EKESOTE 9
9
Mate o faga manu
1Nee ui leva e te Eteleno kia Moisese: Alu kia Falaone, pea ke ui kia ia: Koeni te folafola a te Eteleno, te Atua o te kau Hepeleo: Tuku taku hahai ke olo, ke natou tauhi kia au. 2Kapau e mole ke tuku anai te hahai ke olo, pea kapau e ke toe taofi anai ia, 3e to anai te nima o te Eteleno ki au faga manu ae e nonofo i te u gaueaga, ki te u hosi, mo te u asino, mo te faga kamelo, mo te u pipi, pea mo te u ovi; e lahi anai te mamate. 4E vahei kehe anai e te Eteleno te faga manu a Iselaele mai te faga manu a te kau Esipito, pea e mole pe anai mate he manu e tahi i te faga manu a te u fanau a Iselaele. 5Nee fakatotonu leva e te Eteleno te aho, o ui: I apogipogi, e fakahoko anai e te Eteleno te mea aia i te fenua. 6Pea nee fai leva e te Eteleno te mea aia i te aho ake ae. Nee mamate leva te faga manu fuli a te kau Esipito, kae nee mole pe mate he manu e tahi i te faga manu a te u fanau a Iselaele. 7Nee kumikumi leva e Falaone te mea ae nee hoko; pea koeni nee mole pe mate he manu e tahi i te faga manu a Iselaele. Kae nee fakafefeka leva e Falaone tona loto, pea nee mole ina tuku te hahai ke olo.
Papala i tagata mo manu
8Nee ui leva e te Eteleno kia Moisese mo Alone: Kolua fakafonu okolua nima aki te lefulefu o te gutuumu, pea ke laku e Moisese te lefulefu aia ki te lagi, ia mua o Falaone. 9E liliu anai te lefulefu aia ko he efu ae e ina kofu anai te fenua katoa o Esipito; pea e fakatupu anai e te efu aia ni fakafufula mo ni papala i te u tagata mo te u manu o te fenua katoa o Esipito. 10Nee too leva e Moisese mo Alone he lefulefu o he gutuumu, pea nee na olo leva kia mua o Falaone. Nee laku leva e Moisese te lefulefu ki te lagi, pea nee mafuta leva i te u tagata mo te u manu ni fakafufula mo ni papala. 11Nee mole feala leva ke ha te u tagata gaohi mea fakatalakitupua ia mua o Moisese, o tupu ko te u papala, koteuhi nee kaku foki te u papala ki te u tagata gaohi mea fakatalakitupua o hage ko te kau Esipito katoa. 12Nee fakafefeka leva e te Eteleno te loto o Falaone, pea nee mole fakalogo ia Falaone kia Moisese mo Alone, o mulimuli ki te mea ae nee fakaha e te Eteleno kia Moisese.
Ua maka mo te afi
13Nee ui leva e te Eteleno kia Moisese: Tuu kei uhu, pea ke alu kia mua o Falaone. E ke ui anai kia ia: Koeni te folafola a te Eteleno, ko te Atua o te kau Hepeleo: Tuku taku hahai ke olo, o tupu ke natou tauhi kia au. 14Koteuhi, i te faiaga anai aeni, e au tuku fuli anai aku tautea ki tou loto, ki au tagata faifekau, pea mo tau hahai, o tupu ke ke iloi e mole tatau he tahi mo au i te kele katoa. 15Kanapau nee au faoi toku nima, o au tauteai ia koe ki te mate, ia koe mo tau hahai, kua ke puli nei i oluga o te kele. 16Kae nee au fakamauli ia koe, o tupu ke fakaha ia koe toku malohi pea ke fakamafola toku huafa i te kele katoa. 17Kapau e ke toe fia malaga ki taku hahai, pea kapau e mole ke tuku ke olo, 18e au fakato anai i apogipogi, i te hola aeni, he ua maka ae e kehe osi age tona malohi, pea e heeki mau hona tatau i Esipito nei, talu mai te fakatuu o Esipito o kaku mai ki te aho nei. 19Koia ke ke tanaki i he kogamea malumalu au faga manu mo au mea fuli ae e mau i te u gaueaga. E to anai te ua maka ki te u tagata fuli mo te u manu fuli ae e mau i te u gaueaga pea nee mole fakaulu ki fale, pea e natou mamate anai. 20Ko natou ae i te u tagata faifekau a Falaone nee matataku leva ki te folafola a te Eteleno, nee natou fakaulu leva ki onatou fale anatou tagata faifekau mo anatou faga manu. 21Kae ko natou ae nee mole natou too fakamalotoloto te folafola a te Eteleno, nee natou tuku leva anatou tagata faifekau mo anatou faga manu i te u gaueaga.
