If you have would like a copy of this version please contact info@davarpartners.org

Text: Chambeali New Testament, CC-BY-SA-4.0, The Love Fellowship. Audio: Chambeali Standard Version New Testament Audio Bible, CC-BY-SA-4.0, Davar Partners International, Bridge Connectivity Solutions, 2022

Chambeali Standard Version New Testament

Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.

यीशु मसीह अब्राहम ते दाऊद राज्जे रे ‍खानदान बिच का थिये। यीशु मसीह रे गोत्रियां रे ए नां हिन,
अब्राहम रा पुत्तर इसहाक थिया, इसहाक रा पुत्तर याकूब थिया, याकूब रा पुत्तर यहूदा अते यहूदा रे भ्याल थिये।
यहूदा ते तामार रे पुत्तर फिरिस ते जेरह थिये, फिरिस रा पुत्तर हिस्त्रोन थिया, ते हिस्त्रोन रा पुत्तर एराम थिया।
एराम रा पुत्तर अम्मीनादाब थिया, अम्मीनादाब रा पुत्तर नहशोन, अते नहशोन रा पुत्तर सलमोन थिया।
सलमोन रा पुत्तर बोअज थिया, जिसेरी मां राहाब भी इक्क गैर यहूदी जनानी थी, बोअज रा पुत्तर ओबेद थिया, जिसेरी मां रूत भी इक्क गैर यहूदी जनानी थी, अते ओबेद रा पुत्तर यिशै थिया।
ते यिशै रा पुत्तर दाऊद, जे राज्जा थिया, ते दाऊद रा पुत्तर सुलैमान थिया, बैतशिबा सुलैमान री मां थी जे पैल्ले उरिय्याह री लाड़ी थी।
सुलैमान रा पुत्तर रहबाम थिया, रहबाम रा पुत्तर अबिय्याह थिया, ते अबिय्याह रा पुत्तर आसा थिया।
आसा रा पुत्तर यहोशाफात थिया, यहोशाफात रा पुत्तर योराम थिया, योराम रा पुत्तर उज्जियाह थिया।
उज्जियाह रा पुत्तर योताम थिया, योताम रा पुत्तर आहाज थिया, अते आहाज रा पुत्तर हिजकिय्याह थिया।
हिजकिय्याह रा पुत्तर मनश्शिह थिया, मनश्शिह रा पुत्तर आमोन थिया, ते आमोन रा पुत्तर योशिय्याह थिया।
योशिय्याह रा पुत्तर यकुन्याह ते तिसेरे भ्याल पैदा होये। उस दौरान इस्राएल देस रे लोक्कां जो गुलाम बणाई करी बेबिलोन लेई जाया गेया।
बेबिलोन बिच गुलाम बणाई करी लेई जाणे का बाद, यकुन्याह रे घरे मुंडा पैदा होया जिसेरा नां तिसने शालतियेल रख्खेया। शालतियेल रे मुंडे रा नां जरुब्बाबेल थिया।
जरुब्बाबेल रा पुत्तर अबीहूद थिया, अबीहूद रा पुत्तर इल्याकीम थिया, ते इल्याकीम रा पुत्तर अजोर थिया।
अजोर रा पुत्तर सदोक थिया, सदोक रा पुत्तर अखीम थिया, ते अखीम रा पुत्तर इलीहूद थिया,
इलीहूद रा पुत्तर एलीआज़ार थिया, एलीआज़ार रा पुत्तर मत्तान थिया, अते मत्तान रा पुत्तर याकूब थिया।
याकूब रा पुत्तर यूसुफ थिया, जिसेरी लाड़ी रा नां मरियम थिया, अते यूसुफ ते मरियम का यीशु पैदा होए जे “मसीह हिन।”
इसी तरिक्के कने अब्राहम का लेई करी राजा दाऊद तिकर चौदह पीढ़ियां होई, ते राजा दाऊद का लेई करी बेबिलोन बिच गुलामी करणे रे बेल्ले तिकर चौदह पीढ़ियां, ते तित्ते का लेई करी यीशु मसीह रे पैदा होणे तिकर चौदह पीढ़ियां होई।

यीशु मसीह रा जन्म इस तरिक्के कने होया, जां तिन्हेरी मां मरियम री मंगणी यूसुफ कने होई गई, पर ब्याह होणा का पैल्ले ही, जां हल्ले मरियम कुंवारी ही थी, से पवित्रात्मा री ताकत कने दुपराणी होई गई। मरियम रा मगेंतर यूसुफ जे इक्क धार्मिक मणू थिया, मरियम जो सरेआम बदनाम नी करणा चाह्‍ंदा थिया, इधेरे तांइ चुपचाणे ही तिसजो छड्डी दैणा चाह्‍ंदा थिया। “जां यूसुफ इन्हा गल्लां रे बारे अन्दर सोच्चेया ही करदा थिया, तां प्रभु रा स्वर्गदूत तिसजो सुपने अन्दर आई करी बोलणा लगेया, ओ यूसुफ! दाऊद री औलाद, तू मरियम जो अपणी लाड़ी बणाणे रा का मत डर, किजोकी जे बच्चा तिसेरे पेट अन्दर है, से पवित्रात्मा रे पास्से का है। तिसने इक्क मुंडे जो जमणा, ते तू तिसेरा नां यीशु रख्खेया, किजोकी तिनिए सारी दुनिया रे मणूआं रा तिन्हेरे पाप्पां का छुटकारा दैणा।” ए सब इधेरे तांइ होया कि जे वचन प्रभु ने यशायाह भविष्यद्वक्ता रे जरिए बोल्लेया थिया, से पूरा होई जाओ।
“दिख्खो, इक्क कुंवारी ने दुपराणी होणा ते तिसने इक्क निक्के जो जमणा,
ते तिसेरा नां इम्मानुएल रख्खेया जाणा, जिसेरा मतलब हुन्दा,
‘परमेश्वर असा रे कन्ने हिन।’”
तां यूसुफ निन्दर का जाग्गी करी प्रभु रे स्वर्गदूत रे हुकम रे ह्साब कने मरियम जो ब्याई करी तिसजो अपणे घरे लेई आया। ते जां तांइ मरियम ने पुत्तर नी जम्मेया तां तांइ यूसुफ ने मरियम कने कोई शारीरिक सम्बध नी रख्खेया: ते तिसेरे पैदा होणा का बाद यूसुफ ने तिस मुंडे रा नां यीशु रख्खेया।

Dëgjoj मत्ती 1