ siˉ yao, paetˆ pi tiˍ hkeu yuˍ yao ca jiˉ Aeˉneˍ nae maengˉ jiˉ kaˍ hpaˍ yaˍ htiˍ hu mangˉ na yang ya myangˉ jiˉ. Peˍtruˆ yang na ciˍ sangˍ jiˍ. Aeˉneˍ veuˉ, Yeˍsuˆ Hkrit nang na taeng pyo laˍ byaˇ. Hta laˉ yao nang beu yuˍ pamˍ ningˍ top yao chiˉ voˍ nae ciˍ sangˍ beu, tiˍ chitˍ nae yang hta laˉ jiˉ. Luˆdaˆ vengˍ nae Saˍronˍ ang meungˉ hkaoˉ veu ca naeˉ uiˉ changˉ hkaˉ hko laˉ hko pyo laˉ jiˉ changˉ hiˉ mangˉ na ya myangˉ yao, Ang suingˉ Yeˍsuˆ na yumˉ laˉ laeˍ jiˍ.

Yuˆpeˍ vengˍ hkaoˍ veu Taˍbiˉtaˆ nae maenˉ jiˉ mangˉ ta peˍ hkaˍ ba yaˍ htiˍ hu ca jiˉ. Ang maengˉ hingˉ ngaˍ Heˍlaˍsaˆ tangˍ nae baoˇ, Dawˍkaˍ nae yaˇ. Hkaˍ ba yaˍ hingˍ maˇ, ang maenˍ kanˍ htiˍ baˍ nae, hao na hak yao tanˍ siˍ naeˉ uiˉ nuing ba htiˍ puing ang ca. Ang nyamˍ hingˍ hkaoˉ veu yang na daˉ yaˍ biˍ yao siˉ jiˉ. Yawng yang na langˉ chiˍ peunˍ bi yao yumˉ ang htaˍ htaiˍ hingˍ veu yang na kan yao chiˉ jiˉ. Luˆdaˆ vengˍ nae Yuˆpeˍ vengˍ na duiˍ naeˍ yao, Peˍtruˆ Luˆdaˆ vengˍ veu ca naeˉ awˍ lawng na ta peˍ uiˍ kyaˍ beu, yawng changˉ nyiˍ hu na tawk yaˍ yao, ang nyamˍ ningˍ hkaoˉ veu gu kawngˉ ang vaiˍ nae lui laˍ bao nae yaˉ yetˍ yang na paˉ lae jiˉ. Haeˉ mae yao, Peˍtruˆ nawˍ yaˉ yetˍ nyiˍ hu mangˉ kawngˉ htuˍ yaˍ laˉ mae hkeˍ yao lae jiˉ. Hiˉ keung veu hkeu beu, yumˉ ang htaˍ htaiˍ veu yang na suiˍ ta laengˉ jiˉ. Mae maiˉ ba hkaˉ hko laˉ hko Peˍtruˆ htang veu cung yao ungˉ yao, Dawˍkaˍ yawng kawngˉ htuˍ yaˍ laˉ mae ca beu, kuˍ suiˉ saˍ jiˍ hkaˍ lao ang kaˍ tum uiˉ yang na piˉ hu jiˉ. Peˍtruˆ nawˍ, Yawng hkaˉ hko laˉ hko na piˉ awkˍ taw aengˉ laeˍ yao, yang hpaˍ tuˍ laˍ hku nae ang buinˉ paˉ jiˉ. Peunˉ na yao changˉ siˉ na chiˉ jiˉ kaˉ seu hpap yao, Taˍbiˉtaˆ veuˉ, hta laˉ bao nae ciˍ jiˍ. Hkaˍ ba yaˍ hiˍ mangˉ mae nuing hpawng yao Peˍtruˆ na myangˉ nga beu, duingˉ laˉ jiˉ. Haeˉ mae yao, Peˍtruˆ laˍ puˍ chiˍ yao, yang na chuingˉ hta laˉ biˍ yao, Hkritˆ yanˍ uiˍ nae mae maiˉ ba uiˉ na haoˉ yao, teˍ laˉ laeˍ jiˍ hkaˍ ba yaˍ mangˍ na yawng na ap laeˍ laeˍ jiˍ. Ningˉ lawng ningˉ ngaˍ Yuˆpeˍ vengˍ ku ti ti veu ang maengˉ buinˉ nga aengˉ yao, changˉ ang byaˍ Ang suingˉ Yeˍsuˆ na yumˉ saˉ laˉ jiˉ. Peˍtruˆ nawˍ, Yuˆpeˍ vengˍ hkaoˍ veu Siˉmunˍ nae maengˉ jiˉ cenˍ ang hkaw taeng naeˉ hiˉ keung ang nyamˍ iˉ yaˍ mangˍ ca jiˉ.

Dëgjoj Naiˍ htangˍ 9