22Nee ui leva e te Eteleno kia Moisese: Hiki tou nima ki te lagi, pea ke to he ua maka i te fenua katoa o Esipito ki te u tagata, mo te u manu, pea mo te u luna fuli o te u gaueaga, i te fenua o Esipito. 23Nee hiki leva e Moisese tona tokotoko ki te lagi, pea nee tuku leva e te Eteleno ni mana mo he ua maka; pea nee taka leva te afi i oluga o te fenua. Nee fakato leva e te Eteleno he ua maka ki te fenua o Esipito. 24Nee to leva he ua maka, pea nee fio leva te afi mo te ua maka; nee kehe osi te malohi o te ua maka aia, nee heeki hona fakatatau i te fenua katoa o Esipito, talu mai tona tuu ko he puleaga. 25Nee to leva te ua maka i te fenua katoa o Esipito, ki te u mea fuli ae nee mau i te u gaueaga, ki te u tagata o kaku ki te u manu. Nee maumaui e te ua te luna fuli o te u gaueaga, pea nee ina fasifasii fuli te ulu akau fuli o te u gaueaga. 26Nee gata pe ki te fenua o Koseni, ae nee nonofo ai te u fanau a Iselaele, nee mole to ai he ua maka.
27Nee paui leva e Falaone ia Moisese mo Alone, o ui kia naua: I te faiaga leva aeni, kua au agahala; e maonioni te Eteleno, kae kua matou agahala, ia au mo taku hahai. 28Kolua kole ki te Eteleno ke taofi te mana mo te ua maka; pea e au tuku anai koutou ke olo, koteuhi e mole au toe taofi anai koutou. 29Nee ui leva e Moisese kia ia: Ka au mavae anai i te kolo, e au hiki anai oku nima ki te Eteleno, pea e gata anai te u mana, pea e mole toe to anai he ua maka, o tupu ke ke iloi e fakalogo te kele ki te Eteleno. 30Kae e au iloi ko koe mo au tagata faifekau, e mole kotou matataku anai ki te Eteleno Atua. 31Nee maumau leva te lino mo te olese* koteuhi kua kamata fua te olese*, pea kua kamata matala te lino. 32Kae nee mole maumau leva te fulumeto mo te epote* koteuhi nee heeki na hohomo ake. 33Nee mavae leva ia Moisese mai te fale o Falaone, o mavae mai te kolo; pea nee ina hiki leva ona nima ki te Eteleno, pea nee gata leva te mana mo te ua maka; pea nee mole toe to leva te ua ki te kele. 34I te sio a Falaone kua gata te ua, mo te ua maka, pea mo te mana, nee ina toe hoko atu leva tana agahala, o toe fakafefeka tona loto, o ona mo ana tagata faifekau. 35Nee fakafefeka leva te loto o Falaone, pea nee mole ina tuku leva te u fanau a Iselaele ke olo, o mulimuli ki te mea ae nee fakaha e te Eteleno kia Moisese.
Trenutno izbrano:
EKESOTE 9: WB2011
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